1 Samuel
15 Dung i, didok si Samuel ma tu si Saul, “Nungnga disuru Jahowa asa hupillit* ho gabe raja lao mamaretta bangsona Israel.+ Saonari, tangihon ma na nidok ni Jahowa.+ 2 Songon on ma hata ni Jahowa Pamimpin ni Akka Tentara,* ‘Pangidookku ma tu halak Amalek asa martanggung jawab nasida, ai disusai nasida do halak Israel tikki kaluar sian Mesir.+ 3 Saonari lao ma ho, pamate ma halak Amalek.+ Pamate ma nasida sude+ jala tutung ma sude arta ni nasida. Unang ma pasombu nanggo sahalak pe mangolu.* Ikkon pamateonmu do nasida,+ bawa nang borua, dakdanak nang poso-poso, lombu jattan nang biru-biru, unta nang halode ni nasida.’”+ 4 Dipapungu si Saul ma akka tentara jala dietong ma godang ni nasida di Telem. Adong ma 200.000 tentara na mardalan pat jala 10.000 tentara na sian marga Juda.+
5 Borhat ma si Saul dohot akka tentarana, jala sahat ma nasida di kota ni halak Amalek. Martabuni ma nasida di rura* lao mangalo halak Amalek. 6 Dung i didok si Saul ma tu halak Keni,+ “Lao ma hamu sian tonga-tonga ni halak Amalek, asa unang dohot hamu hupamate rap dohot nasida.+ Ai dipatuduhon hamu do holong ni roha* tu halak Israel+ tikki kaluar nasida sian Mesir.” Alani i, lao ma halak Keni sian tonga-tonga ni halak Amalek. 7 Dipamate si Saul ma halak Amalek,+ mulai sian Hevila+ sahat tu Sur+ na jonok tu Mesir. 8 Ditakkup ibana ma si Agag+ raja ni halak Amalek jala dang dipamate. Alai dipamate ibana do sude halak Amalek mamakke podang.+ 9 Dang dipamate si Saul dohot akka tentarana* si Agag. Dang dipamate nasida akka hambing dohot lombu na dumenggan, akka binatang na mokmok, biru-biru jantan, dohot sude na denggan.+ Dang olo nasida pamatehon i. Alai dipamate nasida do sude na so denggan dohot na so dihalomohon nasida.
10 Alani i, didok Jahowa ma tu si Samuel, 11 “Manolsoli do Au* ala hupillit si Saul gabe raja. Ai nungnga ditadikkon ibana Au jala dang dioloi ibana be hatakku.”+ Gabe marsak situtu ma si Samuel jala martangiang ma ibana tu Jahowa saborngin manipat.+ 12 Tibu ma si Samuel dungo manogotna i lao manjuppangi si Saul. Alai adong ma halak mandok tu si Samuel, “Nungnga lao si Saul tu Karmel,+ jala dipajongjong ibana do disi sada tugu lao pasangappon dirina.+ Dung i, lao do ibana tu Gilgal.” 13 Dung pajuppang si Samuel dohot si Saul, didok si Saul ma, “Sai dipasu-pasu Jahowa ma ho. Nungnga huoloi be sude hata ni Jahowa.” 14 Alai didok si Samuel ma, “Attong, boasa hubege soara ni hambing, biru-biru, dohot soara ni lombu?”+ 15 Didok si Saul ma, “Na diboan nasida do i sian halak Amalek. Ai dang dipamate nasida* akka hambing, biru-biru, dohot lombu na dumenggan, asa boi dipelehon tu Jahowa Debatam. Alai na asing nungnga hupamate hami.” 16 Didok si Samuel ma tu si Saul, “Nga sae be i! Paboaokku ma tu ho songon dia hata ni Jahowa tu au na bodari.”+ Didok si Saul ma, “Paboa ma!”
