5 Musa
27 Diparettahon si Musa dohot akka pangituai* ni halak Israel i ma songon on, “Oloi hamu ma sude paretta na hupaboa tu hamu sadari on. 2 Tikki ditaripari hamu Sunge Jordan lao tu luat na nilehon ni Jahowa Debatamuna i tu hamu, pajongjong hamu ma akka batu na balga, jala palester hamu ma batu i.*+ 3 Molo dung manaripar hamu, suratton hamu ma sude akka patik on di batu i. Alani i, boi ma hamu masuk tu luat na lao lehonon ni Jahowa Debatamuna i tu hamu, i ma luat na godang susu dohot madu, songon naung dijanjihon Jahowa Debata ni akka ompumuna i tu hamu.+ 4 Molo dung ditaripari hamu Sunge Jordan i, pajongjong hamu ma akka batu i di Dolok Ebal,+ jala ikkon dipalester hamu do akka batu i* songon na huparettahon tu hamu. 5 Ikkon dibahen hamu do muse disi sada langgatan na sian batu tu Jahowa Debatamuna. Unang pakke hamu alat na sian bosi tikki mambahen i.+ 6 Ikkon sian batu na so diputtar do dibahen hamu langgatan tu Jahowa Debatamuna i. Di atasna i ma pelehon hamu pelean situtungon tu Jahowa Debatamuna. 7 Pelehon hamu ma muse pelean pardamean*+ jala allang hamu ma i disi.+ Ikkon marlas ni roha do hamu di jolo ni Jahowa Debatamuna.+ 8 Dung i takkas ma suratton hamu isi ni patik i di batu i.”+
9 Makkatai ma si Musa dohot akka malim halak Lepi tu sude halak Israel. Didok ma, “Hohom ma hamu ale halak Israel, tangihon hamu ma hatakkon. Sadari on, nungnga gabe bangso ni Jahowa Debatamuna be hamu.+ 10 Ikkon ditangihon hamu do hata ni Jahowa Debatamuna. Ikkon diulahon hamu do parettana+ dohot akka aturanna, songon na hupaboa tu hamu sadari on.”
11 Di ari i, didok si Musa ma paretta on tu halak Israel, 12 “Molo dung manaripar hamu sian Sunge Jordan, jongjong ma akka marga ni Israel di Dolok Gerizim+ lao mangido pasu-pasu sian Debata tu bangso on. Akka on ma marga i: marga Simeon, Lepi, Juda, Isasar, Josep, dohot Benjamin. 13 Jala akka marga on ma na jongjong di Dolok Ebal+ mandok hata bura: marga Ruben, Gad, Aser, Zebulon, Dan, dohot Naptali. 14 Jala gogo ma soara ni halak Lepi mandok tu sude halak Israel,+
15 “‘Hona bura ma halak na mambahen patung na diukir+ manang patung logam+ akka na dihagigihon Jahowa,+ akka na binahen ni partukkang,* jala akka halak na manabunihon sudena i.’ (Sude ma bangso i mandok, ‘Amen!’*)
16 “‘Hona bura ma halak na mangaleai omakna manang bapakna.’+ (Sude ma bangso i mandok, ‘Amen!’)
17 “‘Hona bura ma halak na papindahon tanda parbatasan ni tano ni donganna.’+ (Sude ma bangso i mandok, ‘Amen!’)
18 “‘Hona bura ma halak na mambahen lilu halak na mapitung di dalan.’+ (Sude ma bangso i mandok, ‘Amen!’)
19 “‘Hona bura ma halak na papeol hukum tikki mangadili+ halak panoppang, dakdanak na so marama,* manang ina na mabalu.’+ (Sude ma bangso i mandok, ‘Amen!’)
20 “‘Hona bura ma halak na mangulahon seks dohot istri ni bapakna. Ai na mambahen marlea bapakna do ibana disi.’+ (Sude ma bangso i mandok, ‘Amen!’)
21 “‘Hona bura ma halak na mangulahon seks dohot binatang.’+ (Sude ma bangso i mandok, ‘Amen!’)
22 “‘Hona bura ma halak na mangulahon seks dohot itona, i ma boru ni bapakna manang boru ni omakna.’+ (Sude ma bangso i mandok, ‘Amen!’)
23 “‘Hona bura ma halak na mangulahon seks dohot simatuana boru.’+ (Sude ma bangso i mandok, ‘Amen!’)
24 “‘Hona bura ma halak na monggop-onggop lao mambunu donganna.’+ (Sude ma bangso i mandok, ‘Amen!’)
25 “‘Hona bura ma halak na manjalo sogok lao mambunu* halak na so marsala.’+ (Sude ma bangso i mandok, ‘Amen!’)
26 “‘Hona bura ma halak na so mangargai Patik ni Debata dohot na so mangulahon i.’+ (Sude ma bangso i mandok, ‘Amen!’)