Na disurat si Mateus

13 Di ari i, lao ma Jesus sian jabu i jala hundul di topi ni laut. 2 Godang ma halak makkaliangi Jesus, dung i nakkok ma ibana tu sada parau jala hundul disi. Alai anggo akka jolma i, jongjong do di topi ni laut i.+ 3 Dung i, dipakke ibana do godang tudosan+ lao mangajari nasida. Didok ma, “Kaluar ma sahalak panabur lao manaburhon boni.+ 4 Tikki na manabur i ibana, madabu ma deba boni i di topi dalan jala ro ma akka pidong mangallang i.+ 5 Na deba madabu di tano na marbatu-batu. Hatop ma i tubu ai dang pola godang tano disi.+ 6 Alai dung lam mohop mataniari, malos ma i ala dang bagas dope uratna. 7 Deba madabu di tonga-tonga ni suga-suga. Dung lam balga suga-suga i, dihapit ma suan-suanan i.+ 8 Na deba nai madabu di tano na denggan, marparbue ma i, adong na 100 hali loppit, adong na 60 hali loppit, jala na asing 30 hali loppit.+ 9 Manang ise na marpinggol, dibege ma i.”+

10 Dung i, ro ma akka sisean ni Jesus manukkun ibana, “Boasa dipakke ho tudosan+ lao mangajari nasida?” 11 Dialusi ibana ma, “Dilehon do tu hamu pangattusion lao mamboto rahasia na badia+ taringot tu Harajaon banua ginjang, alai dang dilehon i tu nasida. 12 Ai manang ise na adong parbinotoanna, dilehon do tu ibana unggodang parbinotoan, asa lam godang parbinotoanna i. Alai manang ise na so adong parbinotoanna, gari parbinotoan naung adong hian di ibana buaton ni Debata do sian ibana.+ 13 Alani i do hupakke akka tudosan lao mangajari nasida. Ai marnida do nasida alai dang adong diida nasida manang aha, marbinege do nasida alai dang adong dibege nasida manang aha, jala dang diattusi lapatanna.+ 14 Alani i, saut ma hata ni si Jesaya na mandok, ‘Dibege hamu do nian, alai dang diattusi hamu lapatanna. Diida hamu do nian, alai dang diattusi hamu.+ 15 Ai nungnga tutup be roha ni bangso on. Dibege pinggol ni nasida do nian, alai dipanengel-nengel. Ditutup nasida do matana gabe dang marnida, dang marbinege pinggol ni nasida, dang mangattusi nang rohana, jala dang mulak nasida tu Au. Alani i, dang pamalumokku nasida.’+

16 “Alai, marlas ni roha ma hamu ala marnida do matamuna, jala marbinege do pinggolmuna.+ 17 Situtu do na hudok on tu hamu, lomo do roha ni akka panurirang* dohot akka halak na mangulahon na sittong naeng mangida na niidamuna i. Alai dang na lao idaon ni nasida i.+ Jala lomo do roha ni nasida naeng mambege na binegemuna i, alai dang na lao begeon ni nasida i.

18 “Saonari, tangihon hamu ma lapatan ni tudosan taringot tu halak na manabur i.+ 19 Boni na madabu di topi ni dalan+ tudos ma i tu halak na mambege barita taringot tu Harajaon, alai dang diattusi lapatanna. Dung i, boni naung disabur di rohana i dibuat Sibolis*+ ma i. 20 Boni na madabu di tano na marbatu-batu, tudos ma i tu sasahalak na mambege jala na manjalo barita i di bagasan las ni roha.+ 21 Alai dang marurat i di bagasan rohana, holan satokkin do i tubu. Tikki masa hasusaan manang sitaonon alani barita i, gabe tartuktuk do ibana. 22 Boni na madabu di suga-suga, tudos ma i tu halak na mambege barita i alai holso ni roha lao mamikkiri parngoluon di tikki* on+ dohot holong ni roha tu hamoraon makkapit barita i. Ujungna dang marparbue be barita i.+ 23 Boni na madabu tu tano na denggan i, tudos ma i tu halak na mambege barita i, mangattusi lapatanna jala marparbue. Adong na 100 hali loppit, na asing 60 hali loppit, jala na sada nai 30 hali loppit.”+

24 Dipaboa ibana ma tudosan na asing tu nasida, ninna ma, “Harajaon banua ginjang i tudos do i tu sasahalak na manabur boni na denggan di ladangna. 25 Tikki modom akka jolma, ro ma musuna jala disabur ma simareme-eme* di tonga-tonga ni eme* i, dung i lao ma ibana. 26 Dung tubu jala marparbue eme i, tubu ma nang simareme-eme i. 27 Dung i, ro ma akka hatoban ni nappunasa ladang i, ninna ma, ‘Tuannami, boni na denggan do kan disabur ho di ladangmu? Sian dia do ro simareme-eme i?’ 28 Didok ibana ma tu nasida, ‘Musu do na mambahen i.’+ Disukkun akka hatoban i ma tu ibana, ‘Denggan do di roham, dicabut hami jala dipapungu hami sudena i?’ 29 Didok ibana ma, ‘Unang, so tung dohot tarcabut eme i tikki dicabut hamu simareme-eme i. 30 Pasombu hamu ma i rap tubu sahat tu na panen. Tikki panen, dohonokku ma tu panabi asa parjolo dipapungu nasida simareme-eme i, diikkat jala ditutung tu api. Dung ditutung simareme-eme i, papunguonna ma eme i tu poti.’”+

