“Marhite Huaso ni Jahowa, Barani do Nasida Marbarita”

1, 2. Aha do na masa tu si Paulus dohot si Barnabas tikki di Listra?

GAOR ma Kota Listra ala adong dua bawa na so sian kota i pamaluppon sahalak bawa na lumpu sian mulai tubu. Si Paulus dohot si Barnabas do bawa na dua i. Heran do akka jolma, gabe diboan malim ni debata Zeus ma mahkota na sian bulung-bulung dohot lombu lao dipelehon. Ai dirippu do nasida dewa manang debata. Alai pittor diribakkon si Paulus dohot si Barnabas ma pakkeanna. Marlojong ma nasida tu tonga-tonga ni jolma i, jala diorai ma asa unang disomba nasida.

² Dung i, ro ma halak Jahudi na marsogo ni roha sian Antiokia Pisidia dohot Ikonium. Difitnah nasida ma si Paulus dohot si Barnabas. Dihasut nasida ma akka halak na di Listra. Gabe muba ma sikap ni halak i. Sebelumna naeng disomba nasida do si Paulus, hape saonari diserang jala didangguri nasida do si Paulus mamakke batu sappe pingsan. Dung i disarat nasida ma si Paulus tu luar gerbang ni kota, ala dirippu nasida nungnga mate si Paulus tikki i.

 3. Sukkun-sukkun aha do na lao tabahas di pasal on?

³ Boasa sappe terjadi on? Aha do na boi taparsiajari sian na masa tu si Barnabas, si Paulus, dohot akka halak na di Listra i? Songon dia do akka sintua maniru si Barnabas dohot si Paulus na toktong setia mangulahon tugasna jala ‘barani marbarita marhite huaso ni Jahowa’?—Ul. 14:3.

4, 5. Boasa lao si Paulus dohot si Barnabas tu Ikonium, jala aha do na masa disi?

⁴ Piga-piga ari sebelum peristiwa i, terpaksa do lao si Paulus dohot si Barnabas sian Antiokia Pisidia ala dianiaya halak Jahudi nasida. Alai dang gabe metmet rohana. ‘Dipaspasson nasida do orbuk ni patna’ tu akka halak na so olo manangihon barita na uli i. (Ul. 13:50-52; Mat. 10:14) Nang pe songon i, toktong do dame pakkilalaan ni si Paulus dohot si Barnabas, ala diboto nasida akka penentang i do na martanggung jawab di jolo ni Debata. (Ul. 18:5, 6; 20:26) Jadi las do roha ni nasida jala dilanjutton ma muse pardalananna lao marbarita na uli. Dung mardalan hira-hira 150 kilometer tu arah tenggara, sahat ma nasida di dataran tinggi na subur di antara Pegunungan Taurus dohot Pegunungan Sultan.

⁵ Di mulana, singgah ma si Paulus dohot si Barnabas di Ikonium.a Balga do pengaruh ni budaya Junani di kota on, jala on ma termasuk kota na paling penting di Provinsi Galatia. Godang do halak Jahudi na sangap dohot proselit di kota on. Songon na somal, masuk ma si Paulus dohot si Barnabas tu sinagoga, jala mulai ma nasida marbarita. (Ul. 13:5, 14) “Denggan do dipasahat nasida barita i, alani i godang ma halak Jahudi dohot halak Junani na gabe porsea.”—Ul. 14:1.

 6. Boasa boi denggan si Paulus dohot si Barnabas tikki mangajari, jala songon dia do hita boi maniru nasida?

⁶ Boasa boi denggan si Paulus dohot si Barnabas pasahatton barita na uli? Ala godang do parbinotoan ni si Paulus taringot Bibel. Godang do muse diboto ibana sejarah, surirang, dohot Patik ni si Musa na mambuktihon tutu do Jesus i Messias na dijanjihon. (Ul. 13:15-31; 26:22, 23) Molo si Barnabas, parduli do ibana tu akka halak. (Ul. 4:36, 37; 9:27; 11:23, 24) Jadi nasida dang mangandalhon dirina sandiri, alai “huaso ni Jahowa” do diandalhon nasida. Songon dia do hamu boi maniru nasida tikki marbarita na uli? Ulahon ma on: Takkas ma parsiajari Hata ni Debata. Lului ma akka ayat na boi mambahen halak tertarik tu barita na tapasahat. Lului ma cara na cocok lao mangapuli akka halak na tajuppangi. Jala sude na taajarhon i ikkon berdasarhon Hata ni Jahowa, dang parbinotoanta sandiri.

