Jeremia

32 Makkatai ma muse Jahowa tu si Jeremia di taon na pasappuluhon pamarettaon ni si Sedekia raja ni Juda, i ma taon na pasappulu ualuhon pamarettaon ni si Nebukadnesar.*+ 2 Di tikki i ma akka tentara ni raja ni Babel mengepung Jerusalem. Jala Panurirang* Jeremia nungnga dihurung di penjara na di Alaman ni Panjaga+ na di istana ni raja ni Juda. 3 Ai dihurung si Sedekia raja ni Juda do Panurirang Jeremia.+ Didok do, “Ai boasa songon on didokkon ho, ‘Songon on do hata ni Jahowa, “Pasahatonku do kota on tu tangan ni raja ni Babel jala taluhononna ma kota on.+ 4 Dang na lao boi si Sedekia raja ni Juda i lari sian Kasdim. Ai pasti do dipasahat ibana tu tangan ni raja ni Babel. Ikkon pajuppang bohi do ibana dohot raja i jala makkatai langsung tu raja i.”’+ 5 ‘Boanon ni raja i ma si Sedekia tu Babel jala torus ma ibana disi sahat tu na hutottuhon aha na lao bahenokku tu ibana,’ ninna Jahowa. ‘Ai nang pe torus dialo hamu halak Kasdim i, dang na lao marhasil hamu.’”+

6 Didok si Jeremia ma, “Didok Jahowa ma tu au, 7 ‘Na lao ro ma si Hamamel anak ni si Sallum bapa tuami* mandapotton ho. Dohononna ma tu ho, “Tuhor ma ladangku na di Anatot i.+ Ai ho do na parjolo marhak lao manuhor i muse.”’”+

8 Ro ma si Hamamel anak ni bapa tuakki mandapotton au tu Alaman ni Panjaga songon hata ni Jahowa. Didok si Hamamel ma tu au, “Tuhor ma ladangku na di Anatot i, na di luat ni marga Benjamin. Ai ho do na marhak nappunasa i jala na manuhor i muse. Tuhor ma ladang i.” Sian i huboto ma hata ni Jahowa do na nidokna i.

9 Dung i hutuhor ma ladang na di Anatot i sian si Hamamel anak ni bapa tuakki. Hutimbang ma hepeng na lao lehonokku tu ibana.+ Hutimbang ma pitu sekel* dohot sappulu logam perak. 10 Dung i hubahen ma surat ni tano i.+ Hubahen do materai di surat i. Hujou do akka saksi+ jala hutimbang do hepeng i mamakke timbangan. 11 Dung i huboan ma surat ni tano naung hutuhor jala naung hubahen materaina i mangihutton paretta dohot peraturan pengadilan. Jala huboan do muse surat na so marmaterai. 12 Di jolo ni si Hamamel anak ni bapa tuakki, di jolo ni sude saksi na manandatangani surat ni tano i, dohot di jolo ni sude halak Jahudi na hundul di Alaman ni Panjaga,+ hulehon ma surat ni tano i tu si Baruk,+ anak ni si Neria,+ pahoppu ni si Maseya.

13 Di jolo ni nasida sude, hudok ma tu si Baruk, 14 “Songon on do hata ni Jahowa Pamimpin ni Akka Tentara,* Debata ni Israel i, ‘Buat ma akka surat ni tano i, surat ni tano naung dimaterai dohot na so dimaterai. Sippan ma sudena i tu bagasan hudon na dibahen sian tano liat, asa boi leleng tahan surat i.’ 15 Ai songon on do hata ni Jahowa Pamimpin ni Akka Tentara, Debata ni Israel i, ‘Ai na lao tuhoron dope jabu, ladang, dohot porlak anggur di luat on.’”+

16 Dung hulehon surat ni tano i tu si Baruk anak ni si Neria, martangiang ma au tu Jahowa. Hudok ma, 17 “Ale Jahowa Tuan Natumimbul, marhite huasom na balga i dohot tanganmu na gogo i,+ ditoppa Ho do langit dohot tano on. Dang adong na so boi bahenonmu. 18 Dipatudu Ho do holongmu na manoktong* i tu marribu halak. Dipasombu Ho do akka anakna manaon hasusaan alani dosa ni bapakna.*+ Ho do Debata na sittong, na sangap, na gogo, jala Pamimpin ni Akka Tentara na margoar Jahowa. 19 Massai denggan situtu do akka podam.* Jala massai longang do roha mangida akka na binahenmu.+ Diparrohahon Ho do sude na niulahon ni jolma+ asa dibalos Ho ganup halak hombar tu pambahenanna dohot pangalahona.+ 20 Dibahen Ho do akka tanda dohot mukjizat di Mesir, jala diboto halak do i sahat tu sadari on. Songon i ma Ho mambahen tarbarita goarmi di tonga-tonga ni Israel dohot di tonga-tonga ni akka jolma,+ songon na lao masa sadari on. 21 Diboan Ho do bangso Israel kaluar sian Mesir marhite tanda halongangan, mukjizat, tanganmu na gogo i, hagogoonmu na tung massai balga i, dohot ulaon na parohon biar.+

