Hasil ni Ulaon Marbarita ”Hauma i . . . Nunga Marlangat, na Tau Gotilon ma”

1, 2. (a) Boasa sungkunsungkun roha ni sisean ni Jesus? (b) Aha do lapatan ni tingki gotilon na nidok ni Jesus?

DIDOK Jesus tu siseanna, ”Bereng hamu ma hauma i; ai nunga marlangat [marhunik], na tau gotilon ma!” Alai ndang songon na nidok ni Jesus, poso dope eme manang barli na di hauma i. Sungkunsungkun do roha ni sisean i, ’Aha do na laho digotil?’ Sasintongna, opat bulan nai pe asa ro tingki gotilon.​—Joh. 4:35.

² Hape na nidok ni Jesus ndang manggotil eme manang barli. Alai sian hata on, adong dua na ringkot sipaboaon ni Jesus taringot tu ulaon manggotil di partondion. Aha ma na dua i? Taparrohahon ma.

 3. (a) Songon di terjemahan na asing, boasa didok Jesus ”hauma i . . . nunga mamontar, na tau gotilon ma”? (Ida surat na di toru.) (b) Songon dia do didok Jesus patangkashon hatana?

³ Dipaboa Jesus taringot tu gotilon on tingki rap ibana dohot siseanna di Sikar, huta ni halak Samaria di ujung ni taon 30 M. Huhut paimahon angka siseanna, hundul ma Jesus di lambung ni sada sumur jala marbarita tu sahalak borua Samaria. Dung ro angka sisean ni Jesus, hatop ma mulak borua i tu huta Sikar paboahon hasintongan na niajarhon ni Jesus. Godang do na manangihon borua i, jala ro ma nasida mandapothon Jesus tu sumur i. Di tingki i, diida Jesus ma torop halak Samaria mandapothon ibana. Ra, laos didok ma tu siseanna, ”Bereng hamu ma hauma i; ai nunga marlangat, na tau gotilon ma!”a Asa diboto siseanna na nidok ni Jesus manggotil di partondion didok ma, ”Panggotil i, papunguhon parbue tu hangoluan na salelenglelengna.”​—Joh. 4:5-30, 36.

 4. (a) Aha do dua parsiajaran na diajarhon Jesus taringot tu ulaon manggotil? (b) Aha do sungkunsungkun na laho taulas?

⁴ Aha do na ringkot taringot tu ulaon manggotil di partondion na niajarhon ni Jesus? Adong dua, na parjolo, ulaon i ingkon hatop diulahon. Didok Jesus ”hauma i . . . nunga marlangat, na tau gotilon ma”, on patuduhon angka siseanna dijou asa parsidohot tu ulaon i. Laho paboahon na ringkot ulaon i, didok Jesus muse, ”Nunga manjalo upa panggotil i.” Tangkas ma nunga dipungka tingki gotilon manang panen, alani i ingkon hatop do ulaon i diulahon. Na paduahon, angka pangula i marlas ni roha. Jesus paboahon ”rap marlas ni roha” do panabur dohot panggotil i. (Joh 4:35b, 36) Marlas ni roha do Jesus ala ”torop do halak Samaria . . . gabe porsea” di ibana, sisean i pe marlas ni roha do molo marsitutu nasida di ulaon i. (Joh. 4:39-42) Surirang ni Jesus on manggombarhon na masa saonari. Di tingkinta on ma ulaon gotilon i umbalga diulahon, alani i, hata ni Jesus on ringkot taparrohahon. Andigan do dimulai masa gotilon di tingkinta on? Ise do na dohot tu ulaon i? Jala, aha do hasil na dapot sian i?

