Jeremia
15 Dung i didok Jahowa ma tu au, “Nang pe jongjong si Musa dohot si Samuel di jolokku,+ dang na lao asi rohakku mangida bangso on. Palao ma nasida sian jolokku. Lok ma lao nasida. 2 Jala molo didok nasida tu ho, ‘Tudia ma hami lao?’ Dokkon ma tu nasida, ‘Songon on do hata ni Jahowa,
“Lok ma mate deba dibahen sahit!
Na deba mate dibahen podang!+
Na deba mate dibahen haraparon!
Jala na deba nai lok ma diboan tu luat ni musu!”’+
3 “‘Nungnga hutottuhon lao parookku opat jea* tu nasida,’+ ninna Jahowa. ‘Parookku ma podang lao pamatehon nasida, biang lao makkarat nasida, pidong na di tonga-tonga langit dohot akka binatang buas na di tano on lao mamboddut jala manghancurhon nasida.+ 4 Bahenokku ma sude harajaon na di tano on mabiar alani na masa tu nasida.+ Hubahen pe songon i, alani pangalaho ni si Manasse anak ni si Hiskia raja ni Juda na di Jerusalem i do.+
5 Ise ma na olo marasi ni roha tu ho ale Jerusalem,
Ise ma na olo mangattusi pakkilalaanmu,
Jala ise ma na olo ro lao manukkun aha na masa tu ho?’
6 ‘Nungnga ditadikkon ho Au,’ ninna Jahowa.+
‘Torus do ho marbalik sian Au jala mandao sian Au.*+
Alani i, huangkat ma tanganku lao mangalo ho jala hancurhonokku ma ho.+
Nungnga loja Au torus marasi ni roha tu ho.*
7 Dipiari ma nasida dos songon na mamiari gandum di gerbang ni luat on.
Rampasokku ma akka anak ni nasida.+
Pamateonku ma bangsokki,
Ai dang olo nasida paubahon pangalaho ni nasida.+
8 Gumodang ma bahenokku ina na mabalu di luat ni nasida sian apala pasir na di laut.
Di tikki arian, parookku ma halak lao manghancurhon nasida, lao pamatehon akka ina-ina dohot doli-doli.
Toppu do bahenokku na gaor jala na ngeri tu nasida.
9 Nungnga gabe gale borua naung manubuhon pitu anak,
Nungnga malgip-algip hosana.
Arian dope, alai nungnga holom diida ibana,
Alani i, gabe maila ma ibana jala marlea.’
‘Holan saotik do halak na mangolu sian tonga-tonga ni nasida
Alai pasahatonku do nasida tu podang ni musu,’ ninna Jahowa.”+
10 Ale inang, tung jolma na marjea do au, ala nungnga ditubuhon ho au.+
Torus do au marsalisi jala marbada di sude luat on.
Hape so adong hulehon halak maminjam, jala dang marutang au tu halak,
Alai sude do halak mamburai au.
11 Didok Jahowa ma, “Pasti do urupanku hamu,
Ro do au paluahon hamu tikki masa hasusaan,
Jala di tikki ro musu mangalo hamu.
12 Tolap do sasahalak manghancurhon bosi, tarlumobi bosi na sian utara?
Tolap do sasahalak manghancurhon tombaga?
13 Lehonokku ma hamoraon dohot artamuna lao buaton ni musu,+
Alai dang alani hepeng, alani dosa na diulahon hamu di sude luat i do.
14 Pasahatonku ma i tu musumuna
Boanonna ma i tu luat na so ditanda hamu.+
Ai nungnga marsigorgor be rimashu songon api.
Marsigorgor do murukki tu hamu.”+
15 Ale Jahowa, diboto Ho do aha na masa tu au,
Ingot ma au jala parrohahon ma au.
Baloshon ma akka halak na jahat i,+
Unang ma pasabarhu Ho tu nasida, asa unang sanga au mate dibahen nasida.
Ingot ma, alani Ho do au umbahen na marlea.+
16 Tikki hujalo hatami, hupamasuk do i tu bagasan rohakku,*+
Hatami do na mambahen las jala sonang rohakku.
Ai dipillit Ho do au lao mamakke goarmi, ale Jahowa Pamimpin ni Akka Tentara.*
17 Dang hundul au dohot halak na marsonang-sonang dohot na mekkel-ekkel.+
Alani tudu-tudu na sian Ho, hundul do au sahalakku,
Ai gok rimas+ do dirikku dibahen Ho alani hajahaton ni nasida.*
18 Boasa ma torus haccit huhilala jala dang tarubatan lukkakki?
Ai dang olo malum lukkakki.
Na songon mata mual do Ho na olo koring?
Jala na olo marsik di tikki ro logo ni ari?
19 Alani i, songon on ma hata ni Jahowa,
“Molo olo ho mulak tu Au, las do rohakku manjalo ho.
Torus ma ho marhobas di jolokku.
Molo olo ho papulikkon akka na arga sian akka na so mararga,
Bahenokku ma ho gabe halak na pasahatton hatakku.*
Nasida do na ro tu ho,
Dang pola porlu ho ro tu nasida.”
20 “Bahenokku ma ho gabe songon tembok na sian tombaga di tonga-tonga ni akka bangso on.+
Ai pasti dialo nasida do ho,
Alai dang tolap nasida manaluhon ho,+
Ai donganakku do ho asa selamat ho jala asa malua ho,” ninna Jahowa.
21 “Paluaokku ma ho sian tangan ni halak parjahat
Jala tobusokku ma ho sian tangan ni halak na kejam.”