Ulaon ni Apostel

18 Dung i borhat ma si Paulus sian Atena jala lao ma ibana tu Korint. 2 Pajuppang ma ibana disi dohot si Akuila.+ Halak Jahudi do ibana na tubu di Pontus. Baru ro do ibana dohot si Priskilla istrina sian Italia. Ai nungnga diparettahon Kesar Klaudius asa sude halak Jahudi maninggalhon kota Rom. Alani i, didapotton si Paulus ma si Akuila dohot si Priskilla. 3 Tinggal ma ibana di jabu ni nasida jala rap karejo dohot nasida.+ Ai rap sibahen tenda do nasida. 4 Ganup ari Sabat,+ marjamita* do si Paulus di sinagoga.*+ Marsitutu do ibana mambahen halak Jahudi dohot halak Junani asa porsea tu barita na pinaboana.

5 Dung ro si Silas+ dohot si Timoteus+ sian Makedonia, dipakke si Paulus ma sude tikkina lao paboahon hata ni Debata tu akka jolma. Takkas do dipatorang ibana tu halak Jahudi na tutu Jesus i Kristus.+ 6 Alai sai dialo jala diissaki nasida do si Paulus. Ujungna, dipaspasson ibana ma pakkeanna+ jala ninna ma tu nasida, “Manang na mahua hamu, hamu ma na martanggung jawab disi,+ ias do au sian mudarmuna.+ Mulai sian saonari lao nama au tu bangso na asing.”+ 7 Dung i kaluar ma ibana sian sinagoga i, lao ma ibana tu jabu ni si Titius Justus. Sahalak sisomba Debata do ibana jala di labbung ni sinagoga i do jabuna. 8 Alai anggo si Krispus+ pamimpin ni sinagoga i rap dohot sude donganna sajabu gabe porsea do tu Tuan i. Jala godang do halak Korint na mambege barita na uli i gabe porsea jala tardidi. 9 Di tikki borngin, mandapot parnidaan ma si Paulus, didok Tuan i ma tu ibana, “Unang pola mabiar ho, toktong ma ho marbarita, jala unang ma ho mandele. 10 Sai na donganakku do ho,+ jala dang adong manang ise pe na boi parohon jea tu ho. Ai godang do halak di kota on na lao porsea tu au.” 11 Disi ma si Paulus tinggal saleleng sada satonga taon jala diajarhon ibana do hata ni Debata tu nasida.

12 Dung gabe gubernur* si Gallio di Akaya, marsada ma halak Jahudi mangalo si Paulus jala diboan ma ibana tu jolo ni pengadilan.* 13 Didok nasida ma, “Ditogihon ibana do akka jolma asa manomba Debata marhite dalan na maralo tu patik.” 14 Tikki naeng makkatai si Paulus, didok si Gallio ma tu akka halak Jahudi i, “Hamu akka halak Jahudi! Molo tutu do diulahon ibana na sala manang na jahat, olo do au manangihon hamu. 15 Alai molo alani mamparsoalhon hata, akka goar, dohot patikmuna,+ hamu sandiri ma na pasaehon i. Dang olo au gabe hakim tu parsoalan sisongon i.” 16 Dung i disuru ibana ma akka jolma i lao sian pengadilan i. 17 Gabe sude ma nasida manakkup si Sostenes+ pamimpin ni sinagoga i. Dipukkuli nasida ma ibana di jolo ni pengadilan i. Alai nang pe songon i dang parduli si Gallio.

18 Dung salpu piga-piga ari si Paulus tinggal disi, dipaboa ibana ma tu akka dongan na disi na lao borhat nama ibana tu inganan na asing. Markapal ma ibana rap dohot si Priskilla dohot si Akuila tu Siria. Di Kenkrea,+ digusting si Paulus ma obukna alani sada janji na dibahen ibana tu Debata. 19 Dung sahat nasida di Epesus, ditinggalhon si Paulus ma donganna na asing i. Lao ma ibana tu sinagoga, diajari ibana ma halak Jahudi jala diurupi ibana ma nasida mangattusi isi ni Surat na Badia.+ 20 Nang pe dipangido nasida asa ulleleng si Paulus tinggal disi, alai dang olo ibana. 21 Dipaboa ibana ma tu nasida na ikkon lao nama ibana. Ninna ma, “Molo lomo roha ni Jahowa,* ro do au muse manjuppangi hamu.” Dung i markapal ma ibana sian Epesus, 22 jala sahat ma di Kaesarea. Lao ma ibana tu Jerusalem, dijuppangi ibana ma satokkin akka dongan na di huria i. Sian i lao ma ibana tu Antiokia.+

23 Dung piga-piga leleng si Paulus disi, borhat ma ibana jala lao tu akka kota na di Galatia dohot di Prigia.+ Dipatogu ibana ma sude sisean na adong disi.+

24 Adong ma halak Jahudi na ro tu Epesus. Si Apollos+ do goarna jala tubu di Aleksanderia do ibana. Massai malo do ibana makkatai jala godang do diboto ibana taringot tu Surat na Badia i. 25 Nungnga diajarhon tu ibana dalan ni Jahowa.* Diurupi tondi parbadia do ibana jala songon api na marsigorgor do pakkilalaanna lao marbarita. Sittong do sude na diajarhon ibana taringot tu Jesus, alai holan pandidion ni si Johannes dope na takkas diboto ibana. 26 Dung i mulai ma ibana barani marbarita di sinagoga. Tikki dibege si Priskilla dohot si Akuila+ ibana mangajari, ditogihon nasida ma ibana makkatai jala dang dibege akka jolma i. Dipatorang nasida ma dalan ni Debata tu ibana asa lam takkas diattusi ibana. 27 Ala naeng lao do si Apollos tu Akaya, gabe dibahen akka dongan na di Epesus ma surat tu akka sisean na disi. Dipangido nasida do asa denggan dijalo nasida si Apollos. Dung sahat ibana disi, godang do diurupi ibana akka halak naung porsea alani asi ni roha ni Debata na massai balga i. 28 Barani do ibana patuduhon di jolo ni godang halak na sala ajaran ni halak Jahudi i. Dipatuduhon ibana do takkas marhite Surat na Badia, Jesus i do Kristus.+