“Jahowa Debatam do na Ikkon Sombaonmu”

1, 2. Boasa Jesus boi sahat di padang pasir na di Judea taon 29 M, jala aha do na masa disi? (Ida gambar di mula ni parsiajaran.)

HIRA-HIRA akhir bulan Oktober taon 29 M, di padang pasir na di Judea do Jesus na di sabola utara ni Laut Mati. Dung tardidi ibana jala dimiahi, ditogu-togu tondi parbadia ma ibana tusi. Harsang do inganan i, marbatu-batu, jala mardolok-dolok. Saleleng 40 ari ma Jesus marpuasa, martangiang, jala mangarimangi disi. Mungkin makkatai do Jahowa tikki i tu Anakna i lao paposson rohana mangulahon tugas di ari na naeng ro.

² Dung marpuasa Jesus, male ma ibana jala gale, ro ma Sibolis mandapotton ibana. Parsoalan na masa dukkon i melibatton sude na manomba Debata termasuk ma i hamu.

3, 4. (a) Aha do na didok Sibolis tikki dua hali digoda ibana Jesus, jala aha do tujuan ni Sibolis? (b) Songon dia do Sibolis mamakke cara na sarupa saonari?

³ Jaha Mateus 4:1-7. Cara na licik do dipakke Sibolis lao manggoda Jesus. Didok ibana do, “Molo tutu do ho anak ni Debata.” Sian hatana on, na so porsea do Sibolis na tutu Jesus i Anak ni Debata? Dang songon i. Ai anak ni Debata hian do Sibolis i, na gabe suru-suruan na jahat do ibana. Jadi takkas do diboto ibana molo Jesus i Anak ni Debata jala na parjolo ditoppa sian saluhutna. (Kol. 1:15) Takkas do muse diboto Sibolis aha na didok Jahowa tu Jesus tikki tardidi ibana. Didok do, “On do Anakku, haholongakki, las situtu do rohakku mangida ibana.” (Mat. 3:17) Jadi tujuan ni Sibolis, asa ragu do Jesus tu Jahowa, jala asa unang porsea na parduli Jahowa tu ibana. Digoda ibana ma parjolo sahali Jesus asa dibahen batu gabe roti. Hira songon on ma didok Sibolis, ‘Molo tutu do ho Anak ni Debata, boasa ma dipasombu Bapakmu ho dang mangan di padang pasir on?’ Tikki digoda paduahalihon, disuru do Jesus manibbung sian atas ni tembok ni bagas joro. Hira songon on ma didok Sibolis, ‘Kan Anak ni Debata do ho, na so porsea do ho jagaon ni Bapakmu ho?’

⁴ Saonari on, dipakke Sibolis do cara na sarupa manggoda naposo ni Debata. (2 Kor. 2:11) Dipaima-ima ibana do hita gale jala marmetmet ni roha, dung i diserang ibana ma hita. Cara na licik do dipakke ibana manggoda hita. (2 Kor. 11:14) Lomo do roha ni Sibolis asa porsea hita na so mungkin Jahowa makkaholongi hita. Lomo do muse rohana asa porsea hita na so boi dihaporseai Debata, jala na so pasautonna janjina i. Alai gabus do i sude. (Joh. 8:44) Songon dia do hita asa unang tartipu tu Sibolis?

 5. Songon dia do cara ni Jesus mangadopi dua godaan i?

⁵ Songon dia do cara ni Jesus mangadopi dua godaan i? Dang ragu ibana tu holong ni Bapakna i, pos situtu do rohana tu Debata. Pittor ditolak ibana do pangidoan ni Sibolis i. Dipakke do hata ni Debata mangalusi Sibolis. Dikutip do piga-piga ayat na paboahon goar ni Jahowa. (5 Mus. 6:16; 8:3) Ai di Jesus songon jaminan do goar ni Jahowa i, na paposson rohana lao pasauton ni Jahowa sude janjina.a

6, 7. Songon dia do carana mangalo siasat ni Sibolis na licik?

