Na disurat si Mateus
17 Onom ari dukkon i, ditogihon Jesus ma si Petrus, si Jakobus dohot si Johannes na marhaha maranggi nakkok tu dolok na timbo. Holan nasida do na lao tusi.+ 2 Dung i, diida nasida ma muba rupa ni Jesus, diida nasida ma marsinondang bohina songon mataniari jala pakkeanna pe massai bottar.+ 3 Toppu ma diida nasida si Musa dohot si Elia makkata-hatai dohot Jesus. 4 Dung i, didok si Petrus ma tu Jesus, “Tuan, las do rohanami dison. Molo lomo do roham, hupajongjong ma dison tolu kemah. Sada di ho, sada di si Musa, jala sada di si Elia.” 5 Tikki makkatai dope si Petrus, ro ma ombun na marsinondang jala ditutupi ma nasida. Tarbege ma soara sian ombun i mandok, “On do Anakku, haholongakki, las situtu do rohakku mangida ibana.+ Tangihon hamu ma ibana.”+ 6 Dung dibege nasida soara i, gabe mabiar situtu ma akka siseanna jala manukkap ma nasida. 7 Didapotton Jesus ma akka sisean i laos dijama ma nasida, ninna ma, “Jongjong ma hamu, unang pola mabiar.” 8 Dibereng nasida ma tu sakaliling ni nasida alai holan Jesus nama diida nasida disi. 9 Di tikki turun nasida sian dolok i, didok Jesus ma tu nasida, “Unang paboa-boa hamu na niidamuna i manang tu ise pe sahat tu na dipahehe Anak ni jolma i sian hamatean.”+
10 Alai, disukkun akka sisean i ma ibana, “Boasa didok akka siboto surat* na ikkon parjolo ro si Elia sian Kristus i?”+ 11 Dialusi Jesus ma, “Tutu do na nidokna i, na lao ro do si Elia padenggatton sude.+ 12 Alai hudok ma tu hamu, nungnga ro si Elia alai dang ditanda nasida ibana. Lomo-lomo ni nasida do tu ibana.+ Songon i do tong dibahen tu Anak ni jolma i. Marsitaonon do ibana dibahen nasida.”+ 13 Gabe diattusi akka sisean i ma si Johannes Pandidi do na nidokna disi.
14 Tikki didapotton nasida akka jolma na pungu i,+ ro ma sahalak bawa marsinggang tu jolo ni Jesus. Didok ibana ma, 15 “Tuan, asi ma roham tu anakku. Ai solpoton do ibana jala haccit do ditaon. Jotjot do ibana madabu tu api dohot tu aek.+ 16 Nungnga huboan ibana tu akka siseanmi, alai dang boi dipamalum.” 17 Didok Jesus ma mangalusi, “Sundut na so porsea jala na lilu do hamu.+ Sadia leleng nai ikkon sai rap au dohot hamu? Sadia leleng nai ikkon sabar au maradoppon hamu? Boan ma ibana tuson.” 18 Dung i, disonggak Jesus ma suru-suruan na jahat i, jala kaluar ma i sian anakna i. Laos di tikki i,+ malum ma ibana. 19 Tikki dang adong be halak na asing disi, ro ma akka siseanna i mandapotton Jesus. Didok nasida ma, “Boasa dang boi dipalao hami suru-suruan na jahat i?” 20 Ninna Jesus ma tu nasida, “Ai otik do haporseaonmuna. Tutu do na hudok on tu hamu, molo adong haporseaonmu nasa batu ni siarum, boi do dohononmu tu dolok on, ‘Pinda ma ho tusan,’ pinda do i. Jala dang adong na so boi bahenonmu.”+ 21* ——
22 Tikki rap marpungu nasida di Galilea, didok Jesus ma tu nasida, “Pasahatonna ma Anak ni jolma i tu akka musuna,+ 23 jala bunuon ni nasida ma ibana. Alai, dipahehe+ do ibana di ari patoluhon.” Gabe lungun ma roha ni nasida mambege i.
24 Dung sahat nasida di Kapernaum, didapotton sijalo pajak ma si Petrus, ninna ma, “Digarar gurumuna i do pajak na dua drakhma*+ i?” 25 Dialusi si Petrus ma, “Digarar.” Alai, dung masuk ibana tu sada jabu, jolo disukkun Jesus ma ibana, “Boha do pandapotmu Simon? Sian ise do dijalo akka raja ni portibi on iuran manang pajak? Sian akka anakna do manang sian halak na asing?” 26 Dialusi ibana ma, “Sian halak na asing.” Dung i, ninna Jesus ma, “Tutu, alani i dang ikkon manggarar pajak akka anakna i. 27 Alai, unang ma gabe partuktukan+ hita di nasida. Lao ma ho makkail tu laut. Buat ma dekke na parjolo dapotmu, bukka ma baba ni dekke i, dapotmu do annon sada logam perak* sian i. Buat ma i jala lehon ma i tu nasida lao manggarar pajakta na dua.”