Johannes

12 Sahat ma Jesus di Betania huta ni si Lasarus na pinahehe ni Jesus sian na mate onom ari andorang so Paska. 2 Disi diparade nasida ma sipanganon tu Jesus, marhobas do si Marta tu nasida jala dohot do si Lasarus mangan rap dohot ibana. 3 Dung i, dibuat si Maria ma satonga liter miak nardus na angur jala na mansai arga. Diusehon ibana ma i tu pat ni Jesus jala dibahen ma obukna mangapusi. Gabe angur ma sude jabu i. 4 Alai si Judas Iskariot, sahalak sisean ni Jesus na laho manjehehon ibana mandok, 5 “Boasa ndang digadis miak na angur i saarga 300 dinar* jala dilehon tuhorna i tu na pogos?” 6 Didok ibana pe songon i ndang na laho manarihon na pogos, alai ala panangko do ibana. Ibana do na maniop kotak ni hepeng jala jotjot do ditangko ibana hepeng sian i. 7 Dung i didok Jesus ma, “Loas ma ibana, ai na laho paradehon tu ari panguburanku do na binahenna i. 8 Sai na adong do halak na pogos rap dohot hamu, alai ndang sai rap hamu dohot ahu.”

9 Torop do halak Jahudi na mamboto na di Betania Jesus. Dung i ro ma nasida tusi, ndang holan naeng mangida Jesus alai dohot do naeng mangida si Lasarus naung pinahehena sian na mate. 10 Gabe marsangkap ma muse angka malim kepala* laho mambunu si Lasarus. 11 Ai alani si Lasarus, gabe godang ma halak Jahudi ro tu Betania jala gabe porsea tu Jesus.

12 Marsogotna i, dibege halak na ro tu perayaan i ma naeng ro Jesus tu Jerusalem. 13 Dibuat nasida ma dangka ni hau palem* jala laho ma nasida manomu-nomu Jesus. Marsurak ma nasida mandok, “Sai lehon ma haluaon tu ibana! Dipasu-pasu ma ibana na ro di bagasan goar ni Jahowa, Raja ni Israel!” 14 Jumpang ni Jesus ma sada anak ni halode, dung i hundul ma ibana di atasna songon na nidok ni na tarsurat i, 15 “Unang ho mabiar ale boru Sion. Na ro do rajami mandapothon ho, hundul do ibana di atas ni anak ni halode.” 16 Tingki i ndang diantusi angka sisean ni Jesus dope na masa i. Alai dung dilehon tu Jesus hasangaponna i, gabe diingot angka sisean i ma nunga tarsurat hian angka na masa i.

17 Torop do jolma mangida tingki dijou Jesus si Lasarus kaluar sian kuburan jala dipahehe sian na mate. Sai dipaboa-boa nasida ma na niida ni nasida i tu angka jolma. 18 Alani i ma ditomu-tomu natorop i ibana, ala dibege nasida dibahen ibana tanda halongangan* i. 19 Didok halak Parise i ma sama nasida, “Nunga tangkas diida hamu, marisuang do na tabahen i. Ida ma! Sude do portibi on mangihuthon ibana.”

20 Adong do manang na piga halak Junani na ro tu perayaan i laho manomba Debata. 21 Didapothon nasida ma si Pilippus na sian Betsaida na di Galilea, ninna nasida ma, “Tuan, naeng pajumpang hami dohot Jesus.” 22 Laho ma si Pilippus paboahon tu si Andreas, gabe rap ma nasida na dua paboahon tu Jesus.

23 Alai didok Jesus ma tu nasida, “Nunga jumpang tingkina asa dipasangap Anak ni jolma i. 24 Tutu do na hudok on tu hamu, molo ndang madabu sada eme tu tano jala mate, tongtong do i sada. Dung pe mate i asa godang parbuena. 25 Manang ise na mangkaholongi ngoluna, agoan ngoluna do. Alai manang ise na rade agoan ngoluna* di portibi on, na paluahon ngoluna do i laho mandapot hangoluan saleleng ni lelengna. 26 Manang ise na olo gabe parhobashu ingkon ihuthononna do ahu, jala manang didia ahu disi do ibana. Manang ise na olo gabe parhobashu, pasangapon ni Ama i ma ibana. 27 Saonari susa do huhilala, aha ma na laho dohononku? Ale Amang, palua ma ahu sian hasusaan on. Alai alani on do ahu umbahen na ro, asa hubolus hasusaan i. 28 Ale Amang, pasangap ma goarmi.” Tarbege ma soara sian surgo na mandok, “Nunga hupasangap i, jala pasangaponku do i muse.”

