“Pasookku ma Ulaonmu na So Hasea I”

1, 2. Aha do na mambahen hita magigi tu boru-boru na so hasea?

PASTI asi do rohatta molo adong sahalak borua gabe pelacur. Olo do gabe sukkun-sukkun rohatta boasa ibana mangulahon i. Na hea do nuaeng ibana gabe korban pelecehan? Manang tikki dakdanak, na adong do sian anggota keluargana kejam tu ibana? Na pogos hian do umbahen na sappe jual diri ibana? Na lari do ibana sian suamina na kejam? Ai massai godang do pengalaman ni halak sisongon i saonari on. Jadi boi ma taattusi boasa asi roha ni Jesus mangida akka boru-boru na so hasea. Dipaboa Jesus do, molo olo muba sasahalak sian dosana boi do ibana mandapot ngolu na dumenggan di ari na naeng ro.​—Mat. 21:28-32; Luk. 7:36-50.

² Saonari bayakkon ma adong borua na asing, sengaja do dipillit ibana karejona gabe pelacur. Anggo di rohana, ulaonna i dang ulaon na pailahon alai na parohon uttung do. Olo do ibana gabe pelacur asa mandapot godang hepeng dohot huaso. Na ungngeri muse, suami ni borua on burju do jala setia. Alai tega do ibana menghianati suamina. Pasti magigi do hita mangida borua i. Dos songon i ma nang Jahowa mangida sude agama palsu. Alani i ma mulak-hulak dipatudos Jahowa nasida songon boru-boru na so hasea.

 3. Aha do cerita sian bukku Hesekiel na lao tabahas di pasal on?

³ Di bukku Hesekiel, adong dua cerita taringot boru-boru na so hasea na manggombarhon naposo ni Debata na so setia di Israel dohot di Juda (Hesekiel bindu 16 dohot 23). Andorang so tabahas, taida ma jo boru-boru na so hasea na asing na dipaboa di Pangungkapon, bukku na parpudi di Bibel. Nungnga gabe boru-boru na so hasea ibana sebelum tikki ni si Hesekiel, bahkan sebelum adong bangso Israel. Sahat tu saonari pe diulahon ibana dope ulaonna i.

4, 5. Ise do “Babel na Balga” i jala boasa boi tadok songon i? (Ida gambar di mula ni parsiajaran.)

⁴ Di ujung ni abad na parjolo, dilehon Jesus ma sada parnidaan tu Apostel Johannes. Diida ibana ma sahalak borua, dijou do ibana “boru-boru na so hasea” dohot “Babel na Balga, ina ni akka boru-boru na so hasea”. (Pgk. 17:1, 5) Saleleng marratus taon, dang diboto akka pamimpin agama dohot pakar Alkitab ise ibana sasittongna. Adong do na mandok boru-boru na so hasea i, i ma Babel, Roma, manang Gareja Katolik Roma. Alai nungnga marpulu taon Saksi Jahowa mamboto ise “boru-boru na so hasea” on. Ibana do na manggombarhon sude agama palsu na di portibi on. Boasa boi tadok songon i?

⁵ Diburai do boru-boru na so hasea on ala mangulahon seks na so patut ibana dohot “akka raja na di tano on” manang na marhuaso di politik. Jadi boru-boru na so hasea dison, dang manggombarhon na marhuaso di politik. Dipaboa do muse di Pangungkapon, mangandungi do “akka partiga-tiga na di tano on” manang dunia perdagangan tikki madabu Babel na Balga. Jadi dang dunia perdagangan na digombarhon Babel na Balga. Attong ise do ibana? Didok do ibana marsala ala diulahon “ilmu gaib”, disomba patung, jala dililuhon halak. Akka i do diulahon organisasi agama saonari kan? Didok do muse boru-boru na so hasea on hundul di atas ni akka na marhuaso di politik, jala ibana do na makkendalihon nasida. Dianiaya ibana do naposo ni Debata na setia. (Pgk. 17:2, 3; 18:11, 23, 24) Akka on do muse na diulahon agama palsu sahat tu saonari kan?

