Josua

22 Dung i dipapungu si Josua ma marga Ruben, marga Gad, dohot satonga sian marga Manasse. 2 Didok ibana ma tu nasida, “Nungnga diulahon hamu sude paretta ni si Musa naposo ni Jahowa i,+ dohot sude parettakku.+ 3 Dang hea ditadikkon hamu akka donganmuna sabangso sahat tu sadari on.+ Jala diulahon hamu do sude paretta ni Jahowa Debatamuna i.+ 4 Nungnga dibahen Jahowa Debatamuna dame ngolu ni akka dongan sabangsomuna, songon janjina tu nasida.+ Alani i, mulak ma hamu tu perkemahanmuna di tano na nilehon ni si Musa naposo ni Jahowa i tu hamu, i ma na di bariba* ni Sunge Jordan.+ 5 Alai, ikkon marsitutu do hamu mangulahon paretta dohot Patik na nilehon ni si Musa naposo ni Jahowa i tu hamu.+ Ulahon hamu ma i marhite makkaholongi Jahowa Debatamuna i,+ mangulahon lomo ni rohana,+ mangoloi parettana,+ setia tu Ibana,+ jala manomba Ibana+ sian nasa rohamuna dohot nasa ngolumuna.”+

6 Dung i dipasu-pasu si Josua ma nasida, jala borhat ma nasida mulak tu perkemahan ni nasida. 7 Dilehon si Musa do tano parbagianan na di Basan tu satonga sian marga Manasse.+ Jala dilehon si Josua do tano na di sabola barat ni Sunge Jordan tu marga Manasse na satonga nai.+ Disi ma nasida rap tinggal dohot akka marga na asing. Tikki naeng mulak nasida tu perkemahan, dipasu-pasu si Josua do nasida. 8 Ninna ma, “Mulak ma hamu tu perkemahanmuna jala boan hamu ma godang arta. Boan hamu ma godang binatang na lao dipiaro, perak, mas, tombaga, bosi, dohot godang pakkean.+ Boan hamu ma akka arta naung dibuat hamu+ sian musumuna. Jala bagihon hamu ma i tu akka donganmuna.”

9 Dung i ditadikkon marga Ruben, marga Gad, dohot satonga sian marga Manasse ma halak Israel na asing. Borhat ma nasida sian Silo na di tano Kanaan, jala mulak ma nasida tu Gilead.+ Ai luat Gilead do tano parbagianan na dilehon tu nasida, songon paretta ni Jahowa marhite si Musa.+ 10 Dung i, sahat ma marga Ruben, marga Gad, dohot satonga sian marga Manasse di Sunge Jordan na di tano Kanaan. Dibahen nasida ma sada langgatan na balga jala na uli jonok tu Sunge Jordan i. 11 Dung i diboto halak Israel na asing ma i.+ Didok ma, “Nungnga dibahen marga Ruben, marga Gad, dohot satonga sian marga Manasse sada langgatan. Dibahen nasida do i di parbatasan ni tano Kanaan na di Sunge Jordan na tu sabola hita.” 12 Dung dibege nasida i, marpungu ma nasida di Silo+ lao marporang mangalo halak Israel na di sabola timur ni Sunge Jordan.

13 Dung i, disuru halak Israel ma si Pinehas+ anak ni Malim Eleasar tu Gilead. Disuru do ibana manjuppangi marga Ruben, marga Gad, dohot satonga sian marga Manasse. 14 Dohot do sappulu pamimpin ni marga ni halak Israel borhat dohot si Pinehas. Sahalak ma sian ganup marga jala laos nasida do pamimpin ni punguan ni marribu halak Israel.+ 15 Dung i pajuppang ma nasida dohot marga Ruben, marga Gad, dohot satonga sian marga Manasse di Gilead. Didok ma,

16 “Songon on do hata ni sude naposo ni Jahowa, ‘Boasa dang setia+ hamu tu Debata ni Israel? Saonari, dang dioloi hamu be Jahowa. Nungnga dipajongjong hamu langgatan di hamu sandiri jala nungnga mangalo hamu tu Jahowa.+ 17 Na so sae dope sitaonon na tahilala alani hajahatonta di Peor? Susa dope hita sahat tu saonari alani i. Hape nungnga diparo Jahowa sahit tu hita sude.+ 18 Jala saonari, naeng tadikkononmuna do Jahowa? Molo dialo hamu do Jahowa sadari on, marsogot muruk nama Ibana tu sude halak Israel.+ 19 Molo ala na so badia do tanomuna umbahen dipajongjong hamu langgatan i, menyeberang ma hamu tu tano ni Jahowa.+ Ai disi do inganan ni tabernakel ni Jahowa.+ Jala rap tinggal ma hita. Alai unang ma alo hamu Jahowa. Unang ma bahen hamu gabe dohot hami mangalo Ibana, ala dipajongjong hamu langgatan na asing. Hape nungnga adong langgatan ni Jahowa Debatanta.+ 20 Na so diingot hamu do si Agan+ anak ni si Jara na so setia i? Ditakko ibana do akka barang na ikkon situtungon, jala gabe muruk do Debata tu sude bangso Israel alani i.+ Jala dang holan ibana na mate alani pangalahona i.’”+