29 Dibege natorop na jongjong disi do soara i. Adong ma na mandok soara ni ronggur do i. Na asing muse mandok, “Suru-suruan do na mangkatai tu ibana.” 30 Didok Jesus ma, “Tarbege pe soara i ndang na laho tu ahu i, alai laho tu hamu do. 31 Nunga diuhumi saonari portibi on. Palaoon nama saonari parhuaso ni portibi on. 32 Molo dung diangkat ahu sian tano on,* toguonku ma sude jolma ro tu ahu.” 33 Sasintongna didok ibana pe songon i, na patorangkon parmatena do. 34 Dialusi natorop i ma ibana, “Hubege hami sian Patik i, mangolu saleleng ni lelengna do Kristus i. Boasa ma dohononmu ingkon diangkat Anak ni jolma i?* Ai ise do Anak ni jolma i?” 35 Didok Jesus ma tu nasida, “Satongkin nai nama panondang i di tonga-tongamuna. Mardalan ma hamu saleleng di hamu dope panondang i, asa unang dirajai na holom i hamu. Manang ise na mardalan di na holom, ndang botoonna tudia ibana laho. 36 Saleleng di hamu dope panondang i, patudu hamu ma haporseaon tu panondang i asa gabe angka anak ni panondang i hamu.”

Dung didok Jesus hatana i, laho ma ibana jala martabuni sian nasida. 37 Ai nang pe nunga godang dipatuduhon ibana tanda halongangan* di jolo ni nasida, ndang porsea nasida tu ibana. 38 Gabe saut ma na nidok ni panurirang Jesaya na mandok, “Ale Jahowa, ise ma na porsea tu barita na pinaboanami? Jala tu ise ma patuduhonon ni Jahowa huasona?”* 39 Dipaboa si Jesaya ma muse alani aha nasida ndang porsea, 40 “Nunga dipapitung Debata mata nasida jala nunga dipatangkang roha nasida. Asa unang marnida mata nasida, asa unang mangantusi nang roha nasida, jala ndang mulak nasida tu ahu laho pamalumonku.” 41 Didok si Jesaya pe songon i, ala diida ibana do hasangapon ni Kristus jala dihatahon do taringot tu ibana. 42 Sasintongna godang do angka pamimpin na porsea tu Jesus. Alai alani halak Parise, ndang dihatahon nasida i di jolo ni natorop asa unang dipakaluar nasida sian sinagoga.* 43 Alai, humolong do roha ni nasida tu hasangapon na sian jolma sian hasangapon na sian Debata.

44 Dung i gogo ma didok Jesus, “Manang ise na porsea tu ahu, ndang holan tu ahu ibana porsea alai dohot do tu na marsuru ahu. 45 Manang ise na marnida ahu, diida do nang Ibana na marsuru ahu. 46 Ro do ahu songon panondang tu portibi on, asa unang tongtong di haholomon manang ise na porsea tu ahu. 47 Alai manang ise na mambege hatangku jala ndang dioloi, ndang na laho uhumonku ibana. Ai ndang na laho manguhumi portibi on ahu umbahen na ro, alai na laho paluahon portibi on do. 48 Manang ise na so mangakkui ahu jala na so manjalo hatangku, adong do na manguhumi ibana. Angka hata naung huhatahon i ma manguhumi ibana di ari parpudi! 49 Ai ndang sian ahu angka na huhatahon i, alai Ama na marsuru ahu i do na mangalehon parenta tu ahu taringot tu sihatahononku dohot siajarhononku. 50 Huboto do parohon hangoluan na saleleng ni lelengna do parentana. Alani i, manang aha na pinaboa ni Ama i tu ahu, i do na huhatahon.”