 6. Boasa didok Babel i “ina ni akka boru-boru na so hasea”?

⁶ Boasa Babel na Balga i dang holan digoari “boru-boru na so hasea”? Boasa digoari ibana “ina ni akka boru-boru na so hasea”? Ai tarbagi-bagi do agama palsu, jala dang taretong be sadia godang aliran dohot sektena. Mulai sian na sursar bahasa ni jolma di kota Babel, manang Babilon, rarat ma ajaran na so sittong tu sude inganan jala tamba godang ma agama. Alani i ma cocok dibuat goar ni Babel na Balga sian goar ni kota i, ai sian i do mulana rarat agama palsu! (1 Mus. 11:1-9) Jadi sude agama palsu i dipatudos ma songon “akka anak” ni boru-boru na so hasea i manang ro sian sada organisasi. Jotjot do dipakke Sibolis akka agama on mambahen halak asa marlomo ni roha tu ulaon na berkaitan tu ilmu gaib, jala asa porsea tu ajaran dohot tu kebiasaan na so sittong na mangaleai Debata. Alani i ma dipasingot Debata naposona taringot organisasi agama palsu na jahat di liat portibi on. Didok Ibana do, “Kaluar ma hamu sian ibana, hamu naposokku! Asa unang dohot hamu mangulahon akka dosana.”​—Jaha Pangungkapon 18:4, 5.

 7. Boasa ikkon tatangihon sipasingot asa “kaluar” sian Babel na Balga?

⁷ Nungnga diulahon hamu sipasingot i? Boasa ikkon diulahon hamu i? Taingot ma, mulai sian na ditoppa Jahowa jolma, nungnga diboto nasida na ‘rikkot marale-ale tu Debata’. Jala nasida boi marale-ale tu Debata molo diulahon nasida do ibadat na sittong. (Mat. 5:3) Jadi marsitutu do naposo ni Jahowa toktong mandao sian agama palsu asa boi marale-ale tu Debata. Alai anggo Sibolis asing do tujuanna. Torus do ibana marsitutu manjorat naposo ni Debata asa unang setia tu Jahowa. Jotjot do ibana marhasil. Di tikki ni si Hesekiel mulak-hulak do naposo ni Jahowa manomba debata na so sittong. Sian hasalaan ni nasida, boi ma taparsiajari standar ni Jahowa, parange ni Debata na adil, dohot asi ni rohana.

8-10. Asa boi taboto pakkilalaan ni Jahowa tu agama palsu, syarat na dia do na porlu taingot tikki mangulahon ibadat na sittong? Bahen ma tudosan.

⁸ Di bukku Hesekiel, dipaboa Jahowa do dua cerita taringot boru-boru na so hasea lao patuduhon pakkilalaanna. Sian cerita i, dipatudu Jahowa do na haccit rohana tikki dihianati naposona Ibana. Ai dang setia nasida jala diulahon do seks na so patut. Boasa dipatudos Jahowa naposona songon boru-boru na so hasea?

⁹ Lao mamboto alusna, porlu do taingot sada syarat na porlu taulahon di ibadat na sittong, songon na tabahas di Pasal 5. Di Patik ni si Musa na dilehon tu halak Israel, didok Jahowa do, “Holan Au do na ikkon disomba hamu. Unang somba debata na asing [manang di surat na di toru didok, “Unang alo Au marhite manomba akka i”]. . . . Ai Au do Jahowa Debatamuna. Hupangido do tu hamu asa holan Au Debata na disomba hamu.” (2 Mus. 20:3, 5) Di pudian ni ari, diulangi Jahowa do muse prinsip na sarupa songon na di ayat on. Didok do, “Unang marsomba hamu tu akka debata na asing. Ai Jahowa do na mangido asa holan Ibana na disomba. Tutu, Ibana do Debata na mangido asa holan Ibana na disomba.” (2 Mus. 34:14) Nungnga takkas dipaboa Jahowa aha na dipangido Ibana sian naposona. Jadi asa dijalo Debata ibadatta, ikkon holan Ibana do na tasomba.

¹⁰ Dipatudos do hubungan ni Jahowa tu naposona songon suami istri. Marhak do suami manang istri mangido tu dongan saripena asa toktong setia. Wajar do molo gabe cemburu manang merasa dihianati dongan saripe, molo adong sian suami manang istri na romantis tu halak na so dongan saripena. (Jaha Heber 13:4.) Dos songon i ma nang Jahowa, wajar do molo merasa dihianati Ibana tikki dang setia naposona i, jala gabe manomba debata na so sittong. Ai nungnga marjanji nasida holan Jahowa na ikkon disomba. Takkas ma dipaboa Debata pakkilalaanna di Hesekiel bindu 16.

