”Boruboru Parroha na Denggan”

1, 2. (a) Karejo na songon dia do diulahon si Rut? (b) Songon dia do pangkilalaanna tu Patik ni Debata dohot mangida naposoNa?

MARSINGGANG ma si Rut di lambung ni eme na pinapunguna. Nunga bot ari jala nunga mulak angka parhauma tu Betlehem. Loja do dihilala si Rut ala nunga sian manogot ibana karejo. Alai, dipaspas ibana dope eme i jala dipapungu. Nang pe loja dihilala, las do rohana karejo sadari i.

² Lam denggan do pangkilalaan ni si Rut saonari? Nunga taboto, diihuthon ibana do si Naomi tu Betlehem jala dipillit ibana do manomba Debata Jahowa. Lungun do roha ni si Rut dohot si Naomi tingki mulak sian Moab. Alai dung sahat di Betlehem, diboto si Rut ma Patik ni Jahowa taringot tu halak na pogos dohot tu halak sian bangso na asing. Alani i, tarapul do rohana mangida burju ni naposo ni Jahowa na mangulahon Patik i.

3, 4. (a) Songon dia do si Boas mambahen las roha ni si Rut? (b) Songon dia do si Rut gabe sitiruon tingki susa hita di parhepengon?

³ Si Boas ma sahalak sian nasida. Ibana halak na mora, jala di haumana do si Rut mamutiki biur ni eme. Dipatuduhon si Boas do asi ni rohana tu si Rut. Dipuji si Boas do si Rut ala disarihon ibana simatuana, jala rade ibana marlinggom tu Debata Jahowa. Las do roha ni si Rut mambege i.​—Jaha Rut 2:11-14.

⁴ Alai, olo do ra holsoan si Rut taringot tu parngoluonna. Ibana ro sian bangso na asing, nunga mabalu, pogos, jala ndang adong anakna. Songon dia do bahenonna manggohi na ringkot di ngoluna? Tolapna do torus mamutiki eme di hauma ni halak? Ise do na manarihon ibana dung matua? Boi do taantusi pangkilalaan ni si Rut. Saonari, godang do na holsoan alani parhepengon. Alai molo tatiru si Rut, taboto ma songon dia haporseaonna mangurupi ibana mangadopi hasusaan sisongon i.

5, 6. (a) Sadia godang do eme na dapot ni si Rut sian hauma ni si Boas? (b) Songon dia do didok si Naomi dung mulak si Rut sian hauma?

⁵ Dung dipapungu si Rut eme i, dapot ni ibana do hirahira 22 liter eme. Boratna hirahira 14 kilogram! Ditungkus ma eme i tu abit, dihunti jala mulak ma ibana tu Betlehem.​—Rut 2:17.

⁶ Las do roha ni si Naomi ala nunga mulak si Rut. Songgot do ra rohana mangida godang ni eme na binoan ni si Rut. Diboan si Rut do muse sipanganon na nilehon ni si Boas, dung i dipangan nasida ma. Disungkun si Naomi do muse di hauma ni ise si Rut mamutiki eme, jala didok si Naomi ma, ”Pinasupasu ma baoa na marpanatap tu ho!” (Rut 2:19) Sian sipanganon dohot eme na binoan ni si Rut, diboto si Naomi ma adong halak na patuduhon asi ni roha tu si Rut.

7, 8. (a) Aha do didok si Naomi taringot tu haburjuon ni si Boas jala boasa? (b) Songon dia do si Rut patuduhon holong na marsihohot tu simatuana?

⁷ Dipaboa si Rut ma tu si Naomi haburjuon ni si Boas i. Didok si Naomi ma, ”Pinasupasu ni Jahowa ma ibana, ala so dialang asi ni rohana i tu halak na mangolu dohot naung mate.” (Rut 2:20) Didok si Naomi do na sian Jahowa haburjuon ni si Boas i, ala Debata do na mangonjar roha ni sasahalak laho patuduhon asi ni roha. Jala, dipasupasu Ibana do halak na mangulahon i.a—Jaha Poda 19:17.