⁶ Hita pe boi do mangalo cara ni Sibolis na licik i molo taandalhon Hata ni Debata, jala tarimangi aha lapatan ni goarna. Dipaboa do di Bibel na holong roha ni Jahowa jala na parduli Ibana tu naposona, tarlumobi tikki mandele nasida. Molo pos rohatta tu holong ni Jahowa, dang porsea be hita tu gabus ni Sibolis na mandok na so dihaholongi Jahowa hita. (Ps. 34:18; 1 Ptr. 5:8) Toktong ma taingot, manang aha pe na diulahon Jahowa, sesuai do i tu lapatan ni goarna. Jadi pos ma rohatta boi do Ibana dihaporseai jala na lao pasautonna do toktong janjina.​—Poda 3:5, 6.

⁷ Sebenarna aha do tujuan ni Sibolis? Aha do na dipangido ibana sian hita? Taboto ma alusna tikki digoda Jesus patoluhalihon.

 8. Aha do sasittongna na dipangido Sibolis sian Jesus tikki digoda ibana patoluhalihon?

⁸ Jaha Mateus 4:8-11. Tikki digoda Sibolis Jesus patoluhalihon, takkas do dipaboa ibana aha na dipangido sian Jesus. Dipatudu ibana do tu Jesus (mungkin marhite parnidaan) “sude harajaon ni portibi on dohot hasangaponna”. Alai dang dipatudu ibana akka na roa sian portibi on. Didok ibana do, “Molo olo ho marsinggang jala marsomba tu au holan sahali pe, lehonokku ma sudena on tu ho.”b Takkas ma, lomo do roha ni Sibolis asa disomba. Lomo do rohana asa ditadikkon Jesus Bapakna jala asa dibahen Sibolis i gabe debatana. Hira na didok Sibolis do tu Jesus, ‘Mura do dapotmu huaso dohot hasangapon ni portibi on. Dang porlu haccit taononmu, dang porlu pakkeonmu mahkota na marsuga, dang porlu ho dilissingi, jala dang porlu ho dipamate.’ Boi do memang Sibolis mangalean hasangapon ni portibi on tu Jesus, ai ibana do nappuna i sude, jala takkas do i diboto Jesus. (Joh. 12:31; 1 Joh. 5:19) Pasti dilehon Sibolis do manang aha pe, asal ma unang disomba Jesus Bapakna i marhite cara na sittong.

 9. (a) Aha do sasittongna na dipangido Sibolis sian akka na manomba Jahowa, jala songon dia do carana manggoda nasida? (b) Aha do ibadat i? (Ida kotak “Aha do Ibadat I?”)

⁹ Lomo do roha ni Sibolis asa tasomba ibana manang taulahon na maralo tu lomo ni roha ni Debata. Didok do di Bibel Sibolis i “debata ni portibi on”, jadi ibana ma debata ni sude agama palsu na digoari Babel na Balga. (2 Kor. 4:4) Alai nang pe nungnga marmilliar halak na masuk tu agama palsu, dang puas dope Sibolis. Lomo dope rohana, asa dohot sisomba Jahowa mangulahon na maralo tu lomo ni roha ni Debata. Digoda ibana do hita asa talului hamoraon dohot hasangapon ni portibi on, asa unang gabe halak Kristen na sittong hita, na olo ‘marsitaonon ala mangulahon na sittong’. (1 Ptr. 3:14) Molo taoloi Sibolis i, nungnga tatinggalhon be ibadat na sittong jala gabe bagian ni portibi on ma hita. Dos ma hita songon na marsomba tu Sibolis jala mambahen ibana gabe debatanta. Jadi songon dia do asa unang targoda hita?

10. Songon dia do alus ni Jesus tikki digoda na patoluhalihon, jala boasa songon i alusna?

¹⁰ Songon dia do alus ni Jesus tikki digoda patoluhalihon? Setia do ibana tu Jahowa, pittor dipalao ibana do Sibolis. Didok ibana do, “Lao ma ho Bolis!” Jala songon na hea diulahon Jesus, dikutip do muse ayat sian bukku 5 Musa, na paboahon goar ni Debata. Didok ibana do, “Tarsurat do, ‘Jahowa Debatam do na ikkon sombaonmu jala ikkon holan tu Ibana do lehononmu ngolum.’” (Mat. 4:10; 5 Mus. 6:13) Dang tertarik Jesus tu tawaran ni Sibolis. Nang pe didok Sibolis mura mandapot hasangapon na di portibi on, jala dang pola porlu ibana marsitaonon, alai diboto Jesus do holan parsatokkinan do i sude. Takkas do diboto Jesus holan Jahowa na tama disomba, holan sahali pe disomba ibana Sibolis, nungnga dioloi be Sibolis i. Dang olo ibana mambahen Sibolis gabe debatana. Dung dialusi Jesus songon i, “ditadikkon Sibolis i ma ibana”.c​—Mat. 4:11.