 5. Ise do na manguluhon ulaon papunguhon manang ulaon manggotil di liat portibi on?

⁵ Dipatudu Jahowa do marhite parnidaan ni si Johannes, na Ibana do marsuru Jesus manguluhon ulaon gotilon. (Jaha Pangungkapon 14:14-16.) Di parnidaan i, Jesus mamangke tumpal [mahkota] jala ditiop sasabi. Jesus mamangke ’tumpal sere’ patuduhon nunga mamarenta ibana gabe Raja. ”Sasabi na tajom di tanganna”, patuduhon ibana ma gabe Panabi. Marhite surusuruan didok Jahowa ma, ”Nunga masak situtu sigotilon na di tano i.” On patuduhon molo ulaon i, ingkon hatop diulahon. Sasintongna, ala ”nunga dapot tingki gotilon”, ndang adong tingki laho marlemba! Disabihon Jesus ma sasabina tu tano on dung didok tu ibana, ’Sabihon ma sasabim,’ laos disabi ma angka jolma. Parnidaan i muse patuduhon tu hita molo ”hauma i . . . nunga marlangat, na tau gotilon ma”. Alani i, boi do taboto sian parnidaan on andigan dipungka ulaon gotilon di liat portibi on? Boi!

 6. (a) Andigan do dipungka ”tingki gotilon”? (b) Andigan do dipungka ulaon manggotil? Patorang ma.

⁶ Jesus do Panabi na mamangke tumpal di parnidaan ni si Johannes di buku Pangungkapon bindu 14 (ayat 14). On patuduhon nunga jongjong ibana gabe Raja taon 1914. (Dan. 7:13, 14) Ndang sadia leleng dung Raja, disuru ma Jesus mamungka ulaon gotilon i (ayat 15). Parnidaan ni si Johannes hombar do on dohot tudosan ni Jesus taringot tu ulaon manggotil eme. Ibana mandok, ”Ajal ni hasiangan on do ia ari gotilon.” Alani i, ajal ni hasiangan on dohot tingki gotilon, dipungka di tingki na sarupa, i ma taon 1914. Dung i, ”di masa ni gotilon i” dipungka ma ulaon papunguhon. (Mat. 13:30, 39) Songon na dipatuduhon sejarah, tingki gotilon i dipungka dung pigapiga taon Jesus mamarenta gabe Raja. Na parjolo diulahon Jesus dung mamarenta gabe Raja, i ma pabadiahon naposona na miniahan taon 1914 sahat tu mula ni taon 1919. (Mal. 3:1-3; 1 Ptr. 4:17) Dung i, mulai ma disabi ”sigotilon na di tano i” taon 1919. Di tingki i, diurupi Jesus do siihuthon ibana marhite naposo haposan asa mangantusi na ringkot do mamaritahon Harajaon ni Debata. Taida ma aha na masa.

 7. (a) Aha do na mangurupi angka donganta mangantusi na ringkot marbarita na uli? (b) Aha do pangkorhon ni i tu angka donganta?

⁷ Bulan Juli 1920, The Watch Tower paboahon, ”Dung tangkas diparsiajari Bibel, diboto gareja [huria] ma hak na sumurung na dilehon tu nasida, i ma mamaritahon barita taringot tu Harajaon ni Debata.” Umpamana, surirang ni si Jesaya mangurupi angka donganta mangantusi na ringkot mamaritahon Harajaon ni Debata di liat portibi on. (Jes. 49:6; 52:7; 61:1-3) Ndang diboto nasida dope songon dia mangulahon i, alai pos do rohanasida tu pangurupion ni Jahowa. (Jaha Jesaya 59:1.) Pangantusion na sintong taringot tu ulaon marbarita, mangonjar roha ni angka donganta parsidohot tu ulaon i. Aha do na diulahon nasida?

 8. Taon 1921, aha do dua parsiajaran na ringkot diantusi angka donganta taringot tu ulaon marbarita?

⁸ Bulan Desember 1921, dipaboa ma di The Watch Tower, ”Sumurung do taon on sian taon naung salpu ala gumodang halak mananda hasintongan di taon 1921 on.” Dipaboa muse di majalah i, ”Godang dope na ingkon taulahon. . . . Alani i, taulahon ma i di bagasan las ni roha.” Taparrohahon ma songon dia angka donganta mangantusi dua na ringkot taringot tu marbarita na uli na diajarhon Jesus tu siseanna: Ulaon i ingkon hatop diulahon, jala halak na dohot tu ulaon i marlas ni roha.

