Surat tu si Titus
3 Toktong ma paingot nasida asa mangoloi jala unduk tu pamaretta dohot tu akka parhuaso,+ rade mangulahon ulaon na denggan, 2 dang paroa-roahon manang ise pe, dang parbada, parroha na dame,+ jala lambok tu sude halak.+ 3 Ai hita pe najolo oto do, pangalo, lilu, dirajai hisap-hisap ni daging jala sai holan na mangalului hasonangan, sai mangulahon na jahat jala marlate ni roha, mangulahon ulaon na dihagigihon Debata, jala marsogo ni roha tu dongan.
4 Alai dipatudu Debata Sipalua+ hita i do asi ni roha dohot holongna tu jolma, 5 dang ala taulahon na sittong,+ alai alani asi ni rohana do.+ Dipalua do hita marhite pandidion asa boi hita manjalo hangoluan+ jala boi ma hita gabe jolma na imbaru marhite tondi parbadia.+ 6 Diusehon Debata do massai godang tondi parbadiana tu hita marhite Jesus Kristus Sipalua hita.+ 7 Marhite asi ni rohana na massai balga i, didok ma hita mangulahon na sittong.+ Gabe boi ma hita parsidohot+ manjalo hangoluan na saleleng ni lelengna+ songon na tapaima-ima i.
8 Boi do tahaporseai akka hata on. Denggan ma parrohahon i, asa sude na porsea tu Debata sai mamikkirhon akka ulaon na denggan. Ai denggan do akka i jala marlaba tu jolma.
9 Alai pasiding ma akka parsoalan na so marguna, parsoalan taringot tu tarombo, dohot parsoalan manang parbadaan taringot tu Patik. Ai marisuang do i sude jala dang adong gunana.+ 10 Molo adong na mangajarhon ajaran na so sittong,+ pasingot ma ibana.+ Molo dung dipasingot ho ibana dua hali alai dang ditangihon, unang be attoi ibana.+ 11 Ai nungnga lilu halak sisongon i sian dalan na sittong. Nungnga mardosa ibana jala pangalahona i ma na patuduhon naung sala ibana.
12 Dung husuru si Artemas manang si Tikikus+ mandapotton ho, tibu ma ho ro mandapotton au tu Nikopolis. Ai didok rohakku disi nama au saleleng musim dingin. 13 Parade ma sude na porlu tu si Jenas siboto patik i dohot tu si Apollos, asa unang adong na hurang di nasida tikki di pardalanan.+ 14 Ikkon marsiajar do akka donganta mangulahon ulaon na denggan, asa boi nasida mangurupi tikki dihaporluhon.+ Marhite i toktong ma denggan ulaon ni nasida.+
15 Sahat ma tabe ni sude dongan na adong dison tu ho. Pasahat ma tabe tu dongan sahaporseaon na makkaholongi hami.
Sai didongani asi ni roha ni Debata na massai balga i ma hamu sude.