 7. (a) Boha do tanggapan ni akka halak tu barita na uli? (b) Molo adong keluargamuna na sogo rohana ala dijalo hamu barita na uli, aha do na ikkon diingot hamu?

⁷ Alai, dang sude halak di Ikonium lomo rohana mambege hata ni si Paulus dohot si Barnabas i. Didok di Bibel, “Dipamohop-mohop halak Jahudi na so porsea i ma roha ni akka halak na sian bangso na asing, asa sogo roha ni nasida tu si Paulus dohot tu si Barnabas.” Alai dihilala si Paulus dohot si Barnabas, porlu do dipaboa nasida na sasittongna. Jadi “leleng do si Paulus dohot si Barnabas marbarita disi”, jala “barani do nasida marbarita”. Ujungna, “gabe tarbagi ma penduduk ni kota i. Adong do na marpihak tu halak Jahudi jala adong do na marpihak tu akka apostel”. (Ul. 14:2-4) Saonari pe, adong do na merasa barita na uli i boi mambahen halak marsada, alai na asing marpikkir mambahen parbadaan do i. (Mat. 10:34-36) Molo adong keluargamuna na sogo rohana ala dijalo hamu barita na uli, olo do ra ala na terpengaruh nasida tu barita na paroa-roahon manang memfitnah Saksi Jahowa. Jadi toktong ma hamu burju tu nasida, asa terbukti na so tutu fitnah i. Ujungna, gabe lambok ma roha ni nasida.—1 Ptr. 2:12; 3:1, 2.

 8. Boasa lao si Paulus dohot si Barnabas sian Ikonium, jala aha do na boi taparsiajari sian nasida?

⁸ Dang sadia leleng, berencana ma akka penentang na di Ikonium mandangguri si Paulus dohot si Barnabas mamakke batu. Dung diboto si Paulus dohot si Barnabas i, diputusson nasida ma marbarita tu daerah na asing. (Ul. 14:5-7) Hita pe akka parbarita Harajaon, porlu do marbisuk songon nasida. Molo adong na mangarehei hita tikki marbarita, tetap ma hita barani. (Plp. 1:7; 1 Ptr. 3:13-15) Alai molo nungnga adong ancaman kekerasan, porlu do tahindari i asa unang membahayahon ngolutta dohot donganta na asing.—Poda 22:3.

9, 10. Didia do Kota Listra, jala aha do na taboto taringot penduduk ni kota i?

⁹ Lao ma si Paulus dohot si Barnabas tu Listra, i ma sada daerah militer Romawi na daona hira-hira 30 kilometer di sabola barat daya ni Ikonium. Balga do pengaruh ni Kota Antiokia Pisidia tu Listra. Alai molo di Listra on dang pola godang halak Jahudi. Marbahasa Likaonia do akka halak disi, nang pe godang sian nasida boi marbahasa Junani. Mungkin ala dang adong sinagoga di kota i, gabe di tempat umum ma si Paulus dohot si Barnabas marbarita. Tikki di Jerusalem, hea do si Petrus pamaluppon halak na cacat sian mulai tubu. Alani mukjizat i, gabe godang ma halak na porsea. (Ul. 14:8-10) Alai berbeda do reaksi ni halak di Listra tikki adong na lumpu sian mulai tubu dipamalum si Paulus.—Ul. 3:1-10.

¹⁰ Songon naung diceritahon di mula ni pasal on, tikki diida akka halak Listra bawa na lumpu i mardalan, gabe sala paham do nasida. Gabe didok nasida do si Barnabas i Zeus, i ma dewa na disomba nasida. Jala didok do si Paulus Hermes, i ma anak ni Zeus jala juru bicara ni akka dewa. (Ida ma kotak “Kota Listra Dohot Panombaon tu Zeus Dohot Hermes”.) Alai berupaya do si Barnabas dohot si Paulus paboahon tu akka halak, molo nasida makkatai jala mambahen mukjizat dang marhite huaso ni akka dewa-dewi, alai marhite huaso ni Jahowa Debata na sittong i do.—Ul. 14:11-14.

11-13. (a) Aha do na didok si Paulus dohot si Barnabas tu akka halak na di Listra? (b) Parsiajaran aha do na boi tadapot sian hata ni si Paulus dohot si Barnabas i?