 9. (a) Taon 1954, aha do didok The Watchtower taringot tu ulaon gotilon, jala boasa didok songon i? (b) Aha do na masa saleleng 50 taon parpudi on taringot tu godang ni penyiar di liat portibi on? (Ida ma grafik ”Godang ni Parbarita na Tamba di Liat Portibi on”.)

⁹ Taon 1930-an, dung diboto dongan sahaporseaonta na dijangkon birubiru na asing barita Harajaon, lam marsitutu ma nasida marbarita. (Jes. 55:5; Joh. 10:16; Pgk. 7:9) Ujungna, lam torop ma halak na dohot tu ulaon i. Sian 41.000 penyiar na adong taon 1934, gabe 500.000 penyiar taon 1953! The Watchtower 1 Desember 1954 mandok, ”Marhite Bibel dohot tondi ni Jahowa, ulaon papunguhon on boi diulahon di liat portibi on.”b—Sak. 4:6.

10, 11. Aha do na ringkot dipatorang di tudosan taringot tu batu ni siarum?

¹⁰ Marhite tudosan, disurirangkon Jesus do hasil ni gotilon i. Taparrohahon ma tudosan taringot tu batu ni siarum dohot ragi. Jala taida ma songon dia tudosan i digohi di tingkinta saonari.

¹¹ Tudosan taringot tu batu ni siarum. Sahalak baoa manabur batu ni siarum. Dung tubu, balga ma boni i gabe dos songon hau jala marasar pidong di dangkana. (Jaha Mateus 13:31, 32.) Aha do na ringkot taringot tu partubu ni boni i sian tudosan on? (1) Simbur ni partubuna mambahen longang roha. Batu ni siarum ”do na ummetmet sian nasa batu ni suansuanan”, alai dung tubu dos ma i songon sada hau na ’balga dangkana’. (Mrk. 4:31, 32) (2) Ndang hasundatan partubuna. Didok Jesus do, ”Dung sinaburhon [boni], simbur ma i tubu.” Ndang didok ibana, ”Olo do ra tubu i.” Alani i, ndang adong na boi mambahen i ndang tubu. (3) Gabe inganan parlinggoman. Dung balga hau i ”ro do angka pidong na martongatonga langit” jala ”marasar di linggomna i”. Songon dia do hatorangan na tolu on masa di tingki gotilon saonari?

12. Songon dia do tudosan taringot tu batu ni siarum masa saonari? (Ida ma grafik ”Godang ni Parsiajar Bibel na Lam Tamba”.)

¹² (1) Simbur do partubuna: Tudosan i manggombarhon bidang ni ulaon marbarita dohot huria na lam martamba. Sian taon 1919, angka panabi na marhiras ni roha dipapungu tu huria Kristen naung dipabadia. Otik dope panabi tingki i, alai ndang sadia leleng tamba godang ma nasida. Gariada, longang do roha mangida godang ni panabi na tamba sian mula ni taon 1900-an sahat tu saonari. (Jes. 60:22) (2) Ndang hasundatan: Lam tamba do godang ni huria Kristen i, ndang adong na boi mangambati. Nang pe godang musu songon batu na mangkapit batu ni siarum i, alai tongtong do tubu boni i. (Jes. 54:17) (3) Parlinggoman: ”Angka pidong na martongatonga langit” na ro marlinggom tu hau i, manggombarhon marjuta halak na serep marroha na ro sian hirahira 240 negeri na manjangkon barita Harajaon jala parsidohot tu huria Kristen. (Hes. 17:23) Disi, boi do dame rohanasida ala diparade parlinggoman dohot sipanganon partondion.​—Jes. 32:1, 2; 54:13.

