Ulaon ni Apostel

15 Adong ma manang na piga halak na ro sian Judea, diajari nasida ma angka dongan sahaporseaon na di Antiokia. Didok nasida ma, “Molo ndang marsunat hamu mangihuthon Patik ni si Musa, ndang na boi hamu malua.” 2 Alai gabe guntur ma huria i ala dialo si Paulus dohot si Barnabas do pandapot ni nasida. Ujungna disuru ma si Paulus, si Barnabas, dohot manang na piga dongan na asing borhat tu Jerusalem, manungkun angka apostel dohot angka sintua taringot tu parsoalan i.

3 Dung ditaruhon angka dongan na di huria i nasida, ditorushon nasida ma pardalanan ni nasida mamolus sian Penisia dohot Samaria. Dipaboa nasida ma tu angka dongan na disi taringot tu hamubaon ni angka halak na sian bangso na asing. Mambege i, las situtu ma roha ni angka dongan i. 4 Dung sahat nasida di Jerusalem, denggan do nasida dijalo angka dongan na di huria, angka apostel, dohot angka sintua. Dung i, dipaboa nasida ma sude na binahen ni Debata marhite nasida. 5 Alai jongjong ma deba sekte Parise naung gabe porsea sian hundulan ni nasida, ninna ma, “Ingkon sunaton do nasida jala ingkon ihuthonon ni nasida do Patik ni si Musa.”

6 Dung i, marpungu ma angka apostel dohot angka sintua laho mangkatai taringot tu parsoalan i. 7 Dung leleng dihatai nasida taringot i, jongjong ma si Petrus jala ninna ma tu nasida, “Hamu angka dongan, tangkas do diboto hamu, sian mulana dipillit Debata do ahu sian tonga-tongamuna laho paboahon barita na uli tu angka bangso na asing asa gabe porsea nasida. 8 Jala nunga dipatuduhon Debata, siboto roha i, na lomo rohana tu nasida marhite mangalehon tondi parbadia songon na nilehonna i tu hita. 9 Ndang dipaimbar Debata hita dohot nasida. Alai dipabadia Debata do roha ni nasida ala nunga porsea. 10 Antong boasa ma ujionmuna Debata, diampehon hamu boban na borat tu angka sisean, na so tolap boanonta dohot boanon ni angka ompunta? 11 Hape tahaporseai do, holan marhite asi ni roha* ni Tuan Jesus na mansai balga i do hita malua. Nasida pe songon i do dihaporseai.”

12 Gabe hohom ma sude na pungu i. Dung i, ditangihon nasida ma si Barnabas dohot si Paulus paboahon angka tanda halongangan* na binahen ni Debata marhite nasida di tonga-tonga ni angka bangso. 13 Dung sae nasida mangkatai, didok si Jakobus ma, “Hamu angka dongan, tangihon hamu ma ahu. 14 Nunga tangkas dipaboa si Simeon,* naung diparrohahon Debata bangso na asing. Dipillit Debata do deba sian nasida gabe bangso na pasangaphon goarna. 15 Jala hombar do on tu na Sinurat ni Angka Panurirang, ai tarsurat do, 16 ‘Dung salpu i, mulak ma ahu muse laho pajongjongkon sopo ni si Daud naung marumpak i. Pajongjongonku ma muse i, jala padengganonku. 17 Asa tongtong luluan ni na tading i Jahowa, rap dohot angka halak na sian sude bangso na pasangaphon goarhu, ninna Jahowa na pasauthon sude 18 angka naung tinontuhonna sian najolo.’ 19 Alani i ninna rohangku, ndang bahenon be susa angka bangso na asing na ro manomba Debata. 20 Alai, tabahen ma surat asa dipadao nasida dirina sian na ramun binahen ni angka gana-ganaan, sian seks na so patut,* sian binatang na mate so sineat* dohot sian mudar. 21 Sian najolo, nunga adong angka buku ni si Musa na marisi angka parenta on di angka kota. Ai ganup ari Sabbat do i dijahahon di angka sinagoga.”*

22 Dung i ditontuhon angka apostel, angka sintua, dohot sude na di huria i ma asa dipillit sian tonga-tonga ni nasida na laho borhat rap dohot si Paulus dohot si Barnabas tu Antiokia. Dipaborhat nasida ma si Judas na laos digoari si Barsabas dohot si Silas. Nasida ma angka na manguluhon dongan sahaporseaon. 23 Songon on ma isi ni surat na ditongoshon marhite nasida,

“Sian hami angka donganmuna, angka apostel dohot angka sintua, angka dongan na sian bangso na asing na adong di Antiokia, di Siria, dohot di Kilikia: Horas ma di hamu! 24 Nunga hubege hami na adong do sian tonga-tonganami ro mandapothon hamu, na manusai hamu jala na mambahen ganggu rohamuna marhite hata ni nasida, hape so adong hulehon hami tudu-tudu songon i tu nasida. 25 Nunga sada rohanami laho mamillit dua halak donganta na sinuru mandapothon hamu raphon si Barnabas dohot si Paulus na tahaholongi, 26 na mangalehon ngolu ni nasida laho mampartahanhon goar ni Tuanta Jesus Kristus. 27 Alani i ma husuru hami si Judas dohot si Silas, asa dipatorang nasida isi ni surat on tu hamu. 28 Nunga hutontuhon hami marhite pangurupion ni tondi parbadia asa unang hutambai hami be boban tu hamu, asing ni angka na ringkot on: 29 Padao hamu ma dirimuna sian naung dipelehon tu angka gana-ganaan, sian mudar, sian binatang na mate so sineat,* dohot sian seks na so patut.* Molo tongtong dipadao hamu dirimuna sian angka i, denggan ma hamu. Sai horas-horas ma!”

30 Dung i dipaborhat ma nasida tu Antiokia. Dijou nasida ma asa marpungu angka sisean na disi jala dipasahat ma surat i tu nasida. 31 Dung dijaha nasida surat na patoguhon roha i, las ma roha ni nasida. 32 Diurupi jala dipatogu si Judas dohot si Silas do angka dongan na disi marhite angka jamita, ai panurirang do nasida. 33 Dung manang na sadia leleng nasida disi, dipaborhat angka dongan i ma nasida di bagasan dame mulak tu Jerusalem. 34 *—— 35 Alai tongtong do tading si Paulus, si Barnabas, dohot angka dongan na asing di Antiokia mangajarhon dohot mamaritahon barita na uli taringot tu hata ni Jahowa.

36 Dung manang na piga ari, didok si Paulus ma tu si Barnabas, “Mulak ma jolo hita asa tajumpangi angka dongan di ganup kota naung tabaritahon hata ni Jahowa, asa taida manang na songon dia nasida.” 37 Lomo do roha ni si Barnabas asa dohot si Johannes na laos digoari si Markus. 38 Alai ndang lomo roha ni si Paulus boanon ni nasida si Markus, ala hea do nasida ditadingkon di Pampilia jala ndang rap ibana dohot nasida di ulaon marbarita. 39 Gabe tubu ma parbadaan di nasida. Alani i, marsirang ma si Paulus dohot si Barnabas. Diboan si Barnabas ma si Markus jala markapal ma nasida tu Siprus. 40 Alai ditogihon si Paulus ma si Silas. Dung ditangiangkon angka dongan i asa didongani asi ni roha ni Jahowa na mansai balga i si Paulus, dipaborhat ma nasida. 41 Dung i, borhat ma ibana tu Siria dohot Kilikia patoguhon angka huria na disi.