⁸ Dijujui si Naomi do asa dioloi si Rut pangidoan ni si Boas mamutiki eme di haumana, jala karejo jonok tu parkarejona borua. Dioloi si Rut do hata ni si Naomi i, jala tongtong do ”tinggal ibana rap dohot simatuana”. (Rut 2:22, 23) Sian hata on, tarida do holong ni si Rut na marsihohot tu si Naomi. Sitiruon sian si Rut boi mangonjar rohanta patuduhon holong tu sisolhot. Marsitutu ma hita mangurupi halak na tahaholongi, tarlumobi tingki dihaporluhon nasida pangurupion. Las do roha ni Jahowa molo tapatudu holong sisongon i.

 9. Aha do na boi taparsiajari sian si Rut dohot si Naomi taringot tu keluarga?

⁹ Na so boi do didok sada keluarga na lengkap si Rut dohot si Naomi? Di pigapiga kebudayaan, keluarga na ”lengkap” ingkon adong tungganedoli, tungganeboru, anak, boru, ompung baoa, ompung boru dohot na asing. Alai, na masa tu si Rut dohot tu si Naomi manjujui hita asa mambahen keluarganta mangkilala hadameon, las ni roha dohot holong. Alani i, rade do hita mangkaholongi keluarganta songon dia pe na masa tu nasida? Dung i, didok Jesus do molo huria Kristen boi gabe keluarga tu ganup halak di huria i.​—Mrk. 10:29, 30.

10. Aha do dipingkirhon si Naomi taringot tu si Rut?

¹⁰ Saleleng gotilon, mulai sian bulan April sahat tu Juni, di hauma ni si Boas do si Rut mamutiki biur ni eme. Laos di tingki i, sai dipingkirhon si Naomi do na dumenggan tu si Rut. Nunga didok si Naomi hian na so tarbahensa be mangalehon tungganedoli tu si Rut. (Rut 1:11-13) Alai saonari, dipingkirhon si Naomi ma muse songon dia bahenonna asa boi marhasohotan si Rut. Didok ma tu si Rut, ’Ale inang, hulului ma hahotanmu, asa marhasonangan ho?’ (Rut 3:1) Di tingki i, somal do natuatua mangalului na laho dongan saripe ni anakna. Jala si Rut, nunga songon boru ni si Naomi. Las do rohana mangalului ’hahotan’ ni si Rut, i ma sahalak tungganedoli. Alai, songon dia do bahenon ni si Naomi?

11, 12. (a) Patik na dia do diingot si Naomi tingki didok si Boas na ”tama sitean hita”? (b) Songon dia do pangkilalaan ni si Rut mambege i?

¹¹ Tingki dipaboa si Rut taringot tu si Boas, didok si Naomi ma, ”Baoa i do na sumolhot tu hita, ibana tama sitean hita.” (Rut 2:20) Aha do lapatan ni hata ni si Naomi on? Patik ni Debata mangurupi halak na pogos dohot keluarga na marsitaonon alani hamatean di Israel. Molo sada ina mabalu jala ndang adong anakna, on mambahen gotap marga ni tungganedolina. Alani i, diloas Patik ni Debata do hahaanggi ni baoa naung mate i, mambuat ina na mabalu i gabe tungganeboruna, asa adong pinompar na manorushon marga dohot manean arta ni tungganedolina.b—5 Mus. 25:5-7.

¹² Dipaboa si Naomi ma sibahenonna tu si Rut. Tapingkirhon ma pangkilalaan ni si Rut tingki manangihon simatuana i. Ndang diboto si Rut dope sude Patik ni Debata dohot hasomalan ni halak Israel. Alai, pos do rohana tu si Naomi. Songgot do ra roha ni si Rut mambege hata ni simatuana i, ninna rohana boi do i manegai goarna di Israel. Alai, dioloi do hata ni si Naomi. Didok ibana, ”Saluhut na pinaboami tu ahu, i do bahenonku.”​—Rut 3:5.

13. Aha do na boi taparsiajari sian si Rut taringot manangihon poda ni halak na tumua sian hita? (Ida ma muse Job 12:12.)

¹³ Sipata, maol do angka na poso manangihon hata ni na umtua sian nasida. Didok rohanasida, ndang diboto angka na matua parsoalan ni na poso. Alai sitiruon sian si Rut mangajari hita, marlaba do molo tatangihon na umtua, ala nasida umbisuk jala dipingkirhon nasida do na dumenggan tu hita. (Jaha Psalmen 71:17, 18.) Saonari, taida ma aha do didok si Naomi tu si Rut, jala aha do labana tu si Rut ala ditangihon ibana hatana i.