13. Aha do na ringkot dipatorang di tudosan taringot tu ragi?

¹³ Tudosan taringot tu ragi. Sahalak borua mambahen ragi tu topung na niadon. Ragi i, mambahen adonan i kambang. (Jaha Mateus 13:33.) Aha do na boi taantusi taringot tu barita na uli sian tudosan on? Adong dua na porlu taparrohahon. (1) Adong hamubaon. Ragi mambahen ”asom” jala kambang sude topung i. (2) Hona do tu sude. Saluhutna do itak manang topung na ”tolu ampang” gabe asom jala kambang dibahen ragi i. Songon dia do na dua on masa di tingki gotilon?

14. Songon dia do tudosan taringot tu ragi masa tu ulaon manggotil manang ulaon papunguhon saonari on?

¹⁴ (1) Mambahen hamubaon: Ragi manggombarhon barita taringot tu Harajaon. Jala itak manang topung manggombarhon jolma. Songon ragi na mambahen kambang sude topung i, songon i do barita Harajaon mambahen hamubaon di roha ni halak na manjalo barita i. (Rom 12:2) (2) Sude: Ragi na hona tu sude topung manggombarhon barita Harajaon na tarsar tu sude jolma. Songon i ma, dibaritahon do barita Harajaon ”sahat ro di ujung ni tano on”. (Ul. 1:8) Hatorangan na ringkot na pinatudu ni tudosan on i ma, tarsar do barita Harajaon sahat tu sude inganan nang pe adong na mangorai ulaon i di sada negara.

15. Songon dia do hata di Jesaya 60:5, 22 digohi saonari? (Ida ma kotak ”Jahowa do na Mambahen I Masa” dohot kotak ”’Na Ummetmet’ Gabe ’Bangso na Bolon’”.)

¹⁵ Hirahira 800 taon andorang so dipaboa Jesus tudosan i, nunga disurirangkon Jahowa marhite si Jesaya bidang ni ulaon i, dohot las ni roha na dapot sian ulaon i.c Digombarhon Jahowa do nasida songon bangso na ro ”sian na dao” jala marpungu tu organisasi ni Jahowa. Didok Jahowa do tu naposo haposan, ”Idaonmu ma i, gabe digohi las ni roha ma ho mansai longang ma ho di bagasan las ni roha. Hamoraon ni angka bangso boanonna ma tu ho, hamoraon na sian bariba ni laut boanonna ma tu ho.” (Jes. 60:1, 4, 5, 9, Bibel siganup ari) Sintong do masa hata on! Marlas ni roha do naposo ni Jahowa naung leleng di organisasiNa mangida godang ni penyiar di negara ni nasida na lam tamba godang.

16, 17. Boasa panabur dohot panggotil boi ”rap marlas ni roha”? (Ida ma kotak ”Dua Risalah Mangonjar Roha ni Dua Halak di Amazon”.)

¹⁶ Boi do ra taingot hata ni Jesus tu apostelna na mandok, ”Panggotil i, papunguhon parbue tu hangoluan na salelenglelengna, asa rap marlas ni roha panabur dohot panggotil.” (Joh. 4:36) Aha do na mambahen hita ”rap marlas ni roha” di ulaon manggotil di liat portibi on? Taparrohahon ma tolu taringot tusi.

¹⁷ Na parjolo, Las do rohanta ala diurupi Jahowa do hita di ulaon on. Mamaritahon barita Harajaon dos ma i songon na manabur boni. (Mat. 13:18, 19) Tingki hita mangurupi sasahalak gabe siihuthon Jesus, dos ma i songon na manggotil, dung i sude hita marlas ni roha tingki Jahowa mambahen boni i ”martumbur” jala lam timbo. (Mrk. 4:27, 28) Sipata, olo do hita na manabur boni hasintongan, alai donganta na mangurupi hita di ulaon manggotil. Hea do ra tahilala songon pengalaman ni si Joan, donganta borua sian Inggris naung tardidi 60 taon naung salpu. Didok ibana, ”Pajumpang ma ahu dohot halak na mandok molo ahu do na manabur boni hasintongan di rohanasida martaontaon naung salpu. Di na so pamotoanku, marsiajar ma nasida dohot angka donganta na asing jala diurupi nasida gabe Sitindangi. Las do rohangku ala martumbur jala dipanen boni hasintongan na hubaritahon.”​—Jaha 1 Korint 3:6, 7. 