¹¹ Di situasi na songon i, berupaya do si Paulus dohot si Barnabas paboahon na sala do na diulahon nasida i. Sian kejadian on boi ma taida songon dia cara na denggan lao marbarita tu akka halak na manomba dewa-dewi. Taparrohahon ma songon dia si Paulus dohot si Barnabas mencapai hati ni akka halak. Ai didok nasida do, “Ale akka dongan, boasa dibahen hamu songon on? Jolma na gale do hami songon hamu. Na lao paboahon barita na uli do hami tu hamu, asa ditadikkon hamu ulaon na so marguna sisongon on jala asa disomba hamu Debata na manoppa langit, tano, laut, dohot nasa isina. Di tikki naung salpu, dipasombu Ibana do sude bangso mangulahon manang aha pe lomo ni roha ni nasida. Alai sai dipatuduhon Debata do ise Ibana marhite akka ulaonna na denggan. Dilehon do tu hamu udan dohot musim panen. Diparade Ibana do sipanganon asa puas hamu jala asa las rohamuna.”—Ul. 14:15-17.

¹² Aha do na boi taparsiajari sian hata ni nasida i? Na parjolo, dang dianggap si Paulus dohot si Barnabas untimbo nasida sian akka halak disi. Dang anggar jago nasida, justru serep do roha ni nasida. Diakkui nasida do adong hahurangan ni nasida, songon akka halak na manomba dewa-dewi i. Memang nungnga dapot ni si Paulus dohot si Barnabas tondi parbadia, nga dipalua sian ajaran na so sittong, jala nga mandapot harapan lao mamaretta rap dohot Kristus. Alai diboto nasida do akka halak na di Listra pe boi do mandapot i sude molo olo nasida mangihutton Kristus.

¹³ Boha do cara pandangta tu akka halak na takabari? Tatiru do si Paulus dohot si Barnabas, manganggap nasida sarupa songon hita? Tapatudu do na tulus rohatta mangurupi nasida, jala dang asa mandapot pujian sian jolma? Adong do teladan na denggan taringot on, i ma si Charles Taze Russell. Sahalak guru na malo do ibana. Jala ibana do na manguluhon ulaon marbarita di ujung ni abad 19 sahat tu mula ni abad 20. Alai hea do disurat ibana, “Dang olo hami dipuji manang dipasangap alani akka sijahaon na dibahen hami. Jala dang olo hami didok Pandita manang Rabbi.” Serep do roha ni donganta si Russell, tarida ma na ditiru ibana si Paulus dohot si Barnabas. Jadi hita pe ikkon songon i do, tujuanta marbarita dang na lao pasangappon diritta sandiri, alai mangurupi akka halak asa ‘manomba Debata’.

14-16. Aha do muse na boi taparsiajari sian hata ni si Paulus dohot si Barnabas tu akka halak na di Listra?

¹⁴ Adong do muse parsiajaran na paduahon na tadapot sian hata ni nasida i. Mura do si Paulus dohot si Barnabas menyesuaihon diri. Dang songon halak Jahudi dohot proselit na di Ikonium, molo halak Listra i hurang do parbinotoanna taringot Surat na Badia manang taringot hubungan ni Debata dohot bangso Israel. Alai, akka halak na di Listra i godangan partani do. Denggan do iklim di Listra, jala subur do tano disi. Jadi sian akka musim dohot hasil panen ni nasida, boi do diida nasida akka sifat ni Debata na manoppa saluhutna. Jadi dipakke si Paulus dohot si Barnabas ma topik on asa boi martukkar pikkiran dohot akka halak disi.—Rom 1:19, 20.

¹⁵ Hita pe ikkon berupaya do menyesuaihon diri. Pikkirhon ma on: Adong ma sahalak partani naeng manuan boni tu piga-piga ladangna. Sarupa do boni na dipakke ibana, alai marasing-asing do kondisi ni tanona. Adong na subur jala nungnga boi langsung disuan boni disi. Alai adong do na karas, jadi porlu do upaya na umbalga lao mengolah tano i asa boi disuan boni i. Songon i ma nang hita. Sarupa do boni na tasuan, i ma barita Harajaon sian Hata ni Debata. Alai songon si Paulus dohot si Barnabas, ikkon berupaya do hita mangattusi situasi dohot latar belakang agama ni akka halak na tajuppangi. Dung i boi ma hita menyesuaihon caratta marbarita tu nasida.—Luk. 8:11, 15.

