Ulaon ni Apostel

23 Dibereng si Paulus ma dompak Sanhedrin* i jala didok ma, “Hamu angka haha anggingku,* sahat tu sadari on, denggan do ahu marparange mangihuthon panggora ni roha na ias di adopan ni Debata.” 2 Mambege i, disuru sintua ni malim Ananias ma halak na jongjong di lambung ni si Paulus i mamastaphon pamanganna. 3 Dung i didok si Paulus ma tu ibana, “Pastapon ni Debata ma ho, e halak na munafik!* Hundul do ho manguhumi ahu mangihuthon Patik i. Alai boasa ma dilanggar ho Patik i marhite marsuru halak mamastap ahu?” 4 Didok halak na jongjong di lambungna i ma, “Boasa dileai ho sintua ni malim ni Debata?” 5 Didok si Paulus ma, “Hamu angka haha anggingku, ndang huboto na sintua ni malim ibana. Ai tarsurat do, ‘Unang ma leai pamimpin ni bangsom.’”

6 Diboto si Paulus do deba anggota ni Sanhedrin* i halak Saduse jala deba nai halak Parise. Alani i, gogo ma didok ibana, “Hamu angka haha anggingku, halak Parise do ahu jala halak Parise do angka ompungku. Na huhaporseai do haheheon ni halak na mate umbahen na diuhumi ahu.” 7 Dung didok ibana songon i, gabe marbada ma halak Parise dohot halak Saduse i jala tarbagi dua ma nasida. 8 Ai didok halak Saduse do ndang adong haheheon, ndang adong suru-suruan,* alai halak Parise mandok adong do i sude. 9 Gabe gaor ma na pungu i. Jongjong ma manang na piga siboto surat sian punguan ni Parise, muruk ma nasida mandok, “Ndang adong dapotnami na sala dibahen ibana. Na adong do ra suru-suruan* mangkatai tu ibana.” 10 Gabe lam balga ma parbadaan i. Alani i mabiar ma komandan ni tentara i, so tung dipamate nasida si Paulus. Disuru ibana ma turun angka tentarana manarik si Paulus sian tonga-tonga ni natorop i. Dung i diboan ma ibana tu markas ni nasida.

11 Alai bornginna i, jongjong ma Tuan di lambungna, ninna ma, “Unang ho mabiar! Ai ingkon paboaonmu dope taringot tu ahu di Rom songon na pinaboam di Jerusalem.”

12 Marsogotna i, marsangkap ma halak Jahudi laho mambunu si Paulus jala marsumpa ma nasida na so jadi mangan manang minum saleleng so dibunu nasida si Paulus. 13 Lobi sian 40 halak ma na marsumpa i. 14 Laho ma nasida mandapothon malim kepala* dohot angka pangituai. Didok nasida ma, “Nunga marsumpa hami na so jadi allangonnami manang aha saleleng so hubunu hami si Paulus. 15 Saonari, rap ma hamu laho dohot anggota ni Sanhedrin* mandapothon komandan ni tentara i. Pangido hamu ma tu ibana asa diboan muse si Paulus tu jolomuna. Bahen hamu ma songon naeng patangkashon parkarona i hamu. Alai andorang so sahat ibana tuson, pamateonnami ma ibana.”

16 Tarbege ma sangkap ni nasida i tu bere ni si Paulus. Laho ma ibana tu markas ni tentara jala dipaboa ma i tu si Paulus. 17 Dijou si Paulus ma sahalak perwira ni tentara i, ninna ma, “Boan ma jolo doli-doli on tu komandan i, ai adong naeng paboaonna tu ibana.” 18 Dung i diboan perwira i ma doli-doli i tu komandan i, jala didok ma, “Na dijou si Paulus na tarhurung i do ahu jala dipangido asa huboan doli-doli on tu ho, ala adong sipaboaonna tu ho.” 19 Ditiop komandan i ma tangan ni doli-doli i, ditogihon ma ibana pulik, jala disungkun ma, “Aha do na laho sipaboaonmu tu ahu?” 20 Didok doli-doli i ma, “Nunga sahata halak Jahudi laho mangido tu ho asa boanonmu si Paulus tu jolo ni Sanhedrin* marsogot. Bahenon ni nasida ma songon naeng patangkashon parsoalanna i. 21 Alai unang ma oloi pangidoan ni nasida, ai adong do lobi sian 40 halak na martabuni laho manangkup ibana. Nunga marsumpa nasida, na so jadi mangan manang minum saleleng so dibunu nasida si Paulus. Jala nunga rade nasida, holan paimahon alusmu nama.” 22 Didok komandan ni tentara i ma tu ibana, “Unang paboa manang tu ise pe naung dipaboa ho tu ahu taringot i.” Dung i disuru ma ibana mulak.

23 Dung i dijou komandan i ma dua halak perwira, ninna ma, “Parade ma 200 tentara na mardalan sahat tu Kaesarea, 70 tentara na marsihundul di hoda jala 200 tentara na mamboan hujur. Suru ma nasida borhat jam sia* borngin on. 24 Parade hamu ma muse hoda di si Paulus jala jaga hamu ma ibana sahat tu gubernur Feliks.” 25 Dung i dibahen komandan i ma surat na mandok songon on,

26 “Sian si Klaudius Lisias tu gubernur Feliks na pinarsangapan: Horas! 27 Ditangkup halak Jahudi do baoa on jala nunga naeng dipamate nasida ibana. Alai dung hubege warga negara Rom do ibana, hatop ma ahu ro dohot tentaraku paluahon ibana. 28 Asa huboto alani aha dibahen nasida songon i tu ibana, huboan ma ibana tu jolo ni Sanhedrin* ni nasida. 29 Gabe huboto ma, alani parsoalan taringot tu Patik ni halak Jahudi do umbahen dialuhon nasida ibana. Ndang adong diulahon ibana manang aha na mambahen ibana patut diuhum mate manang dipenjarahon. 30 Alai dipaboa ma tu ahu, adong na marsangkap na jahat tu ibana. Gabe husuru ma ibana diboan tu ho jala hudok ma tu na mangaluhon i asa diboan nasida parsoalan on tu jolom.”

31 Diulahon angka tentara i ma parenta i, diboan nasida ma si Paulus borngin i tu Antipatris. 32 Marsogotna i, ditorushon angka tentara na marsihundul di hoda i ma pardalanan ni nasida rap dohot si Paulus, alai mulak ma angka tentara na asing tu markas ni nasida. 33 Sahat ma tentara na marsihundul di hoda i di Kaesarea. Dipasahat nasida ma surat i tu gubernur, laos dipasahat ma nang si Paulus tu ibana. 34 Dijaha gubernur i ma surat i, dung i disungkun ma tu si Paulus manang na sian provinsi dia ibana. Gabe diboto ma na sian Kilikia do si Paulus. 35 Didok gubernur i ma, “Molo dung sahat angka na mangaluhon ho i tuson, denggan pe hupareso parsoalanmon.” Dung i disuru gubernur i ma asa ditahan si Paulus di istana ni si Herodes.