Mateus
4 Dung i ditogu-togu tondi parbadia ma Jesus tu padang pasir,* jala disi ma ibana diela-ela Sibolis. 2 Dung 40 ari 40 borngin marpuasa, male ma ibana. 3 Ro ma Sibolis mangela-ela ibana, ninna ma, “Molo tutu ho anak ni Debata, dok ma batu on asa gabe roti.” 4 Alai dialusi Jesus ma, “Tarsurat do, ‘Ndang holan sian roti jolma mangolu, alai sian ganup hata na ro sian Jahowa.’”
5 Dung i, ditogihon Sibolis ma Jesus tu kota na badia i jala dibahen ma ibana tu punsu* ni tembok ni bagas joro, 6 ninna ma, “Molo tutu ho anak ni Debata, timbung ma tu toru, ai tarsurat do, ‘Suruon ni Debata do angka suru-suruanna manjaga ho,’ jala ‘Toguon ni nasida do ho asa unang tartuktuk patmu tu batu.’” 7 Dialusi Jesus ma, “Didok na tarsurat i do muse, ‘Ndang jadi unjunanmu* Jahowa Debatam.’”
8 Ditogihon Sibolis ma ibana muse tu sada dolok na mansai timbo jala dipatudu ma sude harajaon ni portibi on dohot hasangaponna, 9 ninna ma, “Molo olo ho marsinggang jala marsomba tu ahu holan sahali pe, lehononku ma sudena on tu ho.” 10 Dung i ninna Jesus ma tu ibana, “Laho ma ho Bolis!* Ai tarsurat do, ‘Jahowa Debatam do ingkon sisombaonmu jala holan tu Ibana do ho marhobas.’” 11 Dung i, ditadingkon Sibolis i ma ibana, jala ro ma angka suru-suruan mangaradoti na ringkot di ibana.
12 Dung dibege Jesus naung ditangkup si Johannes, laho ma ibana tu Galilea. 13 Dung ditadingkon huta Nasaret, laho ma ibana tu Kapernaum jala disi ma ibana maringanan, di topi ni laut di luat Zebulon dohot Naptali, 14 asa saut na nidok ni panurirang Jesaya na mandok, 15 “Ale luat Zebulon dohot Naptali na di topi ni laut di bariba ni Sunge Jordan di Galilea, inganan ni angka bangso! 16 Nunga diida angka jolma na maringanan di haholomon panondang na bolon, jala nunga binsar panondang i tu angka jolma na maringanan di tano na nilinggoman ni hamatean.” 17 Mulai sian i marbarita ma Jesus jala ninna ma, “Pauba hamu ma rohamuna, ai nunga jonok Harajaon banua ginjang i.”
18 Tingki mardalan Jesus di topi laut Galilea, diida ibana ma dua halak na marhaha maranggi, i ma si Simon na digoari si Petrus, dohot si Andreas topet manampakhon jala nasida, ai sijala dengke do nasida. 19 Dung i, ninna Jesus ma tu nasida, “Ihuthon hamu ma ahu, asa hubahen hamu gabe sijala jolma.” 20 Dung i pintor ditadingkon nasida ma jala ni nasida i, laos diihuthon ma Jesus. 21 Dung laho Jesus sian i, diida ma muse dua halak na asing na marhaha maranggi, i ma si Jakobus dohot si Johannes anak ni si Sebedeus. Tingki padengganhon jala nasida di parau raphon ama ni nasida si Sebedeus, dijou Jesus ma nasida. 22 Pintor ditadingkon nasida ma parau i dohot ama ni nasida, jala diihuthon ma Jesus.
23 Dung i laho ma Jesus tu sandok luat di Galilea mangajari di angka sinagoga,* mamaritahon barita na uli taringot tu Harajaon jala pamalumhon nasa sahit dohot nasa hagaleon ni jolma. 24 Tarsar ma barita taringot tu Jesus di sandok luat di Siria, dipamboan ma tu ibana angka na marsitaonon dohot na marsahit, na disonggopi suru-suruan na jahat, na solpoton dohot na pangpang, jala dipamalum ibana do nasida. 25 Alani i, torop ma halak ro sian Galilea, sian Dekapolis,* sian Jerusalem, sian Judea, dohot sian luat na di bariba ni Sunge Jordan mangihuthon ibana.