2 Samuel
5 Di pudian ni ari ro ma sude halak na sian marga ni Israel mandapotton si Daud di Hebron.+ Didok nasida ma, “Na marhaha maranggi do hita.*+ 2 Tikki mamaretta dope si Saul gabe rajanami, ho do na mamimpin halak Israel marporang.+ Jala didok Jahowa do tu ho, ‘Ho ma na gabe parmahan ni bangsokku Israel, jala ho ma na mamimpin nasida.’”+ 3 Ro ma sude pangituai* ni halak Israel mandapotton raja i di Hebron. Jala di jolo ni Jahowa dibahen Raja Daud ma sada parjanjian tu nasida+ di Hebron. Dukkon i dilantik* nasida ma si Daud gabe raja ni saluhut Israel.+
4 Marumur 30 taon ma si Daud tikki gabe raja, jala saleleng 40 taon ma ibana mamaretta.+ 5 Saleleng pitu satonga taon ma ibana mamaretta Juda di Hebron, jala saleleng 33 taon ma ibana mamaretta saluhut Israel dohot Juda di Jerusalem.+ 6 Ro ma raja dohot akka tentarana tu Jerusalem lao marporang mangalo halak Jebus+ na tinggal di luat i. Alai direhe-rehei nasida ma si Daud, didok ma, “Dang tolap ho masuk tuson! Haru na mapitung dohot na pakpang pe boi do mangusir ho.” Ai didok nasida do di bagasan rohana, ‘Dia ma boi si Daud masuk tuson.’+ 7 Alai ditaluhon si Daud ma kota Sion na marbenteng i. Jala saonari dibahen ma goarna Kota ni si Daud.+ 8 Di ari i, didok si Daud ma, “Sian lubang dalan ni aek* i ma hamu masuk lao manaluhon halak Jebus. Pamate hamu ma akka na ‘pakpang dohot na mapitung’, ai sogo do rohakku tu nasida!” Alani i ma didok, “Dang pamasukon na mapitung dohot na pakpang tu jabu i.” 9 Dung i tinggal ma si Daud di kota na marbenteng i, jala digoari* ma i Kota ni si Daud. Dipajongjong si Daud ma tembok dohot bangunan na asing di benteng na sian tano*+ dohot di inganan na asing di kota i.+ 10 Gabe lam marhuaso ma si Daud+ jala didongani Debata Jahowa Pamimpin ni Akka Tentara* i do ibana.+
11 Disuru Raja Hiram+ na sian Tirus ma halak mandapotton si Daud. Dilehon ibana do muse hau ares,+ akka tukkang hau, dohot akka parkarejo na malo pajongjokkon tembok. Dung i dipajongjong nasida ma istana ni si Daud.+ 12 Gabe diboto si Daud ma naung hot ibana dibahen Jahowa gabe raja ni halak Israel.+ Jala diboto ibana ma, Debata do na mambahen lam marhuaso harajaonna+ lao mangurupi bangso Israel.+
13 Dung i, pinda ma si Daud sian Hebron tu Jerusalem. Lam godang ma dibuat ibana akka borua na di Jerusalem gabe gundikna+ dohot istrina. Gabe lam godang ma anakna dohot boruna.+ 14 On ma goar ni akka gellengna na tubu di Jerusalem: si Samua, si Sobab, si Natan,+ si Salomo,+ 15 si Ibar, si Elisua, si Nepeg, si Japia, 16 si Elisama, si Eliada, dohot si Elipelet.
17 Dung dibege halak Palistim naung tarpillit* si Daud gabe raja ni halak Israel,+ sude ma halak Palistim ro mangalului si Daud.+ Dung dibege si Daud i, lao ma ibana tu inganan partabunian.+ 18 Sahat ma halak Palistim di Rura Repaim+ jala marserak ma nasida di rura i. 19 Disukkun si Daud ma tu Jahowa,+ “Lao do au mangalo halak Palistim? Pasahatonmu do nasida tu au?” Dialusi Jahowa ma, “Lao ma ho. Ai pasahatonku do halak Palistim tu ho.”+ 20 Lao ma si Daud tu Baal-perazim, jala ditaluhon ibana ma halak Palistim disi. Didok ibana ma, “Ditaluhon Jahowa do akka musukku+ di jolokku songon tembok na maruppak alani aek.” Alani i ma digoari ibana inganan i Baal-perazim.*+ 21 Ditinggalhon halak Palistim do disi akka patung na disomba nasida. Gabe diboan* si Daud dohot akka tentarana ma akka patung i.
22 Di pudian ni ari, ro ma muse halak Palistim tu Rura Repaim jala marserak ma nasida di rura i.+ 23 Disukkun si Daud ma muse Jahowa. Alai didok Debata ma, “Unang ma maju ho. Alai mamutar ma ho sian pudi ni nasida jala taluhon ma nasida di jolo ni ramba* na marsuga i. 24 Molo dibege ho soara sian ginjang ni ramba na marsuga i songon soara ni halak na marbaris, pittor alo ma nasida. Ai nungnga mardalan Jahowa di jolomuna lao manaluhon tentara ni halak Palistim.” 25 Dibahen si Daud ma songon na nidok ni Jahowa i, jala ditaluhon ibana ma halak Palistim+ mulai sian Geba+ sahat tu Gezer.+