1 Timoteus
5 Unang ma kasar mangkatai tu baoa na matua, alai denggan ma paingot nasida songon amangmu. Tu angka baoa na poso songon hahaanggim. 2 Tu angka borua na matua songon inangmu. Tu angka borua na poso songon ibotom, jala ndang marsangkap na asing-asing.
3 Parrohahon ma angka ina na mabalu na so adong be na manarihon. 4 Alai molo adong dope anakkonna manang pahompuna, nasida ma na parjolo mangoloi parenta ni Debata taringot tu na manarihon keluarga. Jala ingkon baloson ni nasida do angka na denggan na binahen ni natua-tua dohot ompung ni nasida. Ai hombar do i tu lomo ni roha ni Debata. 5 Angka ina na mabalu na porlu diurupi jala na so adong na manarihon, tu Debata ma ibana mangkirim jala sai martangiang ma ibana mambahen pangidoan arian nang borngin. 6 Alai anggo holan mangulahon hisap-hisap ni dagingna do sahalak ina na mabalu, naung mate do ibana nang pe mangolu dope. 7 Alani i tongtong ma pasahat tudu-tudu* on tu nasida, asa unang adong na mangaleai nasida. 8 Alai manang ise na so manarihon na di ibana,* tarlumobi anggota keluargana, ndang halak na porsea be i jala nunga umjahat ibana sian angka na so porsea.
9 Sahalak ina na mabalu na boi dipillit laho diurupi, i ma na marumur lobi sian 60 taon,* sada tunggane dolina, 10 jala diboto halak do ibana siulahon na denggan. Umpamana denggan do ibana pagodang-godang ianakkonna, burju do ibana manjalo tamu,* disunsi* ibana do pat ni angka na badia, diurupi ibana do angka na susa, jala rade do ibana mangulahon sude ulaon na denggan.
11 Alai unang ma dipillit ina na mabalu na poso dope. Molo tubu hisap-hisap ni dagingna, gabe maol ma ibana marhobas tu Kristus, ai sai naeng muli ma ibana muse. 12 Jala gabe diuhumi ma nasida ala ndang digohi janji ni nasida na parjolo i. 13 Ai ndang olo be nasida karejo jala holan na martandangi nama ulaon ni nasida. Alai ndang holan i, lomo do roha ni nasida mangkata-hatai halak, mangantoi na so urusanna, jala mangkatahon na so ulaonna. 14 Alani i, didok rohangku denggan ma ina na mabalu na poso marhasohotan, marianakkon, manarihon keluargana asa unang adong dalan ni angka musunta laho manginsahi. 15 Sasintongna, adong do deba sian nasida naung manimbil jala mangihuthon Sibolis. 16 Molo adong ina na mabalu di keluarga ni sahalak donganta borua, diurupi ma ina na mabalu i asa unang gabe tanggungan ibana di huria. Dung i, boi ma huria mangurupi angka ina na mabalu na so adong be na manarihon.
17 Ingkon tapasangap do dua hali lompit angka sintua na denggan manarihon huria, tarlumobi angka sintua na paboahon jala na mangajarhon hata ni Debata sian nasa gogona. 18 Ai didok na tarsurat i do, “Unang ma tutup baba ni lombu tingki dibahen mardege gandum,” jala “Ingkon lehonon do upa ni parkarejo.” 19 Unang ma tangihon alu-alu ni halak taringot tu sahalak sintua, molo so adong hatorangan sian dua manang tolu saksi. 20 Pinsang ma halak na mangulahon dosa di jolo ni natorop, asa gabe sipasingot i tu natorop i. 21 Di jolo ni Debata, di jolo ni Kristus Jesus, dohot di jolo ni suru-suruan na pinillit ni Debata, huparentahon ma tu ho asa ihuthon tudu-tudu on jala unang paimbar-imbar jolma tingki mangulahon on.
22 Unang ma pahatophu mamillit sasahalak* laho mangulahon sada tanggung jawab. Unang ma parsidohot ho di dosa ni halak. Jaga ma dirim asa tongtong ho badia.
23 Unang ma holan aek inum,* alai sipata inum ma anggur sasaotik. Ai jotjot do hansit butuham* jala jotjot do ho marsahit.
24 Adong do deba halak na hatop tarboto dosana, na mambahen nasida pintor diuhumi. Alai na deba, di pudian ni ari pe dosana i tarboto. 25 Suang songon i ma angka ulaon na denggan, idaon ni halak do i. Molo ndang tarida dope, ndang torus i buni.