2 Samuel

4 Mabiar situtu ma si Isboset+ anak ni si Saul i dung dibege ibana naung tarbunu si Abner di Hebron.+ Jala gaor ma sude halak Israel. 2 Adong do dua halak pamimpin ni akka pangarampok ni si Isboset. Na sada goarna si Baana jala na sada nai goarna si Rekab. Akka anak ni si Rimmon halak Beerot na sian marga Benjamin do nasida na dua. (Najolo, huta ni marga Benjamin do huta Beerot.+ 3 Na lari do halak Beerot tu Gitaim.+ Jala disi ma nasida gabe panoppang sahat tu sadari on.)

4 Adong ma anak ni si Jonatan+ na margoar si Mepiboset.+ Tikki marumur lima taon ibana, ro ma halak sian Jisreel+ paboahon kabar ni si Saul dohot si Jonatan. Tikki i, diabing parorotna do ibana. Ala tarsonggot parorotna i, gabe madabu ma si Mepiboset. Ujungna, gabe pakpang ma patna duassa.+

5 Di sada tikki, lao ma si Rekab dohot si Baana anak ni si Rimmon halak Beerot i tu jabu ni si Isboset. Tikki i, las do ari jala modom do si Isboset dapot ni nasida. 6 Masuk ma si Rekab dohot si Baana+ tu jabu i hira naeng mambuat gandum. Alai ditikkam nasida ma butuha ni si Isboset. Dung i, lari ma nasida. 7 Tikki na masuk i nasida tu jabu i, diida nasida do modom si Isboset di kamarna. Dipamate nasida ma ibana jala diponggol ma uluna. Dung i, dibuat nasida ma uluna i jala diboan tu Araba. Saborngin manipat do nasida mardalan tusi. 8 Diboan nasida ma ulu ni si Isboset i+ tu si Daud di Hebron. Didok nasida ma, “On ma ulu ni si Isboset anak ni si Saul, musu ni tuan+ na sai naeng mambunu ho.+ Sadari on, nungnga dipaloas Jahowa be ho mambalosson pambahenan ni si Saul dohot akka pinopparna.”

9 Alai didok si Daud ma tu si Rekab dohot tu si Baana akka anak ni si Rimmon halak Beerot i, “Songon pastina Jahowa mangolu,* na paluahon au sian sude hasusaan,+ 10 tikki adong halak na paboahon tu au, ‘Nungnga mate si Saul,’+ dirippu ibana do barita na denggan na pinaboana i. Alai, hupamate do ibana+ di Ziklag. On ma upa sian au tu halak na mamboan barita i! 11 Lam halak parjahat na songon hamu ma! Dipamate hamu do halak na so marsala tikki modom di jabuna! Ikkon hukumokku do hamu ala nungnga dipamate hamu ibana.*+ Jala ikkon pasudaokku do hamu sian tano on!” 12 Dung i, disuru si Daud ma tentarana pamatehon nasida.+ Diponggol ma tangan dohot pat ni nasida, jala digattukkon ma bakkena+ di kolam paridian na di Hebron. Alai, diboan tentara ni si Daud ma ulu ni si Isboset i, jala dikuburhon di kuburan ni si Abner na di Hebron.