Ulaon ni Apostel

2 Tikki Perayaan Pentakosta,+ marpungu ma sude sisean i di sada inganan. 2 Tikki hundul nasida sude, toppu ma tarbege soara sian langit songon soara ni alogo na gogo. Gok ma soara i di jabu i.+ 3 Dung i, diida nasida ma ro na songon dila ni api. Marserak ma api i tu atas ni ulu ni nasida sude. 4 Digohi tondi parbadia+ ma nasida sude jala mulai ma nasida makkatai di bahasa na asing, sesuai tu tudu-tudu na dilehon tondi parbadia i tu nasida.+

5 Di tikki i, godang do halak Jahudi na ro tu Jerusalem.+ Nasida ro sian sude bangso jala mabiar do nasida tu Debata. 6 Alai tikki tarbege soara i, longang ma akka jolma i jala pittor marpungu ma nasida. Tarsonggot do nasida mambege akka sisean i ala boi makkatai di bagasan bahasa ni nasida. 7 Longang ma nasida sude, ninna ma, “Ai halak Galilea+ do kan sude na makkatai i? 8 Alai boasa boi tabege bahasa na dipakke di hutatta be?* 9 Halak Partia do hita, halak Media,+ halak Elamit,+ penduduk ni Mesopotamia, sian Judea, sian Kappadosia, sian Pontus dohot sian Provinsi Asia,+ 10 sian Prigia dohot sian Pampilia, sian Mesir, dohot sian akka luat ni Libia na jonok tu Kirene. Adong do muse sian hita halak Rom na manoppang dison, halak Jahudi dohot akka halak na mangihutton agama Jahudi,*+ 11 halak Kreta, dohot halak Arab. Hape tabege do nasida boi makkatai taringot tu ulaon ni Debata na balga di bahasatta be.” 12 Gabe longang ma nasida sude, jala didok nasida ma, “Aha do lapatan ni na masa on?” 13 Alai nang pe songon i, adong do na mangarehei nasida. Didok do, “Na mabuk do nasida.”

14 Alai jongjong ma si Petrus rap dohot akka apostel na 11 i,+ gogo ma didok tu nasida, ninna ma, “Hamu halak Judea dohot sude halak na maringanan di Jerusalem, manat ma parrohahon hamu hatakkon. 15 Dang na mabuk akka halak on songon hatamuna i, ai jam sia manogot* dope nuaeng. 16 Alai hea do didok Panurirang* Joel, 17 ‘“Di akka ari parpudi,” didok Debata, “Usehonokku ma deba tondi parbadiakku tu sude jolma na ro sian marragam bangso. Gabe dohot ma akka anak dohot borumuna paboahon janjikku. Mandapot parnidaaan ma akka doli-doli.+ Jala mandapot nipi ma akka halak naung matua. 18 Gari tu akka hatobanku bawa dohot tu hatobanku borua pe, usehonokku do deba tondi parbadiakku di ari i jala paboaon ni nasida ma hata ni Debata.+ 19 Bahenokku ma akka tanda halongangan* di langit dohot di tano on. Adong ma disi mudar, api, dohot timus na hapal. 20 Gabe holom ma mataniari, jala marrara ma bulan songon mudar. Masa ma i andorang so ro dope ari ni Jahowa* na balga i jala na marmulia. 21 Jala malua do ganup halak na manjou goar ni Debata, i ma Jahowa.”’*+

22 “Hamu halak Israel, tangihon hamu ma hata on: Na sinuru ni Debata do Jesus halak Nasaret i. Takkas do i tarida marhite akka tanda halongangan na binahen ni Debata marhite-hite ibana di tonga-tongamuna,+ songon naung diboto hamu. 23 Nungnga dipasahat hamu ibana tu pardosa asa dipakkuhon tu sada tiang. Jala dibunu hamu do ibana. Ai sesuai do i tu na ditottuhon Debata, jala nungnga diboto Debata+ hian na lao masa songon i tu ibana.+ 24 Alai dipahehe Debata do ibana,+ dipalua do ibana sian hamatean,* ai dang tartiop ni hamatean i ibana.+ 25 Ai didok si Daud do taringot tu ibana, ‘Sai di jolokku* do toktong Jahowa.* Dang ganggu rohakku,* ai jongjong do Ibana di sabola kananku. 26 Alani i ma sonang rohakku, marlas ni roha dilakku, jala marhaposan tu Debata ma au di ngolukku. 27 Ai dang pasombuonmu au di Kuburan* jala dang pasombuonmu busuk naposom na setia.+ 28 Nungnga dipatudu Ho tu au dalan tu hangoluan, jala dibahen* Ho do au marlas ni roha situtu di jolom.’+