14. Aha do pardegean i jala songon dia do i dipangke parkarejo najolo?

¹⁴ Laho ma si Rut borngin i tu pardegean, i ma inganan laho mardege dohot mamurpur eme. Pardegean on jotjot dibahen di inganan na timbo, ala gogo do alogo disi molo dung botari. Angka parkarejo somalna mamangke garpu na balga laho mangamparhon eme i tu alogo, asa bolong lapung dohot hurangkamna sian eme i.

15, 16. (a) Paboa ma na masa di pardegean i dung sae si Boas mamurpur eme. (b) Sadihari do diboto si Boas na modom si Rut di lambung ni patna?

¹⁵ Diida si Rut ma na laho sae angka parkarejo i mamurpur eme. Disi do si Boas mandongani parkarejo i. Dung sae nasida mangan, modom ma si Boas di lambung ni eme naung pungu i. Somal do halak Israel marborngin di hauma laho manjaga eme, asa unang dibuat panangko. Diparrohahon si Rut ma didia si Boas modom. Dung modom si Boas, dibahen si Rut ma songon hata ni si Naomi i.

¹⁶ Ro ma si Rut manisipnisip tu pardegean i. Diida ibana nunga renges si Boas. Dibungka si Rut ma ulos ni si Boas sian patna jala modom ma ibana disi. Dipaima ibana ma aha na laho masa. Leleng do dihilala si Rut tingki paimahon i. Tonga borngin, tarsunggul ma si Boas. Mamungkuk ma ibana tu jolo mangulosi patna. Dung i, diboto ibana ma adong na modom di lambung ni patna. Didok di Bibel, ”Ida ma, parompuan sada modom di lambung patna.”​—Rut 3:8.

17. Dua hasintongan aha do na so binoto ni godang halak tu na binahen ni si Rut?

¹⁷ Ninna si Boas ma, ”Ise do ho?” Huhut mabiar, dialusi si Rut ma, ”Ahu do si Rut naposom boruboru; sai paherbang ma habonghabongmu mangulosi naposomon, ai ho do na sumolhot pareak ahu.” (Rut 3:9) Di tingkinta on, adong do na mangalapati hata ni si Rut i tu ulaon na rorang. Alai, adong dua hasintongan na so binoto ni nasida. Na parjolo, na binahen ni si Rut sada sian hasomalan na so boi taantusi be saonari. Alani i, boi do sala pandapotta tu na binahen ni si Rut, tarlumobi molo tapatudos i tu parange ni jolma saonari. Na paduahon, sian alus ni si Boas tu si Rut patuduhon molo na binahen ni si Rut i ndang sala.

18. Aha do didok si Boas na mambahen dame roha ni si Rut, jala dua haburjuon na dia do na nidok ni si Boas?

¹⁸ Hata ni si Boas mambahen dame pangkilalaan ni si Rut. Didok ibana, ”Sai dipasupasu Jahowa ma ho, ale inang! Ai dumenggan dope holong ni roham na parpudi on sian na parjolo i, ala so dipaihutihut ho angka dolidoli, manang halak na pogos manang na mora pe.” (Rut 3:10) Hata ”sian na parjolo”, lapatanna holong na pinatuduhon ni si Rut tu simatuana. Hata ”na parpudi on”, mandok na binahen ni si Rut tu si Boas di tingki i. Diboto si Boas do na boi pilliton ni si Rut baoa na poso, na mora manang na pogos bahen tungganedolina. Alai, dipatuduhon si Rut do haburjuon ndang holan tu si Naomi, alai dohot do tu simatuana doli naung marujung ngolu marhite manorushon margana. Alani i, las do roha ni si Boas mangida si Rut na so mangkaringkothon dirina sandiri.

19, 20. (a) Aha do na pinaima ni si Boas umbahen ndang pintor dibuat si Rut gabe tungganeboruna? (b) Songon dia do si Boas mangondingi si Rut asa unang sega goarna?

¹⁹ Didok si Boas ma muse, ”Ala ni i pos ma roham, ale Rut. Ai sude do penduduk ni kota on mananda ho sada boruboru parroha na denggan. Huusahahon pe manang aha na pinarsinta ni roham.” (Rut 3:11, Bibel siganup ari) Olo do si Boas marhasohotan tu si Rut, tarlumobi ala dipangido asa ibana pagodangkon si Rut. Alai, ala si Boas baoa na tigor marroha, ndang holan dirina sandiri na diharingkothon. Dipaboa ibana do na adong dope na sumolhot sian ibana, na marhak pagodangkon si Rut. Parjolo do pangidoonna baoa i laho pagodangkon si Rut.

