Ulaon ni Apostel

14 Di Ikonium, masuk ma si Paulus dohot si Barnabas tu sinagoga* ni halak Jahudi. Denggan do dipasahat nasida barita i, alani i godang ma halak Jahudi dohot halak Junani na gabe porsea. 2 Alai dipamohop-mohop halak Jahudi na so porsea i ma roha ni akka halak na sian bangso na asing, asa sogo roha ni nasida tu si Paulus dohot tu si Barnabas.+ 3 Nang pe songon i, leleng do si Paulus dohot si Barnabas marbarita disi. Marhite huaso ni Jahowa,* barani do nasida marbarita. Dipakke nasida do huaso na sian Debata mambahen akka tanda halongangan* lao patoguhon barita ni nasida taringot tu asi ni roha ni Debata na massai balga i.+ 4 Alai gabe tarbagi ma penduduk ni kota i. Adong do na marpihak tu halak Jahudi jala adong do na marpihak tu akka apostel. 5 Dibahen akka halak na sian bangso na asing, akka halak Jahudi, dohot akka pamimpin ni nasida ma rencana lao mambahen na haccit tu akka apostel i. Jala naeng didangguri nasida do akka apostel i mamakke batu.+ 6 Alai tarboto ma i tu akka apostel i. Lari ma nasida tu kota Likaonia, tu Listra, tu Derbe, dohot tu akka huta na jonok tusi.+ 7 Jala toktong do marbarita na uli nasida disi.

8 Adong ma di Listra sahalak bawa na lumpu. Mulai sian tubu do ibana lumpu jala dang hea ibana boi mardalan. Tikki i hundul do ibana 9 manangihon si Paulus makkatai. Dibereng si Paulus ma doppak bawa i, diida ibana ma adong do haporseaonna jala pos do roha ni bawa i na boi ibana dipamalum.+ 10 Gogo ma didok si Paulus, “Jongjong ma ho.” Pittor jongjong ma bawa i jala mardalan.+ 11 Dung diida akka jolma i na binahen ni si Paulus i, gogo ma didok nasida di bahasa Likaonia, “Nungnga ro be akka debata tu hita songon rupa ni jolma!”+ 12 Dibahen nasida ma goar ni si Barnabas gabe Zeus jala si Paulus gabe Hermes, ala ibana do na jotjot makkatai. 13 Dung i ro ma malim ni debata Zeus tu gerbang ni kota i. Ai di jolo ni kota i do inganan pamelean tu debata Zeus. Diboan ibana ma akka lombu jantan dohot akka mahkota na sian bulung-bulung, asa rap ibana dohot akka jolma i mamelehon pelean tu si Paulus dohot tu si Barnabas.

14 Dung dibege Apostel Barnabas dohot Apostel Paulus rencana ni nasida i, diribakkon nasida ma pakkean ni nasida jala marlojong tu tonga-tonga ni jolma i. Gogo ma didok nasida, 15 “Ale akka dongan, boasa dibahen hamu songon on? Jolma na gale do hami songon hamu.+ Na lao paboahon barita na uli do hami tu hamu, asa ditadikkon hamu ulaon na so marguna sisongon on jala asa disomba hamu Debata na manoppa langit, tano, laut, dohot nasa isina.+ 16 Di tikki naung salpu, dipasombu Ibana do sude bangso mangulahon manang aha pe lomo ni roha ni nasida.+ 17 Alai sai dipatuduhon Debata do ise Ibana marhite+ akka ulaonna na denggan. Dilehon do tu hamu udan dohot musim panen.+ Diparade Ibana do sipanganon asa puas hamu jala asa las rohamuna.”+ 18 Nang pe nungnga didok songon i, massai maol do si Paulus dohot si Barnabas mangabbati akka jolma i asa unang mangalehon pelean tu nasida.

19 Alai ro ma halak Jahudi sian Antiokia dohot sian Ikonium.+ Dihasut nasida ma akka jolma i asa didangguri nasida si Paulus. Dung i disarat nasida ma ibana tu luar ni kota i, ai dirippu nasida do naung mate ibana.+ 20 Dung ro akka sisean jala jongjong di labbungna, hehe ma ibana dung i masuk ma muse tu kota i. Marsogotna i, lao ma ibana dohot si Barnabas tu Derbe.+ 21 Dibaritahon nasida ma barita na uli di kota i jala godang ma na gabe sisean. Dung i mulak ma muse nasida tu Listra, tu Ikonium, dohot tu Antiokia. 22 Dijujui nasida ma akka sisean+ na di kota i asa toktong togu haporseaon ni nasida. Didok nasida ma, “Ikkon talewati do godang hasusaan lao masuk tu Harajaon ni Debata.”+ 23 Asing ni i, dipillit si Paulus dohot si Barnabas ma akka sintua di ganup huria.+ Martangiang ma nasida, marpuasa,+ jala dipasahat nasida ma akka sintua i tu Jahowa* na dihaporseai nasida.

24 Dung i lao ma si Paulus dohot si Barnabas, dilewati nasida ma Pisidia jala sahat ma nasida di Pampilia.+ 25 Dung dibaritahon nasida hata ni Debata di Perge, lao ma nasida tu Atalia. 26 Sian i markapal ma nasida tu Antiokia. Di kota i do najolo akka dongan sahaporseaon manangiakkon nasida tu Debata asa dipasu-pasu* ulaon ni nasida, i ma ulaon naung sae diulahon nasida.+

27 Dung sahat nasida di Antiokia, dijou nasida ma sude akka dongan na di huria i marpungu. Dipaboa nasida ma naung godang ulaon na dibahen Debata marhite nasida. Jala dipaboa nasida do muse songon dia Debata mambukka dalan tu akka bangso na asing asa boi nasida porsea tu Ibana.+ 28 Leleng do si Paulus dohot si Barnabas tinggal rap dohot akka sisean i.