Markus

4 Mangajari do muse Jesus di topi ni laut jala torop ma halak ro tusi. Alani i, nangkok ma ibana tu sada parau, dipadao ibana ma saotik sian topi ni laut, alai anggo natorop i tongtong do di topi laut. 2 Godang ma diajarhon ibana tu nasida marhite tudosan, ninna ma, 3 “Tangihon hamu ma, kaluar ma sahalak panabur laho manaburhon boni. 4 Tingki na manabur i ibana, madabu ma deba boni i tu topi dalan, jala ro ma angka pidong mangallang i. 5 Madabu ma deba tu tano na marbatu na so pola godang tanona. Hatop do i tubu ala ndang bagas tano disi. 6 Alai dung lam mohop mata ni ari, malos ma i ala ndang bagas dope uratna. 7 Madabu ma deba boni i tu suga-suga. Dung lam balga suga-suga i, dihapit ma suan-suanan i gabe ndang marparbue. 8 Alai deba nai madabu ma tu tano na denggan. Denggan ma i tubu jala marparbue, adong na 30 hali lompit, 60 hali lompit, jala adong na 100 hali lompit.” 9 Didok ibana ma muse, “Manang ise na marpinggol, dibege ma i.”

10 Tingki pulik sahalak ni Jesus, ro ma deba siseanna dohot apostel na 12 i manungkun ibana taringot tu tudosan i. 11 Didok Jesus ma tu nasida, “Dipaboa do tu hamu rahasia na badia* taringot tu Harajaon ni Debata, alai ianggo tu na asing holan tudosan do. 12 Asa unang mangantusi nasida, nang pe diida na huulahon. Jala asa unang diantusi lapatanna, nang pe dibege na hudok.” 13 Dung i, didok ibana ma muse, “Molo so diantusi hamu do tudosan on, songon dia ma antusanmuna sude tudosan na asing?

14 “Boni na disaburhon, i ma hata ni Debata. 15 Boni na madabu tu topi dalan, i ma angka halak na mambege hata i. Alai ndang sadia leleng dung dibege nasida hata i, ro ma Sibolis jala dibuat ma i sian roha nasida. 16 Songon i ma muse boni na madabu tu tano na marbatu. Dung dibege nasida hata ni Debata, las ma roha nasida manjalo i. 17 Alai ndang marurat boni i di bagasan roha nasida, holan satongkin do i martahan. Tingki ro hasusaan manang sitaonon alani barita i, gabe ndang marhaporseaon be nasida.* 18 Adong do muse boni na madabu di suga-suga, i ma angka halak na mambege hata ni Debata. 19 Alai, alani holso ni roha tu parngoluon di tingki on,* alani holong ni roha tu hamoraon, dohot alani ragam ni sangkap-sangkap ni roha, gabe dihapit ma hata i jala ndang marparbue. 20 Alai na parpudi, boni na madabu di tano na denggan, i ma halak na mambege hata i, dijalo ma hata i gabe marparbue ma 30 hali lompit, 60 hali lompit, dohot 100 hali lompit.”

21 Didok Jesus ma muse, “Ndang bahenon ni halak lampu tu toru ni karanjang* manang tu toru ni podoman, ndang i? Nda bahenonna i nian tu inganan na timbo? 22 Ai ndang adong na buni na so dipapatar, jala ndang adong na hungkup na so dibungka. 23 Manang ise na marpinggol, dibege ma i.”

24 Laos didok Jesus ma tu nasida, “Parrohahon hamu ma na binegemuna. Ai panuhatan na pinangkemuna laho manuhat, i do suhathononna tu hamu. Gariada tambahononna dope tahe gumodang. 25 Ai tu halak na adong di ibana, tambaan do. Alai sian halak na so adong di ibana, buaton do. Gari na di ibana hian pe buaton do.”

26 Dung i, didok Jesus ma muse, “Tudos do Harajaon ni Debata songon halak na manaburhon boni tu tano. 27 Modom do ibana bornginna i jala dungo marsogotna i. Tubu ma boni i jala lam timbo ma martumbur di na so pamotoanna. 28 Tano i sandiri do na mangalehon parbuena sian tingki tu tingki, mulana ro ma tumburna, dung i biurna, ujungna marisi ma biurna i. 29 Alai dung masak parbuena i, pintor disabi ma ai nunga dapot tingkina panen.”

30 Dung i didok Jesus ma muse, “Tudia ma patudosonta Harajaon ni Debata, manang tudosan dia ma na boi patorangkon i? 31 Tudos do i tu boni na gelleng* na ummetmet sian nasa boni di tano on. 32 Alai dung disuan, tubu ma i jala gabe umbalga sian sude sayur. Balga ma dangkana, gabe boi ma marasari jala marlinggom angka pidong na martonga-tonga langit disi.”

33 Dipangke ibana do godang tudosan laho paboahon hata i tu nasida, hombar tu na tolap ni nasida laho mambege. 34 Sasintongna, ndang mangkatai ibana tu nasida molo ndang marhite tudosan. Alai, dipatorang ibana do i sude tingki pulik ibana dohot angka siseanna.

35 Di ari i, dung borngin didok Jesus ma tu nasida, “Laho ma hita tu bariba an.” 36 Dung disuru mulak natorop i, diboan nasida ma Jesus marparau mamangke parau na hinundulanna i jala adong dope angka parau na asing na mangihuthon nasida. 37 Tompu ma ro haba-haba na mansai gogo, ro ma galumbang gabe masuk ma aek tu parau i, sampe naeng gok parau i. 38 Modom do Jesus marbantal tungkan pudi ni parau i. Gabe didungoi nasida ma ibana, ninna ma, “Guru, na so parduli do ho na naeng mate hita?” 39 Dungo ma ibana, disonggak ma alogo i jala didok ma tu laut i, “Hus! So ma!” Dung i, so ma alogo i jala mansai tenang ma. 40 Ninna ma tu nasida, “Boasa mabiar hamu? Tung na so adong do haporseaonmuna?” 41 Gabe mabiar situtu ma nasida, jala ninna ma sama nasida, “Ai ise do ibana sasintongna? Haru alogo dohot laut pe mangoloi do tu ibana.”