17 Didok si Samuel ma, “Najolo, tikki dibahen ho gabe pamimpin ni halak Israel jala tikki dipillit* Jahowa ho gabe raja ni halak Israel,+ so arga dirim dihilala ho.+ 18 Dung i, disuru Jahowa do ho mangulahon sada tugas jala ninna do, ‘Lao ma ho pamatehon halak Amalek na mardosa i.+ Marporang ma ho mangalo nasida sahat tu na mate nasida sude.’+ 19 Alai boasa ma dang dioloi ho hata ni Jahowa? Dipambuati ho do arta ni nasida+ jala diulahon ho do na jahat di jolo ni Jahowa!”
20 Didok si Saul ma tu si Samuel, “Alai nungnga huulahon hata ni Jahowa! Lao do au mangulahon tugas na nilehon ni Jahowa, hutakkup do si Agag raja ni halak Amalek, jala hupamate do sude halak Amalek.+ 21 Akka tentara i do na mambuat biru-biru dohot lombu na dumenggan na ikkon pamateon hian, asa adong dipelehon tu Jahowa Debatam di Gilgal.”+
22 Didok si Samuel ma, “Dia do unlomo roha ni Jahowa? Talehon pelean+ situtungon manang taoloi hata ni Jahowa? Dumenggan do mangoloi sian mangalehon pelean,+ jala dumenggan do manangihon sian mamelehon tabo-tabo+ ni biru-biru jantan. 23 Dos do dosa ni na mangalo+ tu na mangaramal.+ Jala dos do dosa ni siginjang roha tu na mamakke ilmu sihir dohot tu na manomba patung.* Ala dang olo ho mangoloi paretta ni Jahowa,+ dang olo be Ibana mambahen ho toktong gabe raja.”+
24 Didok si Saul ma tu si Samuel, “Nungnga mardosa au, nungnga hualo paretta ni Jahowa dohot hatam. Ala mabiar do au tu halak on gabe hutangihon nasida. 25 Saonari, salpuhon ma dosakki, rap mulak ma hita asa marsomba au tu Jahowa.”+ 26 Alai didok si Samuel ma tu si Saul, “Dang olo au rap mulak dohot ho. Ai dang olo ho mangoloi paretta ni Jahowa, jala dang olo be Jahowa mambahen ho toktong gabe raja ni halak Israel.”+ 27 Tikki naeng mulak si Samuel, ditiop si Saul ma ujung ni rompi ni si Samuel na ganjang i, jala gabe maribak ma i. 28 Didok si Samuel ma tu ibana, “Songon on ma na lao masa tu ho, buaton* ni Jahowa ma sian ho hak lao mamaretta halak Israel. Jala lehononna ma i tu halak na dumenggan sian ho.+ 29 Dang olo Namulia ni Israel+ margabus+ manang muba-uba* rohana, ai dang songon jolma Ibana na boi muba-uba* rohana.”+
30 Didok si Saul ma, “Nungnga mardosa au. Alai, pasangap ma au di jolo ni akka pangituai* ni bangsokku dohot di jolo ni halak Israel. Jala rap mulak ma hita asa marsomba au tu Jahowa Debatam.”+ 31 Alani i, rap mulak ma si Samuel dohot si Saul. Jala marsomba ma si Saul tu Jahowa. 32 Dung i, didok si Samuel ma, “Boan ma tuson si Agag raja ni halak Amalek.” Ro ma si Agag jala mabiar do ibana.* Ai didok rohana hian do, ‘Dang pamateonna au.’ 33 Alai didok si Samuel ma, “Songon ina-ina na lungun rohana ala dipamate ho gellengna mamakke podang, songon i ma bahenokku tu omakmu. Bahenokku ma ullungun roha ni omakmu sian akka ina-ina na so marianakkon.” Dung i diseati si Samuel ma si Agag di jolo ni Jahowa di Gilgal.+
34 Mulak ma si Samuel tu Rama jala mulak ma si Saul tu jabuna di Gibea. 35 Marsak do si Samuel mamikkiri si Saul.+ Dang hea be pajuppang si Samuel dohot si Saul sahat tu na mate ibana. Jala Jahowa pe manolsoli do ala dibahen Ibana si Saul gabe raja ni halak Israel.+