Pangungkapon
17 Dung i ro ma sada sian pitu suru-suruan na maniop pitu mangkuk i. Didok ma tu ahu, “Ro ma ho, asa hupatuduhon panguhuman na laho masa tu boru-boru na so hasea na hundul di aek na godang i. 2 Diulahon ibana do seks na so patut* tu angka raja na di tano on. Gabe mabuk do angka jolma na di tano on ala manginum anggurna, i ma seks na so patut* na niulahonna i.”
3 Marhite panogu-noguon ni tondi parbadia, diboan suru-suruan i ma ahu tu padang pasir.* Huida ma disi sahalak borua na hundul di atas ni binatang buas na rara songon api. Adong pitu ulu ni binatang buas i, sampulu tandukna jala gok do di dagingna angka goar na mangaleai Debata. 4 Dipangke borua i do abit na piolet dohot na rara songon api. Dipangke do muse angka perhiasan na sian mas, angka batu permata, dohot mutiara. Jala ditiop do sada mangkuk na sian mas na marisi gok ulaon na dihagigihon dohot na ramun, i ma seks na so patut* na niulahonna. 5 Di pardompahanna tarsurat do sada goar rahasia, “Babel na Balga, ina ni angka boru-boru na so hasea dohot angka ulaon na dihagigihon di tano on.” 6 Huida ma mabuk borua i alani mudar ni angka na badia i dohot mudar ni angka saksi ni Jesus.
Mangida ibana, longang situtu ma rohangku. 7 Didok suru-suruan i ma tu ahu, “Boasa longang ho? Paboaonku ma tu ho rahasia taringot tu borua i dohot taringot tu binatang buas na mamboan ibana, na marulu pitu dohot na martanduk sampulu i. 8 Binatang buas na niidami, hea do i adong alai ndang adong be nuaeng. Na laho kaluar ma i muse sian lombang na mansai bagas jala na laho diripashon. Gabe longang ma angka jolma na di tano on mamereng binatang i. Nasida ma angka na so tarsurat goarna di buku hangoluan i sian mulai adong portibi on.* Jala binatang i, i ma na hea adong, na so adong be nuaeng, alai na naeng ro do muse.
9 “Porlu do bisuk laho mangantusi on: Pitu ulu ni binatang na dihunduli borua i manggombarhon pitu dolok. 10 Jala na pitu dolok i manggombarhon pitu raja: lima nunga salpu, sada adong dope jala sada nai ndang ro dope. Molo ro i, holan satongkin do ibana mangarajai. 11 Binatang buas na hea adong alai na so adong be nuaeng, i ma raja na paualuhon. Alai sian raja na pitu i do ibana ro jala na laho diripashon do ibana.
12 “Sampulu tanduk na niidami manggombarhon sampulu raja na so mangarajai dope. Alai jaloon ni nasida ma huaso laho mangarajai rap dohot binatang buas i sajom lelengna. 13 Saroha do na sampulu raja i, alani i dilehon nasida ma gogo dohot huaso ni nasida tu binatang buas i. 14 Marporang ma nasida mangalo Anak ni Biru-biru i. Alai taluhonon ni Anak ni Biru-biru i do nasida. Ai ibana do Tuan ni angka tuan jala Raja ni angka raja. Dohot do angka na tarjou, na tarpillit dohot angka na marsihohot i rap dohot Anak ni Biru-biru i manaluhon nasida.”
15 Didok suru-suruan i ma tu ahu, “Aek na niidami inganan ni borua i hundul manggombarhon angka bangso, jolma natorop dohot bahasa. 16 Sogo ma roha ni na sampulu tanduk dohot binatang buas na niidami tu boru-boru na so hasea i. Buaton ni nasida ma sude artana jala bahenon ni nasida ma ibana ndang marpangkean. Allangon ni nasida ma dagingna jala tutungon ni nasida ma ibana dohot api. 17 Ai Debata do na mangonjar roha ni nasida laho mangulahon lomo ni rohana. Alani i, gabe saroha ma nasida mangalehon harajaon ni nasida tu binatang buas i sahat tu na saut sude hata ni Debata. 18 Jala borua na niidami manggombarhon kota na balga na mangarajai angka raja na di tano on.”