Ulaon ni Apostel

23 Dibereng si Paulus ma doppak Sanhedrin* i jala didok ma, “Hamu akka haha anggikku,* sahat tu sadari on, ias do panggora ni rohakku+ tikki mangulahon sude ulaonku di jolo ni Debata.” 2 Mambege i, disuru Sintua ni Malim Ananias ma halak na jongjong di labbung ni si Paulus i mamastappon pamanganna. 3 Dung i didok si Paulus ma tu ibana, “Pastapon ni Debata ma ho, e halak na munafik!* Hundul do ho nuaeng mangadili au mamakke Patik i. Alai boasa gabe dilanggar ho Patik i? Ai disuru ho do halak mamastap au.” 4 Didok halak na jongjong di labbungna i ma, “Na dileai ho do sintua ni malim ni Debata?” 5 Didok si Paulus ma, “Hamu akka haha anggikku, dang huboto na sintua ni malim ibana. Ai tarsurat do, ‘Unang ma leai pamimpin ni bangsomuna.’”+

6 Diboto si Paulus do molo anggota ni Sanhedrin i deba halak Saduse jala deba nai halak Parise. Alani i, gogo ma didok ibana, “Hamu akka haha anggikku, halak Parise+ do au jala halak Parise do akka ompukku. Alai diadili do au saonari, ala porsea au na boi mulak mangolu halak naung mate.” 7 Dung didok ibana songon i, gabe marbada ma halak Parise dohot halak Saduse i jala tarbagi dua ma nasida. 8 Ai didok halak Saduse do, dang tutu boi mulak mangolu halak naung mate, jala dang adong suru-suruan,* alai halak Parise mandok adong do i sude.+ 9 Gabe gaor ma na pungu i. Jongjong ma piga-piga siboto surat* sian punguan ni Parise. Muruk ma nasida jala ninna ma, “Dang adong dapotnami na sala dibahen ibana. Na adong do ra suru-suruan* makkatai tu ibana.”+ 10 Gabe lam balga ma parbadaan i. Alani i mabiar ma komandan ni tentara i, so tung dipamate nasida si Paulus. Disuru ibana ma turun akka tentarana manarik si Paulus sian tonga-tonga ni akka jolma i. Dung i diboan ma ibana tu markas ni nasida.

11 Alai bornginna i, jongjong ma Tuan di labbung ni si Paulus, ninna ma, “Unang ho mabiar!+ Ai ikkon paboaonmu dope taringot tu au di Rom songon naung dipaboa ho di Jerusalem.”+

12 Marsogotna i, dibahen halak Jahudi ma rencana lao mambunu si Paulus. Marsumpa ma nasida na so jadi mangan manang minum saleleng so dibunu nasida si Paulus. 13 Lobi sian 40 halak ma na marsumpa i. 14 Lao ma nasida mandapotton malim kepala* dohot akka pangituai.* Didok nasida ma, “Nungnga marsumpa hami na so jadi allangonnami manang aha saleleng so hubunu hami si Paulus. 15 Saonari, rap ma hamu lao dohot anggota ni Sanhedrin mandapotton komandan ni tentara i. Pangido hamu ma tu ibana asa diboan muse si Paulus tu jolomuna. Bahen hamu ma sada alasan asa songon na naeng dipareso hamu muse parkarona i. Alai andorang so sahat ibana tuson, pamateonnami ma ibana.”

16 Dibege bere ni si Paulus ma rencana ni nasida i. Lao ma ibana tu markas ni tentara jala dipaboa ma i tu si Paulus. 17 Dijou si Paulus ma sahalak perwira ni tentara i, ninna ma, “Boan ma jo doli-doli on tu komandan i, ai adong naeng paboaonna tu ibana.” 18 Dung i diboan perwira i ma doli-doli i tu komandan i, jala didok ma, “Na dijou si Paulus na tarhurung i do au jala dipangido asa huboan doli-doli on tu ho, ala adong sipaboaonna tu ho.” 19 Ditiop komandan i ma tangan ni doli-doli i, ditogihon ma ibana lao asa makkatai nasida na dua. Didok komandan i ma, “Aha do na lao paboaonmu tu au?” 20 Didok doli-doli i ma, “Nungnga sahata halak Jahudi lao mangido tu ho asa boanonmu si Paulus tu jolo ni Sanhedrin marsogot. Bahenon ni nasida ma sada alasan asa songon na naeng dipareso muse parsoalanna i.+ 21 Alai unang ma oloi pangidoan ni nasida, ai adong do lobi sian 40 halak na martabuni lao manakkup ibana. Nungnga marsumpa nasida, na so jadi mangan manang minum saleleng so dibunu nasida si Paulus.+ Jala nungnga diparade nasida sudena i, holan paimahon alusmu nama.” 22 Didok komandan ni tentara i ma tu ibana, “Unang paboa manang tu ise pe naung dipaboa ho tu au taringot i.” Dung i disuru ma ibana mulak.

23 Dung i dijou komandan i ma dua halak perwira, ninna ma, “Parade ma 200 tentara lao mardalan pat sahat tu Kaesarea, 70 tentara na hundul di hoda, jala 200 tentara na mamboan tombak.* Suru ma nasida borhat jam sia* borngin on. 24 Parade hamu ma muse hoda di si Paulus jala jaga hamu ma ibana asa selamat sahat tu gubernur Feliks.” 25 Dung i dibahen komandan i ma surat na mandok songon on,

26 “Sian si Klaudius Lisias tu gubernur Feliks na pinarsangapan: Horas! 27 Ditakkup halak Jahudi do bawa on jala nungnga naeng dipamate nasida ibana. Alai hatop ma au ro dohot tentarakku paluahon ibana.+ Ai hubege, warga negara Rom do ibana.+ 28 Huboan do ibana tu jolo ni Sanhedrin+ ni nasida, asa huboto alani aha dibahen nasida songon i tu ibana. 29 Gabe huboto ma, alani parsoalan taringot tu Patik ni halak Jahudi do umbahen na dialuhon nasida ibana.+ Dang adong diulahon ibana manang aha na mambahen ibana patut dipamate manang dipenjarahon. 30 Alai dipaboa ma tu au, adong na mambahen rencana na jahat tu ibana.+ Gabe husuru ma ibana diboan tu ho jala hudok ma tu na mangaluhon i asa diboan nasida parsoalan on tu jolom.”

31 Diulahon akka tentara i ma paretta i, diboan nasida ma si Paulus+ borngin i tu Antipatris. 32 Marsogotna i, ditorusson akka tentara na hundul di hoda i ma pardalanan ni nasida rap dohot si Paulus, alai mulak ma akka tentara na asing tu markas ni nasida. 33 Sahat ma tentara na hundul di hoda i di Kaesarea. Dipasahat nasida ma surat i tu gubernur, laos dipasahat ma nang si Paulus tu ibana. 34 Dijaha gubernur i ma surat i, dung i disukkun ma tu si Paulus manang na sian provinsi dia ibana. Gabe diboto ma na sian Kilikia+ do si Paulus. 35 Didok gubernur i ma, “Molo dung sahat akka na mangaluhon ho i tuson,+ denggan pe hupareso parsoalanmon.” Dung i disuru gubernur i ma asa ditahan si Paulus di istana ni si Herodes.