Joel
2 Ombus ma tarompet na sian tanduk di Sion!+
Paboa ma na lao masa nama porang di dolokku na badia i.
Lok ma hitir-hitir sude pangisi ni luat i,*
Ai nungnga ro be ari ni Jahowa!+ Jala nungnga jonok be i!
2 Ari na holom do i jala massai holom,+
Marombun do di tikki i jala golap situtu,+
Makkolom do di ari i, ai ditutupi akka dolok do mataniari bissar.
Dung i adong ma sada bangso na gogo jala na so habilangan godangna.+
Dang hea dope adong bangso na songon i,
Jala dang na lao adong be bangso na songon i
Sahat tu saleleng ni lelengna.
3 Ditutung api do sude na di jolona,
Jala ditutung api na marsigorgor+ do sude na di pudina,
Songon Taman Eden+ do tano na di jolona,
Alai songon tano na harsang do tano na di pudina.
Dang adong nanggo sada pe na malua.
4 Songon bohi ni hoda do bohi ni nasida,
Jala songon parlojong ni hoda na marporang+ do parlojong ni nasida.
5 Tikki mangakkat nasida di pussu ni akka dolok, songon soara ni kareta porang do i.+
Mardarak-darak do i songon soara ni durame na ditutung.
Marbaris do nasida songon tentara na marbaris lao marporang.+
6 Gabe susa do akka bangso dibahen nasida,
Jala gabe puccat do bohi ni akka bangso i.
7 Menyerang do nasida songon tentara,
Dijakkit nasida do tembok songon tentara,
Mardalan do nasida di dalanna be,
Toktong do nasida di dalanna i, dang marbelok.
8 Dang marsionjaran nasida,
Maju do nasida di dalanna be,
Molo adong sian nasida na madabu ala hona panah,
Na asing toktong do mardalan di dalanna be.
9 Masuk ma nasida tu kota, mardalan ma nasida di atas ni tembok.
Dijakkiti nasida ma jabu jala masuk ma nasida sian jandela songon panakko.
10 Hutur-hutur ma tano na di jolo ni nasida, jala hutur-hutur ma nang langit.
Gabe golap ma mataniari dohot bulan,+
Jala dang marsinondang be akka bintang.
11 Marsurak ma Jahowa di jolo ni akka tentarana,+ ai massai godang do tentarana+
Debata do na pasautton hatana, jala massai gogo do Ibana.
Ai ari na balga do ari ni Jahowa jala parohon biar ni roha,+
Ise ma na boi martahan tikki ro ari i?+
12 Didok Jahowa ma, “Saonari mulak ma hamu tu Au sian nasa rohamuna.+
Marpuasa ma hamu,+ mangandungi, jala mangangguki.
13 Unang ma holan abitmuna na diribak hamu,+ dohot ma rohamuna ribak hamu.+
Mulak ma hamu tu Jahowa Debatamuna,
Ai na burju do Ibana jala parasi roha, lambat do Ibana tarrimas,+ jala gok do holong ni roha* na pinatuduna,+
Dung i paubaonna ma rohana, asa unang diparo jea tu hamu.
14 Anggiat ma manolsoli Ibana jala dipauba keputusanna.+
Jala anggiat ma dipasu-pasu Ibana hamu,
Asa boi lehononmuna pelean sipanganon* dohot pelean siinumon tu Jahowa Debatamuna.
15 Ombus ma tarompet na sian tanduk di Sion,
Bahen hamu ma paretta asa marpuasa, jou ma akka halak asa marpungu.+
16 Papungu ma bangso i, pabadia ma nasida.+
Papungu ma akka bawa naung matua,* akka dakdanak, dohot akka poso-poso na manusu dope.+
Lok ma kaluar akka pengantin bawa sian kamarna, jala lok ma kaluar pengantin borua sian kamarna.
17 Lok ma mangandungi akka malim na marhobas tu Jahowa di holang-kolang ni terras dohot langgatan.+
Lok ma didok nasida,
‘Ale Jahowa, asi ma roham tu bangsomon,
Unang ma loas dileai bangso na pinillitmon,
Unang ma loas dirajai bangso na asing nasida,
Unang ma sappe didok bangso na asing, “Didia do Debata ni nasida i?”’+
18 Patuduon ni Jahowa do na holong rohana tu luatna i.
Jala patuduonna do asi ni rohana tu bangsona i.+
19 Dokkonon ni Jahowa ma tu bangsona i,
‘Lehonokku ma tu hamu gandum, anggur na baru, dohot miak.
Butong ma hamu sude,+
Dang loasokku be hamu dileai di tonga-tonga ni bangso na asing.+
20 Usirokku ma akka tentara na sian utara asa dao sian hamu,
Usirokku ma nasida asa marserak di tano na koring jala na harsang,
Tu laut na di sabola timur* ma barisan ni nasida na di jolo
Jala tu laut na di barat* ma barisan ni nasida na di pudi.
Gabe bau ma bakke ni nasida,
Jala sahat ma bau ni bakke ni nasida tu sude inganan,+
Ai bahenon ni Debata do akka ulaon na palongang roha.
21 Ale tano, unang ma mabiar ho,
Marlas ni roha situtu ma ho, ai bahenon ni Jahowa ma akka ulaon na palongang roha.
22 Ale akka binatang buas na di ladang, unang ma mabiar hamu,
Ai bahenokku ma gabe lomak akka inganan panjappalan.+
Bahenokku ma marparbue akka hau,+
Bahenokku ma gok parbue ni hau ara dohot parbue ni hau anggur.+
23 Hamu ale akka anak ni Sion, marlas ni roha situtu ma hamu alani Jahowa Debatamuna,+
Parookku ma tu hamu musim udan na parjolo na dihaporluhon hamu,
Parookku ma tu hamu udan na doras,
Parookku ma musim udan na parjolo dohot musim udan na parpudi* songon najolo.+
24 Gok ma gandum di akka inganan pardegean,
Jala marusean ma anggur na baru dohot miak di inganan pamoroan.+
25 Husuru do najolo tu hamu tentarakku na godang i,+
Husuru do sihapor* na parjolo, sihapor na so marhabong, sihapor na mokkus, dohot sihapor na balga* lao pasudahon suan-suananmuna.
Alai paulakkokku ma muse akka suan-suananmuna naung habis di akka taon i.
26 Na lao mangan ma bangsokku sappe butong,+
Jala pujionmuna ma goar ni Jahowa Debatamuna,+
Ibana do na mambahen tu hamu akka ulaon na palongang roha,
Dang na lao pailaonna be bangsokku.+
27 Dung i botoonmuna ma na di tonga-tonga ni Israel do Au maringanan,+
Au do Jahowa Debatamuna,+ dang adong na asing!
Dang na lao dipaila be bangsokki.
28 Dung i, usehonokku ma tondi parbadiakku+ tu sude jolma na ro sian marragam bangso,
Gabe dohot ma akka anak dohot borumuna paboahon janjikku,
Mandapot nipi ma akka halak naung matua,
Jala mandapot parnidaan ma akka doli-doli.+
29 Gari tu hatobanku bawa dohot tu hatobanku borua pe,
Usehonokku do tondi parbadiakku tu nasida di tikki i.
30 Bahenokku ma akka tanda halongangan* di langit dohot di tano on,
Jala adong ma disi mudar, api, dohot timus na hapal.+