11. Songon dia do caratta manolak Sibolis dohot godaan na sian portibi on?

¹¹ Boi do tatolak tawaran ni Sibolis i dohot godaan na sian portibi on. Alana songon Jesus, dilehon do tu hita silehon-lehon na arga, i ma kebebasan lao mamillit. Manang ise pe, dang boi mamaksa hita manadikkon ibadat na sittong, termasuk ma i suru-suruan na jahat na gogo songon Sibolis. Molo toktong togu haporseaotta, hira songon on ma tadok, “Lao ma ho Bolis!” (1 Ptr. 5:9) Taingot ma, ala tegas do Jesus mangalusi Sibolis gabe ditadikkon do ibana. Dos songon i ma didok Bibel tu hita, “Alo hamu ma Sibolis, dung i lari ma ibana sian hamu.”​—Jak. 4:7.

12. Tikki di Taman Eden, songon dia do Sibolis patuduhon molo ibana musu ni halak na mangulahon ibadat na sittong?

¹² Sian godaan na patoluhon, Sibolis patuduhon ibana do musu na parjolo tu akka halak na mangulahon ibadat na sittong. Marribu taon naung salpu, di Taman Eden dipatuduhon Sibolis do na so lomo rohana Jahowa na disomba. Digoda ibana do si Hawa jala dipengaruhi si Hawa ma si Adam asa mangalo paretta ni Jahowa. Gabe Sibolis ma na mangatur jala na makkendalihon nasida. (Jaha 1 Musa 3:1-5; 2 Kor. 11:3; Pgk. 12:9) Ujungna Sibolis ma debata ni nasida jala disomba nasida ma Sibolis i, nang pe sasittongna dang diboto ise na mangoto-otoi nasida. Jadi tikki dibahen Sibolis mangalo si Adam dohot si Hawa, ditudu Sibolis ma na so marhak Jahowa mamaretta. Alai dang holan i, diserang ibana do tong halak na mangulahon ibadat na sittong. Boasa tadok songon i?

13. Aha do kaitan ni ibadat na sittong tu hak ni Debata lao mamaretta?

¹³ Ibadat na sittong adong do kaitanna tu hak ni Jahowa mamaretta. Ai Jahowa do Debata Natumimbul dohot Sitoppa saluhutna. Jadi Ibana do na marhak lao mamaretta jala holan Ibana do na tama disomba. (Pgk. 4:11) Ditoppa Ibana do sempurna si Adam dohot si Hawa di Taman Eden. Tujuanna, asa digohi akka jolma na sempurna do sude portibi on. Diulahon nasida ma ibadat na sittong sian nasa rohana. (1 Mus. 1:28) Alai nang pe holan Jahowa Debata Natumimbul i na tama disomba, ditudu Sibolis do na so marhak Jahowa mamaretta, ai lomo do rohana asa ibana na disomba.​—Jak. 1:14, 15.

14. Marhasil do Sibolis pasohon ibadat na sittong?

¹⁴ Marhasil do Sibolis pasohon ibadat na sittong? Dibahen ibana do si Adam dohot si Hawa manadikkon Debata. Mulai sian i, diserang ibana ma ibadat na sittong. Lomo do rohana asa sagodang ni godangna halak mandao sian Jahowa. Andorang so adong dope huria Kristen, marsitutu do ibana mambahen akka halak asa unang setia be tu Jahowa. Di abad na parjolo, dipakke Sibolis do halak na murtad manegai huria, gabe hira na so adong be halak na mangulahon ibadat na sittong. (Mat. 13:24-30, 36-43; Ul. 20:29, 30) Mulai sian abad na paduahon, leleng do halak Kristen na sittong ditawan Babel na Balga, i ma agama palsu na di portibi on. Alai nang pe songon i, dang marhasil Sibolis lao manggagalhon jala mangabbati lomo ni roha ni Debata tu ibadat na sittong. (Jes. 46:10; 55:8-11) Balga do pengaruh ni parsoalan on tu goarna jala manang aha pe na diulahon Ibana toktong do i sesuai tu lapatan ni goarna. Jadi pasti pasauton ni Debata do sude lomo ni rohana!