29 “Hamu akka dongan, loas hamu ma jo asa takkas hupaboa tu hamu taringot tu omputta si Daud i. Nungnga mate ibana jala dikubur,+ jala adong dope kuburanna dison sahat tu sadari on. 30 Ai panurirang do ibana, jala diboto ibana do naung marsumpa Debata na lao bahenonna hundul sahalak sian pinopparna di tahtana* i.+ 31 Nungnga diboto si Daud hian na lao hehe Kristus i jala dipaboa ibana do taringot i. Didok ibana do, dang pasombuon ni Debata ibana di Kuburan* jala dang loasonna ibana busuk.+ 32 Jesus i ma na dipahehe Debata jala sude do hami mangida i.+ 33 Alani i, ala nungnga dibahen Debata ibana lam sangap di sabola kananna+ jala ala nungnga dijalo ibana tondi parbadia na dijanjihon Ama i,+ diusehon ibana ma i tu hami songon na diida hamu dohot na dibege hamu. 34 Ai dang nakkok si Daud tu surgo alai ibana sandiri na mandok, ‘Didok Jahowa* do tu Tuanku, “Hundul ma ho di sabola kananku, 35 paima hubahen akka musum gabe sidege-degean ni patmu.”’+ 36 Alani i naeng ma takkas diboto sude halak Israel aha na masa tu Jesus naung dipakkuhon hamu tu hau i.+ Anggiat ma pos rohamuna naung dibahen Debata ibana gabe Tuan+ dohot Kristus.”

37 Dung dibege nasida hatana i, gabe marsak ma nasida. Gabe didok nasida ma tu si Petrus dohot tu akka apostel na asing, “Attong aha ma na ikkon bahenonnami akka dongan?” 38 Dialusi si Petrus ma nasida, “Muba ma hamu.+ Ikkon tardidi+ do hamu di bagasan goar ni Jesus Kristus asa disesa dosamuna.+ Dung i jaloonmuna ma silehon-lehon i, i ma tondi parbadia. 39 Ai dilehon do janji i+ tu hamu, tu ianakkonmuna, dohot tu sude halak na di inganan na dao. Dilehon do i tu sude halak na dijou Jahowa* Debatanta i.”+ 40 Jala godang dope didok si Petrus tu nasida asa lam takkas barita na uli na pinaboana i. Dijujui ibana do nasida, ninna do, “Palua ma dirimuna sian sundut na lilu on.”+ 41 Di tikki i, adong do halak na marlas ni roha manjalo hatana i. Ujungna, tardidi ma nasida.+ Di bagasan sadari i, adong ma hira-hira 3.000 halak na tamba gabe sisean.+ 42 Jala toktong ma nasida marsiajar tu akka apostel, rap masipatoguan, rap mangan,+ jala rap martangiang.+

43 Godang ma akka tanda halongangan dibahen akka apostel.+ Jala sude do halak na mangida i gabe pasangappon Debata. 44 Marpungu ma sude akka na porsea i jala olo do nasida mambagi sude arta ni nasida tu akka donganna. 45 Digadis nasida ma akka arta ni nasida.+ Dibagi ma tuhorna i tu sude, sesuai tu na porlu di ganup halak.+ 46 Dos do roha ni nasida asa ro tu bagas joro ganup ari. Rap mangan do nasida di jabu ni nasida jala marbagi sipanganon do nasida di bagasan las ni roha dohot ias ni roha. 47 Dipuji nasida do Debata jala lomo do roha ni sude halak mangida nasida. Ganup ari ma ditambai Jahowa* tu nasida akka halak na lao dipalua.+