Lukas

11 Sada tingki martangiang ma Jesus di sada inganan. Dung sae ibana martangiang, didok sahalak siseanna ma tu ibana, “Tuan, ajari ma hami martangiang, songon si Johannes diajari do angka siseanna martangiang.”

2 Dung i ninna ibana ma tu nasida, “Molo martangiang hamu, dok ma, ‘Ale Amang, sai dipabadia* ma goarmu. Sai ro ma Harajaonmu. 3 Lehon ma di hami sipanganon* na porlu di hami ganup ari. 4 Jala sesa ma dosanami, ai disesa hami do dosa ni ganup halak na mardosa* tu hami. Jala urupi ma hami asa unang tarela-ela.’”*

5 Dung i ninna Jesus ma tu nasida, “Autsura adong sian hamu na laho tu jabu ni donganna di tonga borngin jala mandok, ‘Dongan, hupinjam jolo tolu rotimi, 6 ai ro donganku sian pardalananna jala ndang adong silehononku tu ibana.’ 7 Alai dialusi ibana ma sian bagasan, ‘Unang susai ahu. Nunga dikunci pintu jala nunga modom ahu dohot angka gellengku. Ndang tarbahen ahu hehe laho mangalehon manang aha di ho.’ 8 Hudok ma tu hamu, nang pe donganna hamu ndang olo ibana hehe laho mangalehon manang aha tu hamu. Alai ala sai dijugulhon hamu mangido, gabe hehe do ibana jala lehononna do na porlu di hamu. 9 Hudok ma tu hamu, sai pangido ma, ai na lehononna do i tu hamu. Sai lului ma, ai na dapotmuna do i. Sai tuktuhi ma, ai na bungkaonna do tu hamu. 10 Ai lehononna do tu ganup halak na mangido, jala dapotan do ganup halak na mangalului, jala bungkaonna do tu ganup halak na manuktuhi. 11 Ise sian hamu angka ama na mangalehon ulok tu anakna molo dipangido dengke? 12 Manang mangalehon hala molo dipangido tolor? 13 Alani i, gari hamu nang pe jahat diboto hamu mangalehon na denggan tu ianakhonmuna, tarlumobi ma Ama na di banua ginjang i, lehononna do tondi parbadia* tu halak na mangido tu Ibana!”

14 Dung i, dipalao Jesus ma suru-suruan na jahat na mambahen ngungu sasahalak. Dung laho suru-suruan na jahat i, gabe boi ma mangkatai na ngungu i. Longang ma natorop i. 15 Alai adong do sian nasida na mandok, “Marhite Beelsebul* pangulu ni suru-suruan na jahat i do ibana palaohon suru-suruan na jahat i.” 16 Adong do muse na manguji ibana, dipangido nasida patuduhononna tanda halongangan* sian banua ginjang. 17 Ala diboto Jesus do pingkiran ni nasida, gabe ninna ma, “Marumpak do ganup harajaon na tarbagi jala na marbadai. Dung i, sursar do keluarga na tarbagi jala na marbadai. 18 Songon i ma, molo tarbagi do Sibolis, songon dia ma boi hot harajaonna? Ai didok hamu, marhite Beelsebul do hupalao suru-suruan na jahat. 19 Molo hupalao suru-suruan na jahat marhite Beelsebul, marhite ise ma siihuthon hamu palaohon i? Alani i, angka siseanmuna i ma na patuduhon na sala hamu. 20 Alai molo marhite huaso ni Debata* ahu palaohon suru-suruan na jahat i, patuduhon naung ro do Harajaon ni Debata tu hamu. 21 Molo sahalak baoa na gogo jala na marsinjata manjaga jabuna, aman ma artana. 22 Alai molo ro na umgogo sian ibana mangalo jala manaluhon ibana, buatonna ma sinjata na niasangkonna i jala bagi-bagionna ma sude arta na binuatna i. 23 Manang ise na so rap dohot ahu, na mangalo ahu do i. Jala manang ise na so rap papunguhon dohot ahu, na paserakkon do i.

24 “Molo kaluar suru-suruan na jahat sian sahalak jolma, bolusonna do inganan na harsang* laho mangalului ingananna laho maradian. Ala ndang adong dapotna, ninna ma, ‘Mulak nama ahu tu jabu ingananku hian.’ 25 Dung sahat ibana, diida ma nunga ias jabu i disapu jala nunga denggan dibahen. 26 Dung i, laho ma ibana jala ditogihon ma pitu nai suru-suruan na umjahat sian ibana, masuk ma nasida jala maringanan ma disi. Ujungna, gabe umjahat ma jolma i sian di mulana i.”

27 Tingki mangkatai dope Jesus, adong ma sahalak borua sian tonga-tonga ni natorop i mandok tu ibana, “Marlas ni roha ma borua na manubuhon jala na manusui* ho!” 28 Alai ninna Jesus ma, “Ndang songon i. Halak na manangihon hata ni Debata jala na mangulahon i do na marlas ni roha!”