31 Dipaboa ibana ma muse tudosan na asing tu nasida, ninna ma, “Tudos do Harajaon banua ginjang i tu boni na gelleng* na dibuat sasahalak jala disuan di ladangna.+ 32 On ma boni na ummetmet sian sude boni. Alai dung tubu i, gabe umbalga do i sian sude sayur. Gabe songon hau ma i, jala ro ma akka pidong marasar di akka dakkana.”

33 Didok ibana ma tudosan na asing tu nasida, “Tudos do Harajaon banua ginjang i tu ragi na dibuat sahalak borua jala dicampur ma i tu sappulu kilogram topung sahat tu na kabbang adonan i.”+

34 Dipakke Jesus do tudosan lao mangajarhon i sude tu akka halak na disi. Ai dang olo ibana mangajari akka halak molo so dipakke ibana tudosan.+ 35 Marhite songon i, saut ma hata ni panurirang na mandok, “Hupaboa do akka tudosan. Hupaboa do akka na buni sian najolo.”*+

36 Dung disuru mulak akka jolma i, masuk ma Jesus tu sada jabu. Ro ma siseanna tu ibana, ninna ma, “Patorang ma tu hami tudosan taringot tu simareme-eme na di ladang i.” 37 Dialusi ibana ma, “Na manabur boni na denggan, i ma Anak ni jolma i. 38 Ladang, i ma portibi on.+ Boni na denggan, i ma akka anak Harajaon. Alai simareme-eme, i ma akka anak ni Sibolis.*+ 39 Musu na manabur, i ma Sibolis. Panabi, i ma akka suru-suruan. Jala musim panen, i ma panutup ni jaman* on. 40 Songon simareme-eme na dipapungu jala ditutung, on ma na lao masa di panutup ni jaman* on.+ 41 Suruon ni Anak ni jolma i ma akka suru-suruan pakaluarhon sian Harajaonna sude na mambahen na asing mardosa dohot akka halak na mangalanggar patik. 42 Disappatton ma nasida tu api na marsigorgor.+ Disi ma nasida mangangguki jala makkarat ngingina alani murukna. 43 Di tikki i, marsinondang ma akka halak na mangulahon lomo ni roha ni Debata di Harajaon ni Ama nasida, songon mataniari na marsinondang.+ Manang ise na marpinggol, dibege ma i.

44 “Tudos do Harajaon banua ginjang i tu arta na buni di ladang. Adong ma sasahalak na mandapot i, alai ditanom ma muse. Alani las ni rohana, lao ma ibana manggadis sude artana jala dituhor ma ladang i.+

45 “Tudos do muse Harajaon banua ginjang i tu sahalak partiga-tiga na mangalului mutiara na arga. 46 Dung dapotna sada mutiara na arga, lao ma ibana jala hatop ma digadis sude na adong di ibana lao manuhor i.+

47 “Tudos do muse Harajaon banua ginjang i tu jala na disappatton tu laut na mandapot marragam dekke. 48 Dung gok jala i, ditarik nasida ma i tu darat. Hundul ma nasida lao papunguhon dekke na denggan+ tu karanjang, alai dekke na so denggan+ dibolokkon do. 49 Songon i ma na masa di panutup ni jaman* on, ro ma akka suru-suruan manirang parjahat sian halak na mangulahon na sittong. 50 Disappatton ma parjahat i tu api na marsigorgor. Disi ma nasida mangangguki jala makkarat ngingina alani murukna.

51 “Nungnga diattusi hamu be sudena i?” Dialusi nasida ma, “Nungnga.” 52 Dung i didok ibana ma tu nasida, “Ala nungnga diattusi hamu i, sude guru* naung diajari taringot tu Harajaon banua ginjang, dos ma nasida songon sahalak tuan na pakaluarhon arta na imbaru dohot arta na leleng sian panimpanan ni artana.”

53 Dung sae dipaboa sude tudosan i, lao ma Jesus sian i. 54 Dung sahat ibana tu hutana,+ mangajari ma ibana di sinagoga* ni nasida. Gabe longang ma halak na disi, ninna ma, “Sian dia do dapotna habisukon dohot tanda halongangan*+ sisongon i? 55 Anak ni tukkang hau do ibana kan?+ Si Maria do omakna kan? Si Jakobus, si Josep, si Simon, dohot si Judas do akka anggina kan?+ 56 Jala rap do hita dohot akka ibo⁠to⁠na. Ai sian dia do diboto ibana sudena i?”+ 57 Gabe dang porsea be nasida tu ibana.+ Dung i ninna Jesus ma tu nasida, “Sai dipasangap do panurirang. Alai anggo di hutana dohot di jabuna, dang dipasangap ibana.”+ 58 Dang dibahen Jesus be godang tanda halongangan disi, ala dang porsea nasida.