Hesekiel
29 Di ari na pasappulu duahon di bulan na pasappuluhon, di taon na pasappuluhon, makkatai ma muse Jahowa tu au. Ninna ma, 2 “Ale anak ni jolma, ida ma doppak si Firaun raja ni Mesir, jala paboa ma aha na lao masa taringot tu ibana dohot taringot tu sude luat Mesir.+ 3 Paboa ma hatakkon, ‘Songon on do hata ni Jahowa Tuan Natumimbul i,
“Ale Firaun raja ni Mesir,+ Au ma na gabe alom,
Binatang raksasa na peak di Sunge Nil+ do ho,
Ho sandiri do na mandok, ‘Appunakku do Sunge Nil.
Lao di au sandiri do hubahen i.’+
4 Alai, bahenokku ma hait-hait tu osang-osangmu jala bahenokku ma dekke na di Sunge Nil lokkot tu sisikmu.
Pakaluarokku ma ho sian Sunge Nil rap dohot sude dekke na lokkot di sisikmi.
5 Tadikkonokku ma ho di gurun rap dohot sude dekke na sian Sunge Nil appunami.
Bahenokku ma ho madabu tu tano jala dang na lao dipapungu manang dikuburhon be akka bakkem na marserak i.+
Bahenokku ma ho gabe siallangon ni binatang buas na di tano on dohot akka pidong na martonga-tonga langit.+
6 Botoon ni sude penduduk ni Mesir ma na Au do Jahowa,
Ai dos songon sada batang ni durame* do nasida na so boi mangurupi halak Israel.+
7 Tikki ditiop halak Israel ho,
Jala tikki dibahen nasida ho gabe tukkot ni nasida, ponggol do ho.
8 “‘Alani i, songon on ma didok Jahowa Tuan Natumimbul i, “Parookku ma podang tu ho.+ Pamateonku ma sude jolma dohot binatang appunami. 9 Na lao tarulang ma luat na di Mesir jala hancur.+ Sian i botoon ni nasida ma na Au do Jahowa. Ai nungnga didok ho, ‘Appunakku do Sunge Nil i, jala au do na mambahen i.’+ 10 Alookku ma ho dohot Sunge Nil appunami. Bahenokku ma hancur luat Mesir, koring jala tarulang.+ Bahenokku ma masa i mulai sian Migdol+ sahat tu Siene+ jala sahat tu parbatasan ni Etiopia. 11 Dang adong be jolma manang binatang na mardalan sian i,+ jala dang adong be na mangingani luat i saleleng 40 taon. 12 Bahenokku ma Mesir gabe luat na tarulang. Dang adong luat na songon i tarulangna. Bahenokku ma akka kotana tarulang saleleng 40 taon,+ jala dang adong kota na songon i tarulangna. Bahenokku ma marserak halak Mesir tu tonga-tonga ni bangso dohot tu tonga-tonga ni luat.”+
13 “‘Ai songon on do hata ni Jahowa Tuan Natumimbul i, “Dung salpu 40 taon, papunguokku do muse halak Mesir sian tonga-tonga ni bangso, inganan ni nasida marserak i.+ 14 Boanokku ma halak Mesir naung diboan musu i tu luat Patros,+ tu asal ni nasida hian. Gabe sada harajaon na so margogo ma nasida disi. 15 Gabe ummetmet ma harajaonna sian na asing. Dang boi be ibana mangarajai bangso na asing.+ Hubahen pe ibana songon i, asa unang boi do ditaluhon Mesir bangso na asing.+ 16 Dang mangasahon halak Mesir be halak Israel.+ Alai, na masa tu Mesir mambahen halak Israel mangingot hasalaan ni nasida, i ma mangido Mesir mangurupi nasida. Jala sian i, botoon ni nasida ma Au do Jahowa Tuan Natumimbul i.”’”
17 Di ari na parjolo, di bulan na parjolo, di taon na paduapulu pituhon, makkatai ma muse Jahowa tu au. Didok ma, 18 “Ale anak ni jolma, nungnga disuru si Nebukadnesar*+ raja ni Babel asa marsitutu tentarana mangalo Tirus.+ Nungnga sappe botak sude ulu ni tentarana. Lukka do bahu ni nasida ala masiososan. Alai dang adong dijalo ibana dohot tentarana i upa nang pe nungnga loja mangalo Tirus.
19 “Alani i songon on ma hata ni Jahowa Tuan Natumimbul i, ‘Pasahatonku ma luat Mesir tu si Nebukadnesar* raja ni Babel.+ Buatonna ma hamoraon ni Mesir jala buatonna ma artana na godang i. Dung i bahenonna ma i gabe upa ni tentarana.’
20 “‘Pasahatonku ma Mesir tu ibana lao gabe upa ni halojaonna mangalo Tirus. Ai nungnga loja ibana mangulahon lomo ni rohakku,’+ ninna Jahowa Tuan Natumimbul i.
21 “Di ari i, bahenokku ma tubu sada tanduk* di Israel.+ Dung i lehonokku ma tikki di ho lao makkatai di tonga-tonga ni nasida. Jala sian i botoon ni nasida ma na Au do Jahowa.”