Hesekiel

11 Dung i adong ma huaso* na mangangkat au. Diboan ma au tu gerbang na di sabola timur na di jabu ni Jahowa. Gerbang i menghadap tu timur.+ Huida ma adong 25 bawa di pintu masuk ni gerbang i. Adong do sian nasida pamimpin ni bangso i,+ goarna si Jesania anak ni si Azur dohot si Pelatia anak ni si Benaya. 2 Dung i didok Ibana ma tu au, “Ale anak ni jolma, nasida do akka halak na mangatur jala na mambahen rencana na jahat dohot na mangalehon poda na so hasea di* kota on. 3 Didok nasida do, ‘Beta, saonari ma tikkina, tapajongjong ma akka jabutta.+ Ai songon hudon na balga+ do kota on* jala songon jagal* do hita di bagasanna.’

4 “Ale anak ni jolma,+ paboa ma aha na lao masa tu nasida, paboa ma!”*

5 Dung i huhilala ma tondi parbadia ni Jahowa di bagasan dirikku,+ jala didok Ibana ma tu au, “Dokkon ma, ‘Songon on do hata ni Jahowa, “Ale halak Israel, sittong do na nidokmuna i, jala takkas do huboto aha na di pikkiranmuna. 6 Godang do halak na mate dibahen hamu di kota on jala gok do akka bakke dibahen hamu di akka dalan.”’”+ 7 “Alani i, songon on ma hata ni Jahowa Tuan Natumimbul i, ‘Tutu, songon hudon do kota on. Alai anggo hamu pakaluaron do sian kota on. Jala bakke ni halak na dibahen hamu marpeakan di kota on ma na gabe songon jagal di bagasan hudon i.’”+

8 “‘Mabiar do hamu tu podang,+ alai podang do parookku tu hamu,’ songon i ma hata ni Jahowa Tuan Natumimbul i. 9 ‘Pakaluarokku ma hamu sian i, pasahatonku ma hamu tu tangan ni akka halak na sian bangso na asing, jala hona hukum ma hamu bahenokku.+ 10 Marmatean ma hamu alani podang.+ Hukumokku ma hamu di parbatasan ni Israel,+ jala botoonmuna ma na Au do Jahowa.+ 11 Dang songon hudon be kota on di hamu, jala hamu pe dang songon jagal na di bagasan ni hudon i. Hukumokku ma hamu di parbatasan ni Israel, 12 jala botoonmuna ma na Au do Jahowa, ai dang diihutton hamu aturanku, jala dang diulahon hamu akka patikku.+ Diihutton hamu do patik ni akka bangso na di sakalilingmuna.’”+

13 Disi sae hupaboa aha na lao masa tu nasida, mate ma si Pelatia anak ni si Benaya. Alani i, pittor marsomba ma au, jala gogo ma hudok, “Ale Jahowa Tuan Natumimbul, na naeng pamateonmu do sude halak Israel na mangolu on?”+

14 Dung i didok Jahowa ma muse tu au, 15 “Ale anak ni jolma, nungnga didok penduduk ni Jerusalem songon on tu akka haha anggim, tu sisolhotmu,* dohot tu sude halak Israel, ‘Mandao ma hamu sude sian Jahowa. Ai appunanami do luat on jala nungnga dilehon luat on lao gabe appunanami.’ 16 Alani i, dokkon ma, ‘On ma hata ni Jahowa Tuan Natumimbul i, “Nang pe hubolokkon nasida dao tu tonga-tonga ni akka bangso na asing, jala gabe marserak nasida tu akka luat,+ alai Au ma na gabe songon inganan na badia di nasida di akka luat i di bagasan satokkin.”’+

17 “Alani i, dok ma muse, ‘On do hata ni Jahowa Tuan Natumimbul i, “Papunguokku do muse hamu sian tonga-tonga ni bangso dohot sian akka luat ingananmuna marserak i. Jala lehonokku ma tu hamu luat ni Israel.+ 18 Jala na lao mulak ma nasida muse tusi. Bolokkonon ni nasida ma sude sian i patung dohot ulaon na huhagigihon.+ 19 Bahenokku ma nasida sude marsada,+ jala hupaimbaru ma roha ni nasida.+ Bolokkonokku ma sian daging ni nasida roha na karas na songon batu.+ Jala lehonokku ma tu nasida roha pangoloi,*+ 20 asa diihutton nasida aturanku, dioloi, jala diulahon nasida akka patikku. Alani i, nasida ma na gabe bangsokku jala Au ma na gabe Debata ni nasida.’”

21 “‘“Alai taringot tu akka halak na lomo rohana torus mangulahon akka na ramun* dohot ulaon na mambahen Au magigi, bahenokku ma nasida makkilala akibat ni pangalaho ni nasida,” ninna Jahowa Tuan Natumimbul i.’”

22 Dipahembang akka kerubim* i ma habong ni nasida. Di labbung ni nasida do akka roda i,+ jala hamuliaon ni Debata ni Israel adong di atas ni nasida.+ 23 Dung i tarangkat ma hamuliaon ni Jahowa+ sian kota i. Jala so ma hamuliaonna i di atas ni dolok na di sabola timur ni kota i.+ 24 Di bagasan parnidaan na dapottu marhite tondi parbadia ni Debata, diangkat ma au. Diboan sada huaso ma au tu inganan ni akka halak na tartakkup di Kasdim. Dukkon i mago ma parnidaan i sian au. 25 Gabe hupaboa ma tu akka halak na tartakkup i sude na dipatudu Jahowa tu au.