Rut
3 Dung i didok si Naomi ma tu si Rut, “Inang, boha molo hulului sahalak bawa na lao gabe suamim,+ asa unang susa be ngolum? 2 Si Boas na paloasson ho rap dohot akka borua parkarejona i, keluargatta do ibana.+ Borngin on, di inganan pardegean do ibana manampi barli.* 3 Alani i maridi ma ho jala pakke ma miak na angur. Pakke ma bajum na umbagak jala lao ma ho tu inganan pardegean i. Alai unang diboto si Boas na disi ho sahat tu na sae ibana mangan dohot minum. 4 Parrohahon ma didia ibana modom. Dung modom ibana, dapotton ma jala bukka ma salimut na di patna i. Modom ma ho di labbung ni patna i. Dung i, paboaonna ma tu ho manang aha na ikkon ulahononmu.”
5 Didok si Rut ma, “Huulahon pe inang sude na nidokmi.” 6 Dung i lao ma si Rut tu inganan pardegean i jala diulahon ibana do sude hata ni simatuana i. 7 Tikki i, mangan minum do si Boas jala las do rohana. Lao ma ibana modom tu labbung ni barli naung dipapungu. Dung i sipsip ma ro si Rut, dibukka ma salimut na di pat ni si Boas jala modom ma ibana disi. 8 Di tonga borngin, ngalian ma si Boas. Diida ibana ma tu patna jala diida ma adong sahalak borua na modom disi. 9 Didok ibana ma, “Ise do ho?” Didok si Rut ma, “Au do i amang, si Rut naposom. Urupi ma au,* ala amang do na marhak manobus* hami.”+ 10 Didok si Boas ma tu si Rut, “Sai dipasu-pasu Jahowa ma ho boru. Ai umbalga do holong* na pinatudum saonari sian holong na pinatudum di mulana i.+ Dang dilului ho doli-doli na mora manang na pogos. 11 Unang pola mabiar ho boru. Huulahon pe sude na nidokmi.+ Sude do halak di kota on mamboto halak na burju do ho. 12 Tutu, boi do au manobus* hamu,+ alai adong dope keluargatta na ussolhot na marhak manobus hamu.+ 13 Dison ma jo ho borngin on. Molo olo ibana manobus hamu, denggan ma i. Alai molo dang olo ibana manobus hamu, songon pastina Jahowa mangolu,* au ma na manobus hamu.+ Dison ma jo ho modom sahat tu manogot.”
14 Jadi modom ma si Rut di labbung ni pat ni si Boas sahat tu manogot. Alai golap dope ari nungnga dungo ibana. Ai didok si Boas do, “Unang adong na mamboto na ro ho tu pardegean on.” 15 Didok ibana ma muse, “Boan ma tuson mandarmi jala paherbang ma.” Dipaherbang si Rut ma mandarna, dibahen si Boas ma tusi hira-hira 20 kilogram* barli, jala dilehon ma i tu si Rut. Dung i lao ma si Boas tu kota.
16 Dung mulak si Rut, disukkun simatuana ma, “Boha do nakkin* inang?” Dung i dipaboa si Rut ma sude na dibahen si Boas tu ibana. 17 Didok si Rut ma muse, “Didok do tu au, ‘Ikkon adong do boanonmu tu simatuam.’ Jadi dilehon ibana do hira-hira 20 kilogram barli tu au.” 18 Dung i didok si Naomi ma, “Saonari tapaima ma inang aha na lao masa. Ai dang sonang roha ni si Boas molo dang sae bahenonna i sadari on.”