Surat tu Huria na di Kolosse
3 Molo nungnga dipahehe hamu rap dohot Kristus,+ sai akka na di surgo i ma lului hamu. Ai disi do Kristus hundul, di sabola kanan ni Debata.+ 2 Sai tu akka na di surgo i ma parrohahon hamu,+ unang akka na di tano on.+ 3 Ai nungnga mate hamu, jala di tangan ni Kristus i do ngolumuna hombar tu lomo ni roha ni Debata. 4 Tikki dipapatar Kristus na mangalehon hangoluan,*+ papataronna ma hamu rap dohot ibana di bagasan hasangaponna.+
5 Pamate hamu ma akka pangalaho ni portibi on sian dirimuna,+ i ma seks na so patut, akka ulaon na ramun,* giot-giot ni daging* na so boi dirajai,+ roha na jahat, dohot hahisapon. Ai dos songon na manomba akka patung do i. 6 Ai alani akka pangalaho sisongon on do ro rimas ni Debata. 7 Songon i do pangalahomuna najolo.+ 8 Alai saonari, pasiding hamu ma rimas, muruk, hajahaton,+ hata na mangaleai,+ dohot akka hata na rorang+ sian pamanganmuna. 9 Unang ma masigabusan.+ Tanggalhon hamu ma pangalaho* na leleng+ dohot akka na diulahon hamu najolo. 10 Jala pakke hamu ma pangalaho na imbaru+ na nilehon ni Debata dung ditanda hamu Ibana. Dung i, dipaimbaru ma pangalahomuna asa songon pangalaho ni Debata.+ 11 Molo nungnga dipaimbaru pangalahomuna, dang marimbar be di hamu halak Junani manang halak Jahudi, na marsunat manang na so marsunat, halak na ro, parhuta-huta,* hatoban, manang halak na merdeka. Alai Kristus i do saluhutna jala marsada ma hita sude di bagasan ibana.+
12 Akka na pinillit ni Debata do hamu,+ na badia jala na dihaholongi. Alani i, patuduhon hamu ma holong ni roha,+ haburjuon, toruk ni roha,+ lambok ni roha,+ jala sabar.+ 13 Toktong ma hamu sabar tu na asing, jala rade ma hamu manalpuhon hasalaan ni nasida+ nang pe haccit rohamuna dibahen.+ Songon Jahowa* na rade manalpuhon hasalaanmuna, songon i ma ulahon hamu.+ 14 Asing ni i sude, patuduhon hamu ma holong.+ Ai holong ni roha do na boi mambahen jolma marsada.+
15 Dame na sian Kristus i ma na mangarajai rohamuna.+ Ai nungnga dijou Debata hamu asa gabe sada daging jala mardame. Jala toktong ma hamu mandok mauliate. 16 Anggiat ma ajaran ni Kristus manggohi rohamuna, asa gabe marbisuk hamu. Toktong ma ajari jala patogu* na asing marhite mangendehon psalmen,+ mamuji Debata, dohot mangendehon ende puji-pujian. Endehon hamu ma puji-pujian tu Jahowa* sian bagasan rohamuna.+ 17 Manang aha na dihatahon hamu jala na diulahon hamu, ulahon ma sudena i di bagasan goar ni Tuan Jesus. Jala mandok mauliate ma hamu tu Debata Ama i marhite ibana.+
18 Hamu akka istri, oloi hamu ma suamimuna+ songon mangoloi Tuan. 19 Hamu akka suami, haholongi hamu ma istrimuna,+ jala unang ma kasar* tu nasida.+ 20 Hamu akka dakdanak, oloi hamu ma natua-tuamuna,+ ai i do na dihalomohon Debata. 21 Hamu akka ama, unang ma bahen jut roha ni ianakkonmuna,+ asa unang gabe marmetmet ni roha* nasida. 22 Hamu akka hatoban, oloi hamu ma tuanmuna na di tano on.+ Dang holan tikki adong na mangida lao pasonakkon roha ni jolma, alai sian nasa roha ma mardongan biar mida Jahowa.* 23 Manang aha pe diulahon hamu, ulahon ma i sian nasa roha* songon tu Jahowa,*+ dang tu jolma. 24 Ai diboto hamu do, sude do hamu mandapot upa sian Jahowa.*+ Gabe hatoban ni Tuanta ma hamu, i ma Kristus i. 25 Hukumonna do halak na marsala hombar tu na diulahon ibana,+ ai dang dipaimbar-imbar Debata manang ise pe.+