29 Tingki marpungu natorop i, didok Jesus ma, “Na jahat do sundut* on. Mangido tanda halongangan* do nasida alai ndang adong be tanda halongangan silehonon, asing ni tanda halongangan sian panurirang Jona. 30 Ai songon si Jona na gabe tanda tu halak Ninive, songon i ma Anak ni jolma i gabe tanda tu sundut* on. 31 Di Ari Paruhuman, hehe ma ratu sian selatan rap dohot angka halak sian sundut on. Patuduhonon ni ratu i ma sala ni sundut on, ai ro do ibana sian ujung ni tano on laho mambege habisuhon ni si Salomo. Alai, adong do dison na umbalga sian si Salomo. 32 Di Ari Paruhuman i, paheheonna do halak Ninive dohot sundut on. Patuduhonon ni halak Ninive ma sala ni sundut on, ai dipauba halak Ninive do roha ni nasida dung dibege barita ni si Jona. Alai, adong do dison na umbalga sian si Jona. 33 Ndang bahenon ni halak lampu naung digalahi tu inganan na buni manang tu toru ni karanjang.* Alai bahenonna do i tu inganan na timbo, asa diida angka na ro sinondangna. 34 Panondang ni daging do mata. Molo sada do tinuju ni matamuna, marsinondang ma dagingmu. Alai molo momar do matamuna, holom ma saluhut dagingmu. 35 Alani i manat ma, so tung haholomon do panondang na di ho i. 36 Alani i, molo tiur do saluhut dagingmu jala ndang adong disi na holom, gabe tiur ma i songon lampu na manondangi ho.”

37 Dung sae dihatahon Jesus i, ditogihon sahalak Parise ma ibana asa rap mangan nasida. Laho ma ibana tu jabuna jala hundul mangunsande di meja. 38 Alai, longang ma halak Parise i mangida Jesus ala ndang jolo dipaias* tanganna andorang so mangan. 39 Didok Tuan i ma tu ibana, “Hamu halak Parise, dipaias hamu do mangkuk dohot piringmuna sian luar, alai di bagasan gok do angka na binuatmuna marhite mangarampok dohot hajahaton. 40 Hamu halak na so marroha! Ai na mambahen na di luar, ndang laos i na mambahen na di bagasan? 41 Alani i, molo dilehon hamu silehon-lehon tu na pogos* sian nasa roha, gabe ias ma hamu. 42 Marjea ma hamu halak Parise, ai dilehon hamu do saparsampulu sian suan-suanan mint, inggu* dohot ganup sian suan-suanan na asing.* Alai tading do dibahen hamu na sintong dohot holong ni Debata! Ringkot do mangalehon saparsampulu, alai unang ma alani i gabe tading na asing. 43 Marjea ma hamu halak Parise, ai lomo do rohamuna hundul di jolo di angka sinagoga* jala dipangkulingi di pasar! 44 Marjea ma hamu, ai songon kuburan na so martanda do hamu, gabe mardalan ma halak di ginjangna di na so pamotoanna!”

45 Dung i didok sahalak sian siboto patik ma tu Jesus, “Guru, dohot do hami dileai ho di hatami.” 46 Gabe ninna ibana ma tu nasida, “Marjea ma nang hamu siboto patik, ai dibahen hamu do boban na borat siboanon ni halak, hape hamu sandiri ndang olo mandaishon nanggo sada jari-jarimuna tusi!

47 “Marjea ma hamu, ai dibahen hamu do kuburan ni angka panurirang hape angka ompumuna do na mambunu nasida! 48 Tangkas do diboto hamu pambahenan ni angka ompumuna jala ditolopi hamu do nasida. Ai nasida do na mambunu angka panurirang, laos hamu do na mambahen kuburan ni nasida. 49 Alani i ma didok Debata di bagasan habisuhonna,* ‘Suruonku do angka panurirang dohot angka apostel tu nasida, alai bunuon ni nasida ma i jala dibahen nasida ma na hansit tu deba sian nasida. 50 Alani i, sundut on ma na martanggung jawab* tu mudar ni sude panurirang na durus mulai sian parmulaan ni portibi on,* 51 sian mudar ni si Abel sahat tu mudar ni si Sakaria na tarbunu di holang-holang ni langgatan dohot bagas joro.’ Hudok ma tu hamu, sundut on do na martanggung jawab* tusi.

52 “Marjea ma hamu siboto patik, ai dibuat hamu do kunci ni parbinotoan. Hamu sandiri ndang masuk tusi jala diambati hamu do halak na naeng masuk tusi!”

53 Tingki laho Jesus sian i, disosak angka siboto surat dohot halak Parise ma ibana jala mansai godang ma sungkun-sungkun dibahen nasida, 54 huhut paimahon ibana mandok hata na boi pangkeon ni nasida manjorat ibana.