Ulaon ni Apostel

28 Dung sahat hami di darat, disi pe asa huboto hami Malta+ do goar ni pulo i. 2 Massai burju do penduduk ni pulo i tu hami. Denggan do hami dijalo nasida jala dipagalak nasida do api ala nungnga mulai ro udan jala massai ngali. 3 Dipapungu si Paulus ma akka hau jala dipambahen ma i tu api i. Toppu ma kaluar ulok na marbisa alani mohop ni api i jala diturbing ma tangan ni si Paulus. 4 Tikki diida penduduk ni pulo i gattung-gattung ulok i di tangan ni si Paulus, didok nasida ma tu akka donganna, “Sibunu jolma do bawa on. Ai nang pe selamat ibana sian bahaya na di laut, alai dang diloas Hatigoran* i ibana mangolu.” 5 Dipaspasson si Paulus ma ulok i tu api jala dang manang mahua ibana. 6 Alai dirippu nasida do gabe bongkak tangan ni si Paulus i. Molo so i, toppu ma ibana dabu laos mate. Dung leleng dipaima nasida jala diida nasida dang adong na masa tu ibana, gabe muba ma pikkiran ni nasida jala didok ma si Paulus debata.

7 Dang dao sian inganan i, adong do disi ladang appuna ni si Publius pamimpin na di pulo i. Denggan do dijalo ibana hami jala gabe tamuna ma hami saleleng tolu ari. 8 Di tikki i, peak do bapak ni si Publius di podoman. Ai marsahit mohop do ibana dohot disentri. Didapotton si Paulus ma ibana, dibahen ma tanganna tu atasna huhut ditangiakkon. Dung i dipamalum ma ibana.+ 9 Alani i, gabe marroan ma sude na marsahit di pulo i mandapotton si Paulus jala dipamalum ma nasida.+ 10 Diboan nasida do godang hadiah lao mandok mauliate tu hami. Tikki naeng borhat, dilehon nasida do akka na porlu di hami saleleng di pardalanan.

11 Dung tolu bulan, borhat ma hami sian pulo i mamakke kapal na sian Aleksanderia. Na ro do kapal i tu pulo i jala disi do i saleleng musim dingin. Dibahen do lambang ni “Akka Anak ni Zeus” di kapal i. 12 So ma hami di pelabuhan na di Sirakus jala disi ma hami tolu ari. 13 Sian i manopi-nopi ma hami marlayar jala sahat ma di Regium. Marsogotna i, mangullus ma alogo sian selatan jala dung dua ari sahat ma hami di Potioli. 14 Pajuppang ma hami disi dohot akka dongan sahaporseaon. Dijujui nasida do hami asa tinggal disi saleleng pitu ari. Dung i lao ma hami muse tu Rom. 15 Dibege akka dongan na di Rom ma naung ro hami, gabe ro ma nasida mandapotton hami sahat tu Tolu Kode* na di Pasar Appiporum. Dung diida si Paulus nasida, didok ibana ma mauliate tu Debata jala lam tamba ma pos ni rohana.+ 16 Ujungna sahat ma hami di Rom. Diloas do disi tinggal si Paulus sahalakna dohot sahalak tentara na manjaga ibana.

17 Dung tolu ari, dijou si Paulus ma marpungu akka halak Jahudi na sangap. Dung marpungu nasida, didok si Paulus ma, “Hamu akka dongan, nang pe dang adong hualo bangsotta manang hasomalan ni akka omputta,+ alai dipenjarahon do au di Jerusalem jala dipasahat tu halak Rom.+ 18 Dung dipareso,+ naeng dipalua halak Rom i ma au. Ai dang adong na sala ulaonku dapot ni nasida na mambahen au patut dihukum mate.+ 19 Nang pe songon i, dialo halak Jahudi do keputusan i. Terpaksa ma naik banding au tu Kesar.+ Alai huulahon pe songon i, dang na lao mangaluhon bangsokku au disi. 20 Alani i do hupangido asa pajuppang jala makkatai au dohot hamu. Ai diratte pe au, holan alani sasahalak na dipaima-ima bangso Israel i do.”+ 21 Didok nasida ma tu si Paulus, “Dang adong hujalo hami surat taringot tu ho sian Judea. Jala dang adong akka dongan na ro sian i na paboahon taringot tu ho manang mandok na roa taringot tu ho. 22 Alai naeng dibege hami do songon dia pandapotmu. Ai huboto hami do, sude do halak mangalo sekte on+ manang didia pe.”+

23 Dung i ditottuhon nasida ma sada ari lao pajuppang dohot si Paulus. Jala tamba do godang ni nasida na ro tu inganan ni si Paulus i. Mulai sian manogot sahat tu borngin, takkas ma dipatorang ibana tu nasida taringot tu Harajaon ni Debata. Dipatorang ibana ma i sian Patik ni si Musa+ dohot sian na Sinurat ni Akka Panurirang*+ asa porsea nasida tu Jesus.+ 24 Adong do na porsea tu na dipatorangna i, alai na deba nai dang porsea. 25 Gabe marsalisi ma nasida sama nasida. Ditadikkon nasida ma inganan i, alai huhut ma didok si Paulus tu nasida songon on,

“Sittong ma hata na didok tondi porbadia tu akka ompumuna marhite Panurirang Jesaya. 26 Ai ninna do, ‘Lao ma ho jala dok ma tu bangso i, “Dibege hamu do nian, alai dang diattusi hamu lapatanna. Diida hamu do nian, alai dang diattusi hamu.+ 27 Ai nungnga tutup be roha ni bangso on. Dibege pinggol ni nasida do nian, alai dipanengel-nengel. Ditutup nasida do matana gabe dang marnida, dang marbinege pinggol ni nasida, dang mangattusi nang rohana, jala dang mulak nasida tu au. Alani i, dang pamalumokku nasida.”’+ 28 Alai boto hamu ma, nungnga dipaboa be tu akka bangso na asing+ barita taringot songon dia Debata mambahen selamat akka jolma. Jala ditangihon nasida do i.”+ 29* ——

30 Jadi dua taon ma si Paulus tinggal di jabu na disewana i.+ Las do rohana manjalo sude halak na ro manjuppangi ibana. 31 Barani+ do ibana paboahon taringot tu Harajaon ni Debata dohot mangajarhon taringot tu Tuan Jesus Kristus tu nasida. Jala dang adong biar ni rohana mangulahon i.