Jeremia
1 On ma hata ni si Jeremia* anak ni Malim Hilkia, sahalak sian malim na di Anatot+ di luat ni marga Benjamin. 2 Dung 13 taon mamaretta si Josia+ anak ni si Amon+ raja ni Juda, makkatai ma Jahowa tu si Jeremia. 3 Makkatai do muse Debata tu si Jeremia di tikki pamarettaon ni si Jehoyakim+ anak ni si Josia raja ni Juda. Makkatai do Debata tu ibana sahat tu na marujung 11 taon pamarettaon ni si Sedekia,+ anak ni si Josia raja ni Juda, i ma sahat tu na diboan musu penduduk ni Jerusalem di bulan na palimahon.+
4 Didok Jahowa ma tu au,
Nungnga hupillit ho lao gabe panurirang* tu akka bangso.”
6 Alai hudok ma, “Ale Jahowa Tuan Natumimbul!
Dang malo au makkatai,+ ai poso dope au.”+
7 Didok Jahowa ma tu au,
“Unang ma dokkon, ‘Poso dope au.’
Manang tu ise ho husuru, ikkon lao do ho,
Jala ikkon paboaonmu do sude na huparettahon tu ho.+
8 Unang pola mabiar ho tu nasida,+
Ai Au do Jahowa na mandok tu ho, ‘Donganakku do ho asa selamat ho.’”+
9 Dung i dijama Jahowa ma pamanganku.+ Didok Jahowa ma tu au, “Nungnga hupeakkon be hatakki di pamanganmu.+ 10 Saonari, hulehon ma tu ho huaso, asa boi dirajai ho akka bangso dohot akka harajaon. Lehonokku ma tu ho huaso lao mancabut jala mangaruppakkon, manegai jala manghancurhon, pajongjokkon jala manuan.”+
11 Dung i didok Jahowa ma muse tu au, ninna ma, “Aha do na diidami Jeremia?” Hualusi ma, “Adong huida dakka ni hau almond.”*
12 Didok Jahowa ma tu au, “Sittong do na nidokmi. Ai toktong do Au jaga lao pasautton hatakki.”
13 Makkatai ma muse Jahowa tu au, “Aha do na niidami?” Hualusi ma, “Adong huida hudon na gurgur isina.* Hudon i ro sian utara jala babana miring tu sabola selatan.” 14 Dung i didok Jahowa ma tu au,
“Na lao ro ma hasusaan sian utara
Jala masa ma i tu sude halak na di luat on.+
15 Ai didok Jahowa do, ‘Jouokku ma sude keluarga sian akka harajaon na di utara,+
Jala na lao ro ma nasida, dipeakkon nasida ma tahta ni nasida be,
Dipeakkon ma i di jolo ni akka gerbang ni Jerusalem.+
Ro ma nasida tu sakaliling ni tembokna,
Jala tu sude kota na di Juda.+
16 Paboaokku ma hukuman na lao bahenokku tu bangsokki alani hajahaton ni nasida,
Ai nungnga ditinggalhon nasida Au,+
Ditutung nasida do pelean* tu akka debata na asing,+
Jala marsomba do nasida tu jolo ni akka barang na binahen ni tangan ni nasida.’+
17 Alai ikkon toktong do ho rade,*
Lao ma ho jala paboa ma tu nasida sude na huparettahon i tu ho.
Unang mabiar ho tu nasida,+
Asa unang hubahen ho lam mabiar di jolo ni nasida.
18 Ai bahenokku ma ho sadari on songon kota na marbenteng,
Songon tiang na sian bosi dohot songon tembok na sian tombaga lao mangalo sude na di luat i,+
Akka raja ni Juda dohot akka pejabatna,
Akka malim na disi dohot sude penduduk ni luat i.+
19 Ai pasti aloon ni nasida do ho,
Alai dang tolap nasida manaluhon ho,
Ai Au do Jahowa na mandok tu ho, ‘Donganakku do ho+ asa selamat ho.’”