11. Aha do na dipaboa Jahowa taringot Jerusalem?

¹¹ Di bindu 16 ma hata ni Jahowa na ungganjang disurat di bukku Hesekiel, jala on do sada surirang na ungganjang na adong di Akka Bukku Heber. Dipakke Jahowa do kota Jerusalem lao manggombarhon halak Juda na so setia. Dipaboa Jahowa do na massai ngeri najolo kota i jala magigi do halak mangida kota i. Dipaboa Ibana do muse songon dia nasida menghianati Ibana. Najolo, Jerusalem i dos songon poso-poso na so diurus jala kotor. Natua-tuana i ma halak Kanaan na manomba akka dewa. Cocok do nasida dipatudos songon i, alana leleng do Jerusalem dirajai halak Jebus pinoppar ni halak Kanaan. Dirajai do nasida sahat tu tikki ni Raja Daud. Ai Raja Daud do muse na mambuat kota i sian tangan ni nasida. Asi do roha ni Jahowa mangida poso-poso i. Dipaias ma ibana jala diurus sappe balga. Di pudian ni ari, dibahen ma borua i songon istrina. Ai dung mulak halak Israel tinggal di kota i, mulak ma nasida muse tu parjanjian naung dibahen nasida tu Jahowa, i ma parjanjian naung hea dibahen di tikki ni si Musa. (2 Mus. 24:7, 8) Dung gabe Jerusalem ibu kota ni luat i, dipasu-pasu Jahowa ma halak na disi. Lam mora ma nasida jala dibahen lam uli. Dipatudos ma kota i songon sahalak istri na mandapot perhiasan na arga sian suamina na mora jala na jago.​—Hes. 16:1-14.

12. Boasa dang setia be Jerusalem?

¹² Aha do na masa dukkon i? Jahowa mandok, “Alai mulai ma dipangasahon ho haulionmi. Gabe boru-boru na so hasea ma ho ala nungnga tarbarita ho. Disodorhon ho do dirim tu ganup halak na lewat. Jala gabe appunana ma haulionmi.” (Hes. 16:15) Di tikki ni si Salomo, dipasu-pasu Jahowa do halak na disi, jala dibahen do godang arta ni nasida. Tarbarita do najolo Jerusalem i kota na massai mora. (1 Raj. 10:23, 27) Alai lam leleng dang setia be nasida. Godang do istri ni si Salomo sian bangso na asing. Lao pasonakkon roha ni istrina, dohot do si Salomo manomba patung. Ujungna, dang badia be Jerusalem. (1 Raj. 11:1-8) Piga-piga raja na manggattihon ibana, unjahat sian si Salomo. Ujungna, lam rarat ma halak na mangulahon ibadat na so sittong di luat i. Songon dia do didok Jahowa tu naposona na so setia jala na menghianati Ibana? Debata mandok, “Sasittongna dang boi bahenonmu songon i, jala dang boi masa sisongon i.” (Hes. 16:16) Alai lam mandao do roha ni naposona sian Ibana jala lam jahat!

13. Aha do hajahaton na diulahon naposo ni Debata di Jerusalem?

¹³ Pasti lungun do roha ni Jahowa jala magigi do Ibana paboahon pangalaho ni bangso na dipillit i. Didok do, “Dibuat ho do akka anak dohot boru naung ditubuhon ho lao di Au. Dilehon ho do i lao gabe pelean tu akka patung i. Hape nungnga dilehon ho dirim tu nasida. Na so sae dope i di ho umbahen na dipelehon ho nasida? Diseat ho do akka anakku jala ditutung ho do nasida gabe pelean.” (Hes. 16:20, 21) Pangalaho ni nasida na massai ngeri i, sasittongna patuduhon na massai jahat do roha ni Sibolis. Marsitutu do ibana manegai pikkiran ni naposo ni Debata asa mangulahon na jahat. Alai diida Jahowa do sude na masa i. Pasti patuduon ni Jahowa do na adil Ibana. Jala sadia ngeri pe na diulahon Sibolis dohot akibat ni ulaonna i, boi do pasoonna i.​—Jaha Job 34:24.

