Na disurat si Mateus
2 Tubu ma Jesus di Betlehem+ na di Judea. Di tikki i, Raja Herodes*+ do na mamaretta disi. Dung i, ro ma akka datu* na sian Timur tu Jerusalem. 2 Disukkun nasida ma, “Didia do raja ni halak Jahudi+ na baru tubu i? Tikki di Timur hami, huida hami do bintang na manogu-nogu hami tu ibana. Alani i ma ro hami naeng marsomba* tu ibana.” 3 Mambege i, tarsonggot ma Raja Herodes dohot sude pangisi ni huta Jerusalem. 4 Dipapungu ibana ma sude malim kepala* dohot akka siboto surat.* Disukkun ma nasida taringot tu huta hatubuan ni Kristus.* 5 Dialusi nasida ma, “Di Betlehem+ na di luat Judea do ibana tubu. Ai songon on do na sinurat ni panurirang,* 6 ‘Ale Betlehem na di Juda, sasittongna dang boi nian leas roha ni akka gubernur ni Juda mangida ho. Ai sian ho do ro sahalak pamimpin na lao marmahan Israel bangsokki.’”+
7 Dung i, sipsip ma si Herodes manjou akka datu* i jala disukkun ma tu nasida nandigan bintang i tarida. 8 Tikki naeng borhat akka datu i tu Betlehem, didok si Herodes ma, “Lului ma dakdanak i sappe dapot. Molo dung juppang, paboa ma tu au asa ro au marsomba tu ibana.” 9 Borhat ma nasida dung dibege paretta ni raja i. Diida nasida ma muse bintang na niida ni nasida tikki di Timur.+ Ditogu-togu bintang i ma nasida, jala torus ma diihutton nasida bintang i sappe so bintang i di atas ni jabu inganan ni dakdanak i. 10 Las situtu do roha ni nasida tikki mangida bintang i. 11 Dung masuk nasida tu inganan i, diida nasida ma dakdanak i rap dohot omakna si Maria. Marsinggang ma nasida jala marsomba tu ibana. Dilehon nasida ma tu ibana mas, haminjon, dohot mir* na diboan nasida. 12 Tikki naeng mulak nasida, sian dalan na asing ma nasida mulak. Ai nungnga dipasingot Debata nasida marhite nipi+ asa unang mulak be tu si Herodes.
13 Dung mulak akka datu i, ro ma suru-suruan ni Jahowa* tu bagasan nipi ni si Josep.+ Didok ma, “Hehe ma ho, boan ma dakdanak i rap dohot omakna. Lao ma hamu tu Mesir. Disi ma hamu tinggal sahat tu na hupaboa muse aha na lao siulahononmu. Alana luluan ni si Herodes do dakdanak i lao bunuonna.” 14 Borngin i, hehe ma si Josep jala diboan ma dakdanak i dohot omakna tu Mesir. 15 Disi ma si Josep maringanan sahat tu na mate si Herodes. Saut ma hata ni Jahowa* marhite panurirangna na mandok, “Sian Mesir do hujou anakki.”+
16 Dung diboto si Herodes naung dipaoto-oto akka datu i ibana, muruk situtu ma ibana. Diparettahon ma asa dibunu sude dakdanak bawa na di Betlehem dohot na di sakalilingna. Ikkon dipamate do sude bawa na marumur dua taon tu toru, sesuai tu perkiraan na dipaboa akka datu i.+ 17 Alani i, saut ma hata ni Panurirang Jeremia na mandok, 18 “Tarbege do soara ni na mangangguki dohot soara ni na mangandungi sian Rama. Diangguki si Rahel+ do akka ianakkonna, jala dang olo ibana diapuli. Ai nungnga mate be akka anakkonna i.”+
19 Dung mate si Herodes, ro ma suru-suruan ni Jahowa* tu bagasan nipi+ ni si Josep. Tikki i, di Mesir dope ibana. 20 Didok suru-suruan i ma, “Hehe ma ho, boan ma dakdanak i rap dohot omakna tu Israel, ai nungnga mate be akka na marsakkap lao mambunu dakdanak i.” 21 Dung i, hehe ma si Josep jala diboan ma dakdanak i dohot omakna tu Israel. 22 Alai mabiar do ibana lao tu Judea. Ai nungnga dibege ibana, si Arkilaus do na mamaretta di Judea manggattihon bapakna si Herodes. Tarlumobi, nungnga dipasingot Debata hian ibana+ asa unang lao tusi. Alani i ma gabe lao ibana tu Galilea.+ 23 Sahat ma ibana di Nasaret+ jala tinggal disi. Saut ma hata ni akka panurirang na mandok, “Digoari ma ibana halak Nasaret.”*+