Surat na Patoluhon sian si Johannes
1 Sian sintua.* Mandapotton si Gayus na massai huhaholongi.
2 Ale dongan na huhaholongi, hutangiakkon do asa sai sehat ho jala toktong denggan ngolum songon saonari. 3 Ai las situtu do rohakku tikki ro akka dongan jala dipaboa nasida na hot do ho di hasittongan jala diihutton ho do hasittongan i.+ 4 Dang adong be las ni rohakku na umbalga sian na mambege akka anakkokku mangihutton hasittongan.+
5 Ale dongan na huhaholongi, sian ulaon na dibahen ho tu akka dongan tarida do na setia ho, nang pe dang ditanda ho nasida.+ 6 Dipaboa nasida do taringot tu holong ni roham di jolo ni huria. Denggan ma paborhat nasida jala urupi ma nasida sesuai tu lomo ni roha ni Debata.*+ 7 Ai alani goar ni Debata do nasida borhat, dang adong dijalo nasida manang aha+ sian akka bangso na asing. 8 Ikkon burju do hita manjalo nasida,+ asa rap saulaon hita di hasittongan i.+
9 Hubahen do surat tu huria, alai anggo si Diotrepes, na patimbohon dirina di tonga-tongamuna,+ dang dipardulihon ibana hatanami.+ 10 Alani i molo dung ro au, paboaokku ma akka pambahenanna i. Ai didok ibana do hata na so tutu* taringot tu hami.+ Asing ni i, dang olo ibana manjalo akka dongan na ro.+ Molo adong dongan na manjalo nasida, diorai ibana do donganta i jala dipakaluar sian huria.
11 Ale dongan na huhaholongi, unang ma tiru na jahat alai tiru ma na denggan.+ Manang ise na mangulahon na denggan, sian Debata+ do i. Alai manang ise na mangulahon na jahat, dang ditanda ibana Debata.+ 12 Sude do akka dongan makkatahon na denggan taringot tu si Demetrius jala diihutton ibana do hasittongan di ngoluna. Hami pe, huboto hami do na denggan ibana. Jala diboto ho do, sittong do hatanami i.
13 Godang do nian na naeng husurat tu ho, alai dang bahenokku i marhite pulpen dohot tinta. 14 Lomo do rohakku hatop pajuppang dohot ho, disi ma hita makkatai.
Dame ma di ho.
Sahat ma tabe ni akka dongan tu ho. Pasahat ma tabekku tu akka dongan ganup marsada-sada.