22 “Dung i lehononmu ma tu nasida luat on, luat naung dijanjihon Ho mardongan sumpa tu akka oppu ni nasida,+ i ma luat na godang susu dohot madu.+ 23 Dung i ro ma nasida tu luat on. Dibuat nasida ma luat on gabe appuna ni nasida. Alai dang dioloi nasida hatam jala dang diulahon nasida akka patikmu. Dang diulahon nasida sude paretta na dilehon Ho tu nasida. Alani i, diparo Ho ma sude jea on tu nasida.+ 24 Marroan ma akka halak jala dibahen ma tembok lao mengepung dohot manaluhon kota on.+ Alani porang,+ haraparon, dohot sahit na masa di godang inganan,+ gabe talu ma kota i di tangan ni halak Kasdim na ro mangalo nasida. Sude na nidokmi nungnga saut be songon na niidam saonari. 25 Alai, ale Jahowa Tuan Natumimbul, nang pe naeng dipasahat kota on tu tangan ni halak Kasdim, didok Ho dope tu au, ‘Tuhor ma ladang on jala jou ma akka saksi.’”

26 Dung i didok Jahowa ma muse tu si Jeremia, 27 “Au do Jahowa Debata ni saluhut jolma. Ai adong huroa na so boi bahenokku? 28 Songon on ma hata ni Jahowa, ‘Pasahatonku nama kota on tu tangan ni halak Kasdim jala tu tangan ni si Nebukadnesar* raja ni Babel. Taluhononna nama kota i.+ 29 Ro ma halak Kasdim lao manaluhon kota on jala manutung kota on. Tutungonna+ ma sude jabu na atapna dipakke lao mangalehon pelean tu debata Baal, jala mangusehon pelean siinumon tu debata na asing.’+

30 “‘Diulahon nasida do i lao mambahen haccit rohakku. Ai sian mulai poso halak Israel dohot halak Juda, sai diulahon nasida do na jahat di jolokku.+ Sai torus do dibahen halak Israel haccit rohakku marhite akka parniulaon ni nasida,’ ninna Jahowa. 31 ‘Ai mulai sian na dipajongjong kota on sahat tu sadari on, sai holan na muruk do Au jala tarrimas dibahen nasida.+ Alani i, ikkon dihancurhon do kota on sian jolokku.+ 32 Ai sude do halak Juda dohot halak Israel mangulahon na jahat lao mambahen haccit rohakku. Sude do nasida mangulahon i, i ma akka raja,+ pamimpin,+ malim, panurirang,+ halak Juda, dohot akka penduduk ni Jerusalem. 33 Nang pe sai torus Au* mangajari nasida, alai dang olo nasida manangihon sipasingottu.+ Gariada sai torus do ditundali nasida Au jala dipadao nasida do bohi ni nasida sian Au.+ 34 Jala dibahen nasida do akka patung na huhagigihon i di jabu na hupillit lao pasangappon goarhu, asa ramun* jabu i.+ 35 Asing ni i, dipajongjong nasida do akka inganan panombaon* tu Baal di Rura Anak ni Hinnom.*+ Dibahen nasida do i lao manutung anak dohot boru ni nasida tu api lao gabe pelean situtungon tu Molok.+ Dang hea huparettahon i,+ jala dang hea tubu di rohakku lao manuru halak Juda mangulahon ulaon na huhagigihon na mambahen nasida mardosa.’

36 “Didok hamu do na lao ditaluhon raja ni Babel kota on alani podang, haraparon, dohot sahit na masa di godang inganan. Alani i songon on ma hata ni Jahowa Debata ni halak Israel taringot tu kota on, 37 ‘Papunguokku ma nasida sude sian akka luat inganan ni nasida marserak i. Ai di tikki muruk jala marrimas situtu Au tu nasida,+ hubahen do nasida marserak. Alai boanokku ma nasida muse mulak tu inganan on jala sonang ma nasida maringanan dison.+ 38 Nasida ma na gabe bangsokku jala Au ma na gabe Debata ni nasida.+ 39 Paubaokku ma roha ni nasida+ dohot pangalaho ni nasida asa toktong dihabiari nasida Au, asa denggan ngolu ni nasida dohot akka pinoppar ni nasida.+ 40 Bahenokku ma parjanjian na marlakku saleleng ni lelengna.+ Di parjanjian i, dohonokku ma na toktong bahenokku na denggan tu nasida.+ Jala toktong ma bahenokku roha ni nasida mabiar tu Au, asa unang manimbil nasida sian Au.+ 41 Las situtu do rohakku lao mangulahon na denggan tu nasida,+ jala sian nasa rohakku dohot sian nasa gogokku,* bahenokku ma nasida toktong tinggal di luat on.’”+

42 “Songon on ma hata ni Jahowa, ‘Songon carakku mambahen akka jea tu bangso on, songon i ma carakku parohon akka na denggan naung hujanjihon tu nasida.+ 43 Tuhoron ni akka halak ma di luat on akka ladang,+ nang pe didok nasida inganan na harsang inganan on. Ai so adong jolma manang binatang dison jala nungnga dipasahat luat on tu halak Kasdim.’

44 “‘Pakkeon ni akka halak ma hepengna lao manuhor akka ladang. Bahenon ni nasida ma surat ni tano i jala dimaterai. Dijou ma akka saksi di luat ni halak Benjamin,+ di luat na di sakaliling ni Jerusalem, di akka kota na di Juda,+ di akka kota na di dolok, di akka kota na di rura,+ dohot di akka kota na di sabola selatan. Ai boanokku nama mulak akka halak na diboan musu i,’+ ninna Jahowa.”