¹⁶ Adong do parsiajaran na patoluhon na tadapot sian si Paulus, si Barnabas, dohot halak Listra i. Nang pe nungnga berupaya hita paboahon barita na uli, olo do sipata dang tubu boni i, manang madabu di tano na marbatu-batu. (Mat. 13:18-21) Molo i do na masa, unang ma menyerah. Alana hea do si Paulus paingotton akka sisean na di Rom, “Ganup do hita [termasuk halak na takabari] ikkon mampartanggung jawabhon parniulaotta di jolo ni Debata.”—Rom 14:12.

17. Dung sae sian Derbe tudia ma muse si Paulus dohot si Barnabas, jala boasa?

¹⁷ Dung disarat si Paulus tu luar ni Kota Listra, dirippu halak do nga mate ibana. Ro ma akka sisean mandapotton ibana, gabe marborngin ma muse ibana di kota i. Marsogotna i, lao ma si Paulus dohot si Barnabas mardalan sappe 100 kilometer tu Kota Derbe. Boi ma tabayakkon pasti gale dope si Paulus di pardalanan, alana baru dope ibana didangguri pakke batu. Alai dang menyerah nasida. Dung sahat di Derbe, marbarita ma nasida jala “godang ma na gabe sisean”. Dung sae sian i, boi hian do pittor mulak nasida tu Antiokia Siria, ala nga unjonok be nasida tusi. Alai ‘mulak do muse nasida tu Listra, tu Ikonium, dohot tu Antiokia [Pisidia]’. Boasa? Ala naeng ‘patoguhon haporseaon ni akka sisean’ na di kota i. (Ul. 14:20-22) Luar biasa do teladan ni si Paulus dohot si Barnabas on! Massai penting do di nasida ulaon di huria jala uppetting do i sian dirina sandiri. Di tikkitta saonari, diihutton akka pengawas wilayah dohot utusan injil do teladan ni nasida.

18. Aha do na ikkon diulahon akka sintua tikki naeng mangusulhon sasahalak gabe sintua?

¹⁸ Si Paulus dohot si Barnabas dang holan patoguhon akka sisean. Alai dilantik nasida do “akka sintua di ganup huria”. Nang pe “marhite tondi parbadia” si Barnabas dohot si Paulus mangulahon i, alai tetap do nasida martangiang, marpuasa, jala “dipasahat nasida ma akka sintua i tu Jahowa”. (Ul. 13:1-4; 14:23) Pola on do na diihutton halak Kristen saonari. Tikki naeng mangusulhon sahalak donganta lao gabe sintua, jolo martangiang do punguan ni akka sintua. Jala ditinjau nasida ma nungnga dipenuhi donganta on akka syarat na di Bibel manang na dang. (1 Tim. 3:1-10, 12, 13; Tit. 1:5-9; Jak. 3:17, 18; 1 Ptr. 5:2, 3) Nang pe nungnga leleng sasahalak tardidi, dang i na manottuhon molo ibana memenuhi syarat. Alai sian pakkataionna, pangalahona, dohot reputasina do boi diida na diandalhon ibana do tondi parbadia di ngoluna manang na dang. Jadi akka persyaratan na di Bibel i ma na manottuhon boi do ibana gabe pengawas di huria. (Gal. 5:22, 23) Pengawas wilayah ma na martanggung jawab mangalantik sintua.—Bandingkon tu 1 Timoteus 5:22.

19. Aha do na ikkon manat dipikkirhon akka sintua, jala songon dia do nasida maniru si Paulus dohot si Barnabas?

¹⁹ Ikkon manat do akka sintua mamikkirhon cara ni nasida mangurus huria Kristen, alana ikkon martanggung jawab do nasida tu Debata. (Heb. 13:17) Ikkon songon si Paulus dohot si Barnabas do akka sintua di huria. Ikkon boi do gabe teladan di ulaon marbarita, pakkataionna patoguhon na asing, jala ikkon uppetting do di ngolu ni nasida ulaon di huria sian dirina sandiri.—Plp. 2:3, 4.

20. Aha do manfaatna molo tajaha pengalaman ni akka donganta na setia?

²⁰ Dung mulak si Paulus dohot si Barnabas tu Antiokia Siria, dipaboa nasida ma naung “godang ulaon na dibahen Debata marhite nasida. Jala . . . songon dia Debata mambukka dalan tu akka bangso na asing asa boi nasida porsea tu Ibana”. (Ul. 14:27) Jadi molo tajaha pengalaman ni akka donganta na setia jala taida songon dia Jahowa mamasu-masu upaya ni nasida, gabe lam barani ma hita marbarita na uli.