²⁰ Didok si Boas ma asa modom muse si Rut. Dung i, ingkon sogot ma ibana laho sian i asa unang diboto halak. Ndang lomo roha ni si Boas gabe sega goar ni si Rut dohot goarna sandiri. Ala boi do dirimpu halak nasida nunga mangulahon na so tama. Modom ma muse si Rut di lambung ni pat ni si Boas, jala nunga dame pangkilalaanna ala ditangihon si Boas do pangidoanna. Dung dapot manogot, dungo ma si Rut jala dipasuksuk si Boas ma eme boanon ni si Rut.​—Jaha Rut 3:13-15.

21. Boasa si Rut didok ”boruboru parroha na denggan”, jala songon dia do hita maniru ibana?

²¹ Las hian do roha ni si Rut mambege hata ni si Boas. Didok si Boas do godang halak mananda si Rut ”boruboru parroha na denggan”. Goar ni si Rut na denggan di jolo ni halak, hombar do on tu sangkapna laho mananda dohot mangoloi Jahowa. Dipatuduhon ibana do haburjuon tu si Naomi, jala dipahombar ibana do hasomalanna tu bangso Israel. Molo tatiru si Rut, taargai ma halak na asing dohot hasomalan ni nasida, jala boi ma dapotta goar na denggan di jolo ni godang halak.

22, 23. (a) Hirahira aha do lapatan ni silehonlehon ni si Boas i? (Ida ma surat na di toru.) (b) Aha do muse didok si Naomi tu si Rut?

²² Dung sahat si Rut di jabu, disungkun si Naomi ma, ’Boha do inang, denggan do?’ Disungkun si Naomi do songon i asa diboto ibana dijangkon si Boas do ibana manang ndang. Dipaboa si Rut ma tu si Naomi hata ni si Boas. Dipatuduhon ibana do muse eme na nilehon ni si Boas tu ibana.c—Rut 3:16, 17.

²³ Disuru si Naomi ma unang pola laho si Rut mamutiki biur ni eme sadari i. Didok ma tu si Rut, ”Ndang tagamon pasohoton ni baoa i, nda ingkon marujung sadarion hata i.”​—Rut 3:18.

24, 25. (a) Aha do na patuduhon molo si Boas baoa na tigor marroha, jala na so mangkaringkothon dirina sandiri? (b) Aha do pasupasu na dapot ni si Rut?

²⁴ Laho ma si Boas tu inganan parpunguan na di harbangan ni kota Betlehem, paimahon baoa na sumolhot tu si Naomi. Di jolo ni angka panindangi, didok si Boas do tu baoa i asa tuhoronna ladang ni si Naomi jala pagodangonna si Rut. Alai, ndang olo baoa i, ala mabiar ibana gabe pargulutan i tu ianakhonna. Di adopan ni angka sitindangi, didok si Boas ma na rade ibana manuhor tano ni si Elimelek dohot pagodangkon si Rut, hinabaluhon ni si Malon jala ”on ma dalanna asa hot arta i di keluarga ni naung mate i”. (Rut 4:1-10, Bibel siganup ari) Parroha na tigor do si Boas, jala ndang diharingkothon ibana dirina sandiri.

²⁵ Dioli si Boas ma si Rut. Didok di Bibel, ”Gabegabean ma [si Rut] ditumpak Jahowa, jala ditubuhon sada anak.” Didok angka parompuan di Betlehem ma martua si Naomi, jala dipuji do si Rut. Didok do molo ibana dumenggan sian pitu anak di si Naomi. Anak ni si Rut gabe ompu ni Raja Daud. (Rut 4:11-22) Dung i, sian pinompar ni si Daud ma ro Jesus.​—Mat. 1:1.d

26. Aha do na boi taparsiajari sian na masa tu si Rut dohot si Naomi?

²⁶ Dipasupasu Jahowa do si Rut dohot si Naomi. Dipagodanggodang si Naomi do anak ni si Rut, jala dibahen do ibana songon anakna sandiri. Na masa tu si Rut dohot si Naomi mangajari hita molo Jahowa mamasumasu halak na marsihohot tu Ibana jala na manarihon keluargana. Dipasupasu do si Boas, si Naomi, dohot si Rut alani haporseaon ni nasida.