18. Aha do na mambahen hita marlas ni roha hombar tu 1 Korint 3:8?

¹⁸ Na paduahon, hita boi gabe parbarita na marlas ni roha molo taingot hata ni si Paulus, ”Ganup do manjalo upana, hombar tu pangulaonna be.” (1 Kor. 3:8) Upa dilehon alani ulaon naung diulahon, ndang alani hasilna. Hata on patoguhon roha ni angka donganta na marbarita di inganan na so godang halak manjangkon barita Harajaon! Di adopan ni Debata, ”marparbuehon na godang” do sude sitindangi na marsitutu di ulaon marbarita, jala on ma na mambahen nasida marlas ni roha.​—Joh. 15:8; Mat. 13:23.

19. (a) Sian surirang ni Jesus na disurat di Mateus 24:14, boasa hita boi tongtong marlas ni roha? (b) Aha do na ringkot taingot molo ndang sude halak na taurupi gabe siihuthon Jesus?

¹⁹ Patoluhon, hita marlas ni roha ala dohot manggohi surirang ni Jesus. Tingki disungkun tu Jesus, ”Dia ma tanda ni harorom dohot ajal ni hasiangan on?” Dipaboa Jesus do sada sian tanda ni harorona, i ma barita Harajaon dibaritahon di liat portibi on. Mambahen sisean do na nidok ni Jesus? Ndang songon i. Didok ibana, ”Laos baritahononhon do barita na uli on na taringot tu Harajaon i di liat portibi on, laho mangkatindangkonsa.” (Mat. 24:3, 14) Alani i, sada sian angka tanda na pinaboa ni Jesus, i ma ulaon marbarita manang manabur boni. Antong taingot ma, parsidohot do hita manggohi surirang taringot tu barita na uli ala olo hita ”mangkatindangkonsa”, nang pe ndang adong na taurupi gabe sisean ni Jesus.d Boi do hita muse tongtong marlas ni roha ala hita ”dongan pangula ni Debata”. (1 Kor. 3:9) On ma na ringkot na mambahen hita marlas ni roha!

20, 21. (a) Songon dia do hata di Maleaki 1:11 digohi? (b) Aha do na ringkot ulahononta jala boasa?

²⁰ Di abad na parjolo, diurupi Jesus do siseanna mangantusi na ingkon hatop diulahon ulaon marbarita. Tongtong do diurupi Jesus siihuthon ibana sian taon 1919 laho mangantusi na ringkot ulaon on. Ujungna, marsitutu do naposo ni Debata di ulaon on. Ndang adong na boi mangambati ulaon marbarita. Songon na disurirangkon si Maleaki, ulaon marbarita on diulahon ”sian habinsaran sahat ro di hasundutan”. (Mal. 1:11) Alani i manang didia pe, panabur dohot panggotil rap mangulahon ulaon marbarita jala rap marlas ni roha. Sian mulai binsar mata ni ari sahat tu botari, marsitutu do hita marbarita na uli di liat portibi on.

²¹ Molo taingot muse na masa saleleng 100 taon naung salpu, ”hinsa” jala las do rohanta ala taida songon dia naposo ni Debata boi gabe ”bangso na bolon”. (Jes. 60:5, 22) Anggiat ma las ni rohanta dohot holongta tu Jahowa, ”Nampuna sisabion i”, mangonjar rohanta pasaehon ulaon manggotil manang ulaon papunguhon di tingkinta on!​—Luk. 10:2.