Johannes

11 Adong ma sahalak baoa na marsahit na margoar si Lasarus. Di Betania do ibana tading rap dohot ibotona si Maria dohot si Marta. 2 Ia si Maria iboto ni si Lasarus na marsahit i, ibana ma borua na hea mangusehon miak na angur tu pat ni Tuan jala obukna do dibahen mangapusi. 3 Jadi disuru angka ibotona i ma halak manjumpangi Jesus laho mandok, “Tuan, marsahit do na hinaholongan ni roham.” 4 Dung dibege Jesus didok ibana ma, “Ndang hamatean ujung ni sahit i. Alai parohon hasangapon do i tu Debata, asa marsangap Anak ni Debata marhite i.”

5 Holong do roha ni Jesus tu si Marta, tu si Maria dohot tu si Lasarus. 6 Alai dung dibege Jesus na marsahit si Lasarus, tongtong dope ibana tading dua ari nai di ingananna i. 7 Dung salpu i, didok ibana ma tu angka siseanna, “Beta ma hita laho muse tu Judea.” 8 Didok angka siseanna i ma tu ibana, “Guru, baru dope naeng didangguri halak Judea ho, hape naeng laho hita muse tusi?” 9 Dialusi Jesus ma, “Nda 12 jom do torang ari? Manang ise na mardalan tingki torang ari, ndang tartuktuk i, ala tiur dope portibi on. 10 Alai manang ise na mardalan tingki borngin, tartuktuk do i ala ndang adong panondang di ibana.”

11 Dung didok Jesus songon i, didok ma muse, “Ia donganta si Lasarus i nunga modom. Alai na naeng laho ma ahu tusi mandungoi ibana.” 12 Dung i didok angka siseanna ma tu ibana, “Tuan, molo na modom do ibana, na laho malum nama i.” 13 Sasintongna, na nidok ni Jesus nunga mate si Lasarus. Alai dirimpu nasida do na nidok ni Jesus na modom si Lasarus. 14 Dung i tangkas ma didok Jesus tu nasida, “Nunga mate si Lasarus. 15 Alai alani hamu, las do rohangku ndang disi ahu, asa gabe porsea hamu. Beta ma taida ibana.” 16 Dung i didok si Tomas na laos margoar si Kembar ma tu angka donganna sisean, “Beta ma hita laho, asa rap mate hita dohot ibana.”

17 Dung sahat Jesus, nunga opat ari si Lasarus dikubur. 18 Jonok do Betania sian Jerusalem, hira-hira tolu kilometer* ma daona. 19 Jala torop do halak Jahudi na ro laho mangapuli si Marta dohot si Maria ala parmate ni ibotona i. 20 Dung dibege si Marta naung ro Jesus, laho ma ibana mandapothon Jesus. Alai tading do si Maria di jabu. 21 Didok si Marta ma tu Jesus, “Molo dison hian ho Tuan, ndang mate ibotongki. 22 Nang pe songon i, tongtong do ahu porsea manang aha dipangido ho tu Debata, lehononna do i tu ho.” 23 Didok Jesus ma tu si Marta, “Na laho hehe do ibotomi.” 24 Didok si Marta ma, “Huboto do na laho hehe ibana di haheheon di ari parpudi.” 25 Didok Jesus ma tu ibana, “Ahu do haheheon dohot hangoluan. Manang ise na porsea tu ahu, mangolu do ibana muse nang pe naung mate. 26 Manang ise na mangolu jala na porsea tu ahu, ndang na laho mate be ibana saleleng ni lelengna. Porsea do ho disi?” 27 Dialusi si Marta ma, “Olo Tuan, porsea do ahu, ho do Kristus i, Anak ni Debata na ro tu portibi on.” 28 Dung didok ibana songon i, laho ma ibana manjou anggina si Maria. Dihusiphon ma tu si Maria, “Nunga ro Guru, dilului do ho.” 29 Mambege i, pintor laho ma ibana mandapothon Jesus.