15. Aha do cara na dibahen Jahowa lao mangatasi pangalo na di Taman Eden i, jala songon dia do Ibana mamastihon saut lomo ni rohana i?

¹⁵ Pittor dibahen Jahowa do cara lao mangadopi akka pangalo na di Taman Eden i, jala dipastihon Ibana do ikkon saut lomo ni rohana. (Jaha 1 Musa 3:14-19.) Bahkan tikki di taman i dope si Adam dohot si Hawa, nungnga dihukum Jahowa nasida sada-sada. Dihukum ma Sibolis, dung i si Hawa, jala na parpudi si Adam. Dipaboa Jahowa ma tu Sibolis sibahen parsoalan i na lao ro sada ‘pinoppar’ lao paturehon sude pengaruh ni dosa i. Jadi balga do pengaruh ni ‘pinoppar’ i lao pasautton lomo ni roha ni Debata, termasuk ma i ibadat na sittong.

16. Dung masa parsoalan di Taman Eden, songon dia do Jahowa mamastihon asa saut lomo ni rohana i?

¹⁶ Dung masa parsoalan di Taman Eden, dipastihon Jahowa do torus asa saut lomo ni rohana. Dipaboa Ibana ma tu akka jolma na mardosa songon dia cara na sittong manomba Ibana, songon na dibahas di pasal na mangihut. (Heb. 11:4–12:1) Marhite tondi parbadiana, diurupi Debata do akka panurat ni Bibel, songon si Jesaya, si Jeremia, dohot si Hesekiel manurat akka surirang. Akka surirang i ma na paboahon songon dia cara ni Debata padenggatton ibadat na sittong. Taringot on ma na unjotjot dipaboa di Bibel, jala sude surirang i saut marhite ‘pinoppar’ na dijanjihon. Jadi, balga situtu do pengaruh ni Jesus lao pasautton akka surirang i. (Gal. 3:16) Asing ni i, sian alus ni Jesus tu godaan ni Sibolis na patoluhalihon, takkas ma taboto Jesus do na mangurupi sude halak asa manomba Jahowa. Ai Jesus do na dipillit Jahowa lao pasautton sude surirang i. (Pgk. 19:10) Ibana ma na lao paluahon naposo ni Debata sian agama palsu jala paulakonna ma ibadat na sittong i.

17. Boasa las rohatta mamparsiajari surirang taringot songon dia cara ni Debata paulakkon ibadat na sittong i?

¹⁷ Dipatogu do rohatta tikki taparsiajari akka surirang taringot cara ni Debata padenggatton ibadat na sittong i. Ai nungnga sai tapaima-ima andigan tikkina marsada sude toppaan na di surgo dohot na di tano on mangulahon ibadat na sittong. Adong do janji di surirang i na mambahen dame rohatta. Tapaima do andigan dipahehe halak na tahaholongi, andigan tano on gabe Paradeiso, hita mangolu salelengna jala gabe sempurna.​—Jes. 33:24; 35:5, 6; Pgk. 20:12, 13; 21:3, 4.

18. Aha do na lao taparsiajari di bukku on?

¹⁸ Taparsiajari ma di bukku on akka surirang na luar biasa sian bukku Hesekiel. Godang sian surirang i paboahon cara ni Debata padenggatton ibadat na sittong. Tabahas ma annon aha do hubungan ni surirang ni si Hesekiel tu akka surirang na asing, songon dia sudena i saut marhite Kristus, jala aha hubunganna tu hita.​—Ida kotak “Mananda Bukku Hesekiel”.

19. Aha do na lao taulahon jala boasa?

¹⁹ Tikki di padang pasir na di Judea Jesus taon 29 M, gagal do Sibolis mambahen Jesus manadikkon ibadat na sittong. Alai boha ma hita saonari? Lam marsitutu do Sibolis lao mambahen hita mandao sian ibadat na sittong. (Pgk. 12:12, 17) Sai anggiat ma bukku on patoguhon rohatta lao mangalo Sibolis. Sai anggiat ma hata dohot pambahenatta patuduhon na setuju hita tu hata ni Jesus na mandok, “Jahowa Debatam do na ikkon sombaonmu.” Molo taulahon i, taida ma saut lomo ni roha ni Debata. Di tikki i, sude ma toppaan na di surgo dohot na di tano on marsada mangulahon ibadat na sittong sian nasa rohana. Ai holan Jahowa do na tama disomba!