21 Dung i dialusi marga Ruben, marga Gad, dohot satonga sian marga Manasse ma akka pamimpin ni punguan ni marribu halak Israel.+ 22 Didok ma, “Jahowa do Debata na untimbo sian sude debata na asing!* Jahowa do Debata na untimbo sian sude debata na asing!+ Diboto Debata do boasa dipajongjong hami langgatan i jala ikkon botoonmuna do i. Molo mangalo do hami tu Jahowa jala dang setia tu Ibana, pamate ma hami sadari on. 23 Molo hupajongjong hami langgatan on lao mangalo Jahowa, sai dihukum ma hami. Jala molo hupajongjong hami do langgatan on lao mangalehon pelean situtungon, pelean sipanganon,* dohot pelean pardamean,* lok ma dihukum Jahowa hami.+ 24 Alai, dang na mangalo Debata hami. Hupajongjong hami pe langgatan i, na mabiar do hami dohonon ni pinopparmuna tu pinopparnami haduan, ‘Dang marhak hamu manomba Jahowa Debata ni Israel rap dohot hami. 25 Ai nungnga dibahen Jahowa Sunge Jordan gabe parbatasannami tu marga Ruben dohot marga Gad. Dang marhak hamu manomba Jahowa.’ Alani i, dang paloason ni pinopparmuna be pinopparnami manomba* Jahowa.

26 “Jadi, didok rohanami ikkon pajongjongonnami do sada langgatan. Alai, dang dipakke hami langgatan i lao mangalehon pelean situtungon manang pelean na asing. 27 Holan gabe tanda do on di hamu dohot di hami+ dohot tu akka pinopparta. Tanda on patuduhon na marhak do hami toktong manomba Jahowa marhite mangalehon pelean situtungon, pelean pardamean,+ dohot pelean na asing. Alani i, dang dokkonon ni pinopparmuna be tu pinopparnami haduan, ‘Dang marhak hamu manomba Jahowa.’ 28 Alai molo didok akka pinopparmuna do songon i tu hami dohot tu pinopparnami haduan, dohononnami ma, ‘Ida hamu ma langgatan ni Jahowa na pinajongjong ni akka ompunami. Pas do i songon langgatanmuna. Alai dang hupakke hami langgatan i mangalehon pelean situtungon dohot pelean na asing. Holan gabe tanda do i tu hamu dohot tu hami.’ 29 Dang hea ro tu pikkirannami lao mangalo Jahowa jala manadikkon Jahowa.+ Jala dang hea ro tu pikkirannami pajongjokkon langgatan lao inganan mangalehon pelean situtungon, pelean sipanganon, dohot pelean na asing. Ai nungnga adong langgatan ni Jahowa Debatanta di jolo ni tabernakel!”+

30 Dung dibege Malim Pinehas dohot akka pamimpin* na rap dohot ibana i hata ni pinoppar ni marga Ruben, marga Gad, dohot marga Manasse, gabe las ma roha ni nasida.+ 31 Dung i, didok si Pinehas anak ni Malim Eleasar ma tu pinoppar ni marga Ruben, marga Gad, dohot marga Manasse, “Saonari, huboto hami ma na didongani Jahowa do hita toktong. Jala dang na lao mangalo Jahowa hamu pajongjokkon langgatan on. Saonari nungnga dipalua hamu bangso Israel sian rimas ni Jahowa.”

32 Dung i, ditadikkon si Pinehas, anak ni Malim Eleasar dohot akka pamimpin i ma marga Ruben dohot marga Gad di Gilead. Mulak ma nasida tu tano Kanaan jala dipaboa ma na masa i tu halak Israel na asing. 33 Massai las ma roha ni halak Israel mambege i. Dipuji nasida ma Debata. Jala dang ditaringoti nasida be lao marporang manaluhon inganan ni marga Ruben dohot marga Gad.

34 Dung i dibahen marga Ruben dohot marga Gad ma goar ni langgatan i.* Ai didok nasida do, “On ma gabe tanda di hita, Jahowa do Debata na sittong.”