30 Ndang masuk dope Jesus tu huta i, di inganan parjumpanganna dohot si Marta i dope ibana. 31 Tingki diida halak Jahudi na ro mangapuli i hatop si Maria kaluar, diihuthon nasida ma ibana. Ai dirimpu nasida do na laho mangandungi si Maria tu kuburan. 32 Dung sahat si Maria tu inganan ni Jesus, marsinggang ma ibana tu pat ni Jesus jala ninna ma, “Molo dison hian ho Tuan, ndang mate ibotongki.” 33 Tingki diida Jesus tumatangis si Maria songon i nang halak Jahudi na ro dohot ibana, mansai lungun ma dihilala ibana. 34 Disungkun ibana ma, “Didia do dikubur hamu ibana?” Dialusi nasida ma, “Beta ma taida Tuan.” 35 Dung i manetek ma ilu ni Jesus. 36 Gabe didok halak Jahudi i ma, “Ida ma holong ni rohana i tu si Lasarus!” 37 Adong ma deba sian nasida na mandok, “Dipamalum ibana do halak na mapitung, ndang boi huroha bahenonna asa unang mate si Lasarus i?”

38 Lungun ma muse roha ni Jesus. Dung i laho ma ibana tu kuburan i, i ma liang batu na ditutup dohot batu. 39 Didok Jesus ma, “Handit hamu ma batu i sian i.” Gabe didok si Marta iboto ni na mate i ma tu ibana, “Nunga bau i Tuan, ai nunga opat ari ibana dikubur.” 40 Ninna Jesus ma tu ibana, “Ndang naung hudok tu ho, molo porsea ho idaonmu ma hasangapon ni Debata?” 41 Dihandit nasida ma batu i. Diida Jesus ma dompak ginjang jala didok ma, “Mauliate ma di Ho Amang, ala ditangihon Ho do ahu. 42 Huboto do sai ditangihon Ho do ahu. Alai hudok pe on, alani jolma natorop na jongjong dison do, asa porsea nasida na Ho do marsuru ahu.” 43 Dung didok ibana i, gogo ma dijouhon, “Lasarus, hehe ma ho!” 44 Kaluar ma na mate i, lilit dope abit tu patna dohot tu tanganna songon i nang tu bohina. Didok Jesus ma tu nasida, “Bungkai hamu ma i, asa boi ibana mardalan!”

45 Gabe porsea ma godang halak Jahudi na ro mangapuli si Maria, ala diida nasida na binahen ni Jesus i. 46 Alai, laho ma deba sian nasida mandapothon halak Parise jala dipaboa nasida ma na binahen ni Jesus i. 47 Alani i, dijou angka malim kepala* dohot halak Parise ma asa marpungu anggota ni Sanhedrin* jala ninna ma, “Aha ma sibahenonta? Ai nunga godang dibahen ibana tanda halongangan.* 48 Molo tapasombu ibana songon i, sude ma halak porsea tu ibana, gabe ro ma halak Rom mangarampas bagas joronta on dohot bangsonta.” 49 Alai adong ma sahalak sian nasida na margoar si Kayapas. Ibana do sintua ni malim di taon i. Didok ibana ma tu nasida, “Ndang adong diboto hamu manang aha, 50 jala ndang diboto hamu, tumagon do mate sahalak jolma paluahon sada bangso, sian apala mate sude bangso i.” 51 Alai ndang sian rohana na nidokna i. Ala sintua ni malim do ibana di taon i, disurirangkon ibana ma taringot tu hamamate ni Jesus laho paluahon halak Jahudi, 52 jala ndang holan halak Jahudi, alai dohot do laho papunguhon angka anak ni Debata na marserak i. 53 Mulai sian tingki i, sahata ma nasida laho mambunu Jesus.

54 Ndang mardalani be Jesus di jolo ni natorop, di tonga-tonga ni halak Jahudi. Dung i laho ma ibana sian i tu inganan na jonok tu padang pasir,* tu sada kota na margoar Epraim. Disi ma ibana tading rap dohot angka siseanna. 55 Nunga jonok Paska ni halak Jahudi. Torop do halak na ro sian angka huta na dao tu Jerusalem laho mangulahon ulaon paiashon diri andorang so Paska. 56 Dilului nasida ma Jesus. Huhut jongjong di bagas joro, didok nasida ma sama nasida, “Boha do pandapotmuna, na so ro do ibana tu perayaan on?” 57 Alai nunga diparentahon angka malim kepala dohot halak Parise, manang ise na mamboto didia Jesus, ingkon paboaonna do i asa boi ditangkup nasida ibana.