Na disurat si Mateus
16 Dung i, ro ma halak Parise dohot Saduse mandapotton Jesus lao manguji ibana. Dipangido nasida ma asa dipatudu ibana tanda halongangan* sian Debata.+ 2 Dialusi Jesus ma nasida, “Di tikki botari, molo marrara langit didok hamu do, ‘Dang na lao ro be udan.’ 3 Jala di tikki manogot, molo marrara langit jala makkolom didok hamu do, ‘Ngali ni ari nama jala ro nama udan.’ Diboto hamu do mangida ari holan mangida langit. Alai dang diboto hamu lapatan ni akka tanda na masa di tikki on nang pe nungnga diida hamu i. 4 Jahat do sundut on jala dang setia.* Sai mangido tanda halongangan do nasida, alai dang adong be tanda halongangan silehonon,+ asing ni tanda halongangan na masa tu Panurirang* Jona.”+ Dung i lao ma ibana, ditadikkon ma nasida.
5 Tikki menyeberang nasida tu bariba, lupa do akka sisean ni Jesus mamboan roti.+ 6 Di tikki i didok Jesus ma tu nasida, “Manat ma hamu tu ragi ni halak Parise dohot Saduse.”+ 7 Gabe didok akka sisean i ma sama nasida, “Ala na so taboan i do ra roti umbahen didok ibana songon i.” 8 Dung diboto Jesus i, ninna ma, “Hamu siotik haporseaon, boasa pola diparsoalhon hamu roti na so adong diboan hamu? 9 Na so diattusi hamu dope lapatan ni hatakki? Na so diingot hamu do tikki hulehon mangan 5.000 bawa marhite lima roti? Piga karanjang nai na lobi dipapungu hamu?+ 10 Manang na so diingot hamu do tikki hulehon mangan 4.000 bawa marhite pitu roti? Piga karanjang na balga* dipapungu hamu lobina?+ 11 Dang taringot roti na hudok. Boasa dope dang diattusi hamu? Alai, na hudok ikkon manat do hamu tu ragi ni halak Parise dohot Saduse.”+ 12 Sian i diboto nasida ma dang taringot ragi ni roti na dihatai Jesus, alai ikkon manat do nasida tu ajaran ni halak Parise dohot Saduse.
13 Dung sahat ibana di luat Kaesarea Pilippi, disukkun Jesus ma tu siseanna, “Didok halak, ise do Anak ni jolma i?”+ 14 Dialusi nasida ma, “Adong na mandok si Johannes Pandidi.+ Adong muse na mandok si Elia.+ Na asing muse mandok si Jeremia manang sahalak sian panurirang.” 15 Didok Jesus ma tu nasida, “Alai menurut hamu, ise do au?” 16 Dialusi si Simon Petrus ma, “Kristus i do ho,+ Anak ni Debata na mangolu i.”+ 17 Didok Jesus ma tu ibana, “Marlas ni roha ma ho Simon anak ni si Jona, ai dang jolma* na mangurupi ho mangattusi i, alai Damang na di banua ginjang i do.+ 18 Hudok ma tu ho, Ho do si Petrus*+ jala di ginjang ni batu+ on do pajongjongokku huriakku, jala na so talu i bahenon ni akka gerbang ni Kuburan.* 19 Lehonokku ma tu ho kucci ni Harajaon banua ginjang i. Alani i, manang aha naung diikkat ho di tano on, naung diikkat do i di banua ginjang. Jala manang aha naung dipalua ho di tano on, naung dipalua do i di banua ginjang.” 20 Dung i, takkas ma didok tu akka siseanna, asa unang dipaboa-boa tu na asing na ibana do Kristus i.+
21 Mulai sian tikki i, dipaboa Jesus ma tu akka siseanna na ikkon lao ibana tu Jerusalem jala marsitaonon alani akka pangituai,* malim kepala* dohot akka siboto surat.* Bunuon ni nasida ma ibana alai hehe+ do ibana di ari patoluhon. 22 Ditarik si Petrus ma Jesus tu labbungna, jala dipasingot ma ibana, “Asi ma roham tu dirim Tuan. Dang na lao masa i tu ho.”+ 23 Alai, marbalik ma Jesus jala didok, “Lao ma ho tu pudikku Bolis! Batu partuktukan do ho di au, ai dang pikkiran ni Debata dipikkirhon ho, pikkiran ni jolma do.”+
24 Dung i ninna Jesus ma tu akka siseanna, “Manang ise na naeng mangihutton au, ikkon disoadahon do dirina* jala ikkon dituhuk ibana do hau partinaonan* i jala toktong ma diihutton au.+ 25 Manang ise na marsitutu paluahon ngoluna, na lao mate do ibana. Jala manang ise na mate alani au, mulak mangolu do ibana muse.+ 26 Ai tung pe dapot ni sasahalak sude na di portibi on, alai gabe mate ibana aha ma guna ni i?+ Manang, aha ma na boi lehonon ni sasahalak gatti ni ngoluna?+ 27 Ai na ro ma Anak ni jolma i di bagasan hasangapon ni Amana. Ro ma ibana rap dohot akka suru-suruan. Dung i, balosonna ma tu ganup halak hombar tu na niulana.+ 28 Tutu do na hudok on tu hamu, adong do sian na jongjong dison na so mate dope molo so jolo diida nasida ro Anak ni jolma i di Harajaonna.”+