Jeremia
24 Dung i diboan Jahowa ma tu au dua karanjang na marisi parbue ni hau ara, na di jolo ni bagas joro ni Jahowa. Dipatuduhon Ibana ma i tu au, dung diboan si Nebukadnesar* raja ni Babel i si Jekonia*+ anak ni si Jehoyakim+ raja ni Juda, akka pejabat ni Juda, akka tukkang logam,* dohot akka tukkang na malo sian Jerusalem tu Babel.+ 2 Karanjang na parjolo marisi hau ara na massai denggan dos songon parbue ni hau ara na parjolo dipanen. Karanjang na sada nai marisi parbue ni hau ara na massai roa. Alani roana sappe dang boi tarallang.
3 Dung i didok Jahowa ma, “Aha do na niidami Jeremia?” Hualusi ma, “Parbue ni hau ara. Parbue ni hau ara na denggan i massai denggan do. Alai parbue ni hau ara na roa i massai roa do. Alani roana dang boi tarallang.”+
4 Dung i didok Jahowa ma muse tu au, 5 “Songon on ma hata ni Jahowa Debata ni Israel, ‘Songon parbue ni hau ara na denggan on ma di Au akka halak Juda na diboan musu, naung hupalao sian inganan on tu luat ni halak Kasdim. 6 Parrohahonokku ma nasida asa dapot ni nasida na denggan. Bahenokku ma nasida mulak tu luat on.+ Bahenokku ma nasida mamora jala dang bahenokku nasida hancur. Suanokku ma nasida jala dang na lao cabutokku.+ 7 Jala lehonokku ma tu nasida roha lao mananda Au, ai Au do Jahowa.+ Nasida ma na gabe bangsokku jala Au ma na gabe Debata ni nasida.+ Ai mulak nama nasida tu Au sian nasa roha ni nasida.+
8 “‘Alai taringot tu parbue ni hau ara na massai roa i jala na so tarallang i,+ songon on ma hata ni Jahowa, “Songon parbue ni hau ara na roa i ma di Au si Sedekia+ raja ni Juda dohot akka pejabatna, sude penduduk ni Jerusalem na adong di luat on, dohot sude halak na tinggal di Mesir.+ 9 Bahenokku ma sude harajaon na di tano on+ mabiar dung diida nasida jea na hubahen tu bangso Israel i. Dileai akka halak ma nasida jala dipakke do goar ni bangso i di uppasa lao mangarehei. Manang didia pe inganan ni nasida hubahen marserak,+ dileai akka halak do nasida jala diburai.+ 10 Hukumokku ma nasida. Parookku ma podang,+ haraparon, dohot sahit na masa di godang inganan,+ sappe mate nasida sude sian luat na hulehon tu nasida dohot tu akka ompu ni nasida.”’”