14. Ise do kakak dohot adek ni Jerusalem di tudosan ni Jahowa i, jala ise do na unjahat sian nasida na tolu?

¹⁴ Diboto Jerusalem i do na massai jahat pangalaho ni nasida? Daong. Torus do nasida dang setia jala manomba debata na so sittong. Jahowa mandok, dao do unjorbut pangalahona sian pelacur na asing. Ai gabe ibana do manggarar halak asa olo mangulahon seks na so patut dohot ibana! (Hes. 16:34) Debata mandok dos do Jerusalem i songon “omakna”, i ma akka bangso na manomba debata na so sittong na hea mangarajai luat i. (Hes. 16:44, 45) Di tudosan i, dipaboa Jahowa do muse kakak ni Jerusalem on, i ma Samaria. Parjolo do kakakna manomba debata na so sittong sian ibana. Adong do muse adekna, i ma Sodom. Alai dihancurhon do kota on, ala ginjang do roha ni halak na disi jala jahat. Jadi dipatudu Jahowa do na unjahat pangalaho ni Jerusalem sian Samaria dohot sian Sodom! (Hes. 16:46-50) Ai toktong do dang ditangihon naposo ni Debata sipasingot na sian Ibana jala diulahon nasida do ulaon ni halak na so umboto ila.

15. Aha do tujuan ni Jahowa manghukum Jerusalem, jala aha do barita na denggan na dipaboa tu nasida?

¹⁵ Aha do muse na diulahon Jahowa? Didok ma tu Jerusalem, “Papunguokku ma sude halletmu naung dipasonang ho. . . . Pasahatonku ma ho tu tangan ni nasida.” Ro ma akka bangso na manomba debata na so sittong, na marale-ale hian dohot naposo ni Debata manghancurhon nasida. Dirampas ma perhiasan dohot arta ni nasida. Didok Jahowa do tu naposona i, “Boanon ni nasida ma godang halak lao mandangguri ho mamakke batu. Jala pamateon ni nasida ma ho pakke podang.” Attong aha do tujuan ni Jahowa manghukum nasida? Dang na lao pamateon ni Jahowa nasida sude, alai lao pasohon ulaon ni nasida na so hasea i do. Didok Debata do muse, “Ikkon usehonokku do murukku tu ho, asa sombu rimashi mangida ho. Dung i sonang ma rohakku jala dang haccit be rohakku.” Songon na tabahas di Pasal 9, nungnga ditottuhon Jahowa lao padenggatton situasi ni naposona molo dung malua nasida sian musu. Ai didok do, “Alai anggo Au, huingot do parjanjian na hubahen tu ho di tikki poso ho.” (Hes. 16:37-42, 60) Jadi dang songon naposona i, torus do diingot Jahowa parjanjian na dibahen i!​—Jaha Pangungkapon 15:4.

16, 17. (a) Boasa dang boi be tadok si Ohola dohot si Oholiba i manggombarhon Gareja? (Ida kotak “Kakak Adek na Gabe Boru-Boru na So Hasea”.) (b) Aha do parsiajaran na boi tadapot sian Hesekiel bindu 16 dohot 23?

¹⁶ Sian hata ni Jahowa di Hesekiel bindu 16, diajari do hita mamboto standar na sittong, parangena na adil, dohot asi ni rohana na massai balga. Taparsiajari do muse on di bindu 23. Marsitutu do halak Kristen mangingot hata ni Jahowa na tegas tu naposona na so setia i. Pasti dang lomo rohatta mambahen haccit roha ni Jahowa songon na dibahen Juda dohot Jerusalem. Alani i, tapastihon ma sude ulaonta asa unang tasomba debata na so sittong. Umpamana, unang ma tabahen arta dohot hepeng na uppetting di ngolutta. (Mat. 6:24; Kol. 3:5) Toktong ma hita mandok mauliate tu Jahowa, ai nungnga dipatudu Ibana asi ni rohana, nungnga dipadenggan Ibana ibadat na sittong di ari parpudi on. Dang pasombuonna be i sega. Asing ni i, nungnga dibahen Ibana ‘parjanjian na marlakku saleleng ni lelengna’ tu Israel ni Debata. (Hes. 16:60) Pasti saut do parjanjian i, ai na lao toktong do setia bangso i. Dang songon halak Israel najolo, pasti holan Jahowa do na disomba nasida. Jadi taargai ma kesempatan na dilehon Jahowa tu hita, boi gabe bagian sian naposo ni Debata na badia i!

¹⁷ Saonari, aha do na boi taboto taringot boru-boru na so hasea sian hata ni Jahowa na di bukku Hesekiel on? Tabahas ma.

18, 19. Aha do na mirip sian boru-boru na so hasea na di bukku Hesekiel tu boru-boru na so hasea na di Pangungkapon?

¹⁸ Sarupa do pakkilalaan ni Jahowa sahat tu saonari on. (Jak. 1:17) Mulai sian najolo, sogo do roha ni Debata mangida agama palsu manang boru-boru na so hasea, Babel na Balga i. Alani i ma mirip do hukuman na dibahen Jahowa tu “boru-boru na so hasea” na di bukku Pangungkapon tu boru-boru na so hasea na di bukku Hesekiel.

