1 Samuel

5 Dung dibuat halak Palistim poti parpadanan+ ni Debata na sittong i, diboan nasida ma i sian luat Ebeneser tu kota Asdod. 2 Diboan halak Palistim ma poti parpadanan ni Debata na sittong i tu inganan ni akka halak manomba* Dagon, debata ni nasida. Jala dipeakkon nasida ma poti parpadanan i di labbung ni Dagon i.+ 3 Marsogotna i, tikki dungo halak Asdod, diida nasida ma nungnga tukkap tu tano Dagon i di jolo ni poti parpadanan ni Jahowa.+ Gabe diangkat nasida ma Dagon i jala dibahen ma muse tu ingananna.+ 4 Tikki dungo nasida muse marsogotna i, diida nasida ma nungnga tukkap Dagon i tu tano di jolo ni poti parpadanan ni Jahowa. Nungnga ponggol uluna dohot dua tanganna, jala peak do i di labbung ni pintu ni inganan i. Holan badanna na songon dekke* i nama na tinggal. 5 Alani i, sahat tu sadari on, dang olo akka malim ni Dagon mandege labbung ni pintu ni inganan ni Dagon na di Asdod i. Dohot do sude halak na masuk tu inganan i dang olo mandege i. Ai disi do inganan ni Dagon i madabu.

6 Borat ma dihukum Jahowa halak Asdod. Marsahit ambeien+ ma dibahen Ibana halak Asdod dohot sude halak na di sakalilingna. 7 Dung diboto halak Asdod na masa, didok nasida ma, “Unang be tapasombu poti parpadanan ni Debata ni Israel di labbungta. Ai borat do dihukum Ibana hita dohot Dagon debatanta i.” 8 Dung i dijou halak Asdod ma asa marpungu sude pamimpin ni halak Palistim. Didok ma tu nasida, “Songon dia nama bahenotta tu poti parpadanan ni Debata ni Israel on?” Dialusi akka pamimpin i ma, “Papinda ma i tu kota Gat.”+ Alani i, dipapinda nasida ma poti parpadanan i tusi.

9 Dung dipapinda nasida poti parpadanan i tu kota Gat, dihukum Jahowa ma pangisi ni kota i. Dibahen Ibana do nasida marsahit ambeien, mulai sian dakdanak sahat tu na magodang.+ Gabe gaor situtu ma sude pangisi ni kota i. 10 Alani i, dipapinda nasida ma poti parpadanan ni Debata na sittong tu kota Ekron.+ Disi sahat poti parpadanan ni Debata na sittong i, gogo ma didok halak Ekron, “Nungnga diboan nasida poti parpadanan ni Debata ni Israel tuson lao pamatehon hita dohot bangsotta!”+ 11 Dijou nasida ma sude pamimpin ni halak Palistim asa marpungu. Didok nasida ma, “Boan hamu ma sian on poti parpadanan ni Debata ni Israel i. Paulak ma i tu halak Israel, asa unang mate hita dohot sude bangsotta.” Mabiar do sude pangisi ni kota i dipamate. Ai massai borat do nasida dihukum Debata na sittong.+ 12 Jala dibahen Ibana do marsahit ambeien sude halak na mangolu dope. Gabe mangangguki ma sude pangisi ni kota i jala tarbege ma soara ni nasida sahat tu langit.