Mateus
2 Tubu ma Jesus di Betlehem di Judea tingki pamarentaon ni Raja Herodes.* Dung i, ro ma angka datu* na sian Timur tu Jerusalem. 2 Disungkun nasida ma, “Didia do raja ni halak Jahudi na baru tubu i? Tingki di Timur huida hami do bintangna, jala na ro do hami laho marsomba* tu ibana.” 3 Mambege i, tarsonggot ma Raja Herodes dohot sude pangisi ni huta Jerusalem. 4 Dipapungu ibana ma sude malim kepala* dohot angka siboto surat ni bangso i. Disungkun ma nasida taringot tu huta hatubuan ni Kristus.* 5 Dialusi nasida ma, “Di Betlehem do, na di luat Judea. Ai songon on do na sinurat ni panurirang, 6 ‘Alai anggo ho Betlehem na di Juda, unang ma leas roha ni angka gubernur ni Juda mangida ho, ai sian ho do ro sahalak panggomgomi na laho marmahan Israel bangsongki.’”
7 Dung i, sipsip ma si Herodes manjou angka datu* i jala disungkun ma tu nasida nandigan bintang i tarida. 8 Tingki laho borhat angka datu i tu Betlehem, didok si Herodes ma, “Lului ma dakdanak i sahat tu na dapot, molo dung jumpang, paboa ma tu ahu asa ro ahu tusi jala marsomba tu ibana.” 9 Borhat ma nasida dung dibege parenta ni raja i. Bintang na niida ni nasida tingki di Timur ma na manogu-nogu nasida sahat tu inganan ni dakdanak i. 10 Las situtu do roha ni nasida tingki mangida bintang i. 11 Dung masuk nasida tu inganan i, diida nasida ma dakdanak i rap dohot inana si Maria. Marsinggang ma nasida jala marsomba tu ibana. Dilehon nasida ma tu ibana mas, haminjon dohot mir* na diboan nasida. 12 Marhite nipi, dipasingot Debata ma nasida asa unang mulak be tu si Herodes. Alani i, mulak ma nasida tu huta ni nasida sian dalan na asing.
13 Dung mulak angka datu i, ro ma suru-suruan ni Jahowa di bagasan nipi ni si Josep mandok, “Hehe ma ho, boan ma dakdanak i rap dohot inana jala lari ma hamu tu Mesir. Disi ma hamu tading sahat tu na ro muse hatangku. Alana, luluan ni si Herodes do dakdanak i laho bunuonna.” 14 Borngin i, hehe ma si Josep jala diboan ma dakdanak i dohot inana tu Mesir. 15 Disi ma tading si Josep sahat tu na mate si Herodes. Saut ma hata ni Jahowa marhite panurirangna na mandok, “Sian Mesir do hujou anakki.”
16 Dung diboto si Herodes naung dipaoto-oto angka datu i ibana, muruk situtu ma ibana. Diparentahon ma asa dibunu sude dakdanak baoa di Betlehem dohot di humaliangna, na marumur dua taon tu toru mangihuthon hatorangan naung pinaboa ni angka datu i taringot sadihari bintang i tarida. 17 Alani i, saut ma hata ni panurirang Jeremia na mandok, 18 “Sian Rama tarbege do angguk-angguk dohot soara ni na mangandungi. Diangguhi si Rahel do ianakhonna i, jala ndang olo ibana diapuli, ai nunga mate be ianakhonna i.”
19 Dung mate si Herodes, ro ma suru-suruan ni Jahowa di bagasan nipi ni si Josep di Mesir 20 jala didok ma, “Hehe ma ho, boan ma dakdanak i rap dohot inana tu Israel, ai nunga mate be angka na marsangkap laho mambunu dakdanak i.” 21 Dung i, hehe ma si Josep jala diboan ma dakdanak i dohot inana tu Israel. 22 Alai dibege ibana ma si Arkilaus do na mamarenta di Judea manggantihon amana si Herodes, gabe mabiar ma ibana tusi. Jala nunga dipasingot Debata ibana marhite nipi asa laho tu Galilea. 23 Sahat ma ibana tu Nasaret jala tading disi. Saut ma hata ni angka panurirang na mandok, “Goaron ma ibana halak Nasaret.”*