¹⁹ Di surirang ni si Hesekiel i, hukuman na dibahen tu boru-boru na so hasea dang langsung ro sian Jahowa. Alai, panguhuman i ro sian akka bangso na manomba debata na so sittong do. Bangso i do na mambahen naposo ni Jahowa dang setia be jala gabe dipatudos songon boru-boru na so hasea. Dos songon i ma nang agama palsu na di liat portibi on. Dipatudos do nasida songon boru-boru na so hasea, ala mangulahon seks na so patut dohot “akka raja na di tano on”. Alani i ma nasida didok marsala. Didok do di Bibel, na lao sogo ma roha ni akka na marhuaso di politik tu boru-boru na so hasea i. “Buaton ni nasida ma sude artana jala bahenon ni nasida ma ibana dang marpakkean. Allangon ni nasida ma dagingna jala tutungon ni nasida ma ibana dohot api.” Boasa boi toppu pamaretta mangulahon songon i? “Ai Debata do na mangonjar roha ni nasida lao mangulahon lomo ni rohana.”​—Pgk. 17:1-3, 15-17.

20. Sian dia do taboto na lao dihancurhon Babel saleleng ni lelengna?

²⁰ Pakkeon ni Jahowa ma bangso na di portibi on manghukum sude agama palsu, termasuk ma i agama na mangakku Kristen. Na lao dihancurhon ma sude agama i, dang na lao asi roha ni Debata tu nasida, jala dang adong be dilehon kesempatan tu nasida lao muba. Taringot Babel, di Pangungkapon didok do, “Dang idaon be ibana.” (Pgk. 18:21) Pasti las do roha ni akka suru-suruan ni Debata mangida dihancurhon sude agama palsu i. Dohonon ni nasida ma, “Puji ma Jahowa! Jala nakkok ma timus ni na manutung borua i saleleng ni lelengna.” (Pgk. 19:3) Seolah-olah ditutung ma Babel i jala dang marnaso timusna nakkok tu ginjang. Na lao hancur ma agama palsu i saleleng ni lelengna. Dang pasombuon ni Jahowa be ro muse agama palsu jala mambahen ibadat na sittong dang badia.

21. Aha do na mulai masa molo dung hancur agama palsu jala andigan do na masa i marujung?

²¹ Lao pasautton panguhumanna tu Babel na Balga, dibahen Debata ma pamaretta ni portibi on menyerang nasida. Massai penting do na masa on tu ulaon pasautton lomo ni roha ni Jahowa. Molo dung masa i, on ma na gabe tanda naung dimulai hasusaan bolon, hasusaan na so hea dope masa di tano on. (Mat. 24:21) Di ujung ni hasusaan bolon i, masa ma Armagedon, porang ni Debata mangalo portibi na jahat on. (Pgk. 16:14, 16) Songon na lao dibahas di akka pasal na mangihut, taida ma sian bukku Hesekiel aha na lao masa saleleng hasusaan bolon. Jadi parsiajaran aha do na boi taingot jala na boi taulahon sian Hesekiel bindu 16 dohot 23?

22, 23. Dung tabahas boru-boru na so hasea na di bukku Hesekiel dohot Pangungkapon, aha do pengaruhna tu naposo ni Jahowa?

²² Lomo hian do roha ni Sibolis manegai pikkiran ni halak na mangulahon ibadat na sittong. Sude cara do dipakke lao mambahen hita mandao sian ibadat na sittong jala asa sarupa pangalahotta songon boru-boru na so hasea na di bukku Hesekiel. Taingot ma, sogo do roha ni Jahowa tu naposona na so setia jala manomba debata na asing. (4 Mus. 25:11) Ikkon mandao do hita sian agama palsu jala unang ma tajama akka “na ramun” di Debata. (Jes. 52:11) Alani i, tetap ma hita setia. Molo adong pe masalah alani politik manang parsoalan di portibi on, tetap ma hita netral. (Joh. 15:19) Unang ma taihutton semangat nasionalisme, ai sarupa do i songon agama palsu na ro sian Sibolis.

²³ Na uppetting sian sudena, taingot ma sada hasangapon do boi mangihutton pengaturan na dibahen Jahowa tu ibadat na sittong, na badia, jala na ias sian agama palsu. Mandok mauliate do hita ala dipasu-pasu do halak na mangihutton pengaturan i. Toktong ma hita mandao sian agama palsu dohot sian ulaonna na so hasea i!