Hesekiel

10 Dung i huida ma adong na songon batu safir di atas ni lante. Lante i adong di atas ni ulu ni akka kerubim.* Bentuk ni batu safir i songon tahta.+ 2 Didok Ibana ma tu bawa na mamakke baju linen i,+ “Masuk ma ho tu holang-kolang ni akka roda na marputar i,+ tu toru ni akka kerubim i. Gomak ma pakke tanganmu na dua i gara ni api+ na adong di holang-kolang ni akka kerubim i. Dung i sappatton ma i tu atas ni kota i.”+ Jadi huida ma ibana masuk tusi.

3 Tikki masuk ibana, jongjong do akka kerubim di sabola kanan ni bagas joro. Jala ditutupi ombun do alaman ni bagas joro na di bagasan. 4 Dung i tarangkat ma hamuliaon ni Jahowa+ sian akka kerubim i. Jala pinda ma tu pintu ni bagas joro i. Lam leleng ditutupi ombun ma bagas joro i.+ Jala dohot do alaman i ditutupi hamuliaon ni Jahowa. 5 Soara ni habong ni akka kerubim i, boi tarbege sahat tu alaman ni bagas joro na di luar. Soara ni habongna i songon soara ni Debata Pargogo na So Hatudosan tikki makkatai Ibana.+

6 Didok Ibana ma muse tu bawa na marbaju linen i, “Buat ma api sian holang-kolang ni akka roda na marputar i, sian holang-kolang ni akka kerubim i.” Dung i masuk ma ibana jala jongjong di labbung ni sada sian akka roda i. 7 Dung i dipamasuk sada sian kerubim i ma tanganna tu api na di holang-kolang ni akka kerubim i.+ Dibuat ibana ma saotik gara ni api jala dipeakkon tu duassa tangan ni bawa na marbaju linen i.+ Dijalo bawa i ma jala kaluar ma ibana. 8 Adong do tangan ni akka kerubim i na songon tangan ni jolma. Tangan i adong di toru ni ganup habong ni nasida.+

9 Dung i huida ma adong opat roda di labbung ni akka kerubim i. Sada roda di labbung ni sada kerubim. Roda na opat i marhillong songon batu krisolit.+ 10 Sarupa do idaon bentuk ni roda na opat i. Bentukna idaon songon dua roda na dipasang marsilang.* 11 Boi do akka roda i mardalan manang tu arah na dia pe, dang pola porlu jolo marbelok. Manang tudia arah ni bohi ni kerubim* i, tusi ma akka roda i mardalan, dang pola porlu jolo marbelok. 12 Gok do akka mata di sude daging ni akka kerubim i, di tanggurungna, di tanganna, dohot di habong ni nasida. Jala gok do akka mata muse di akka roda na adong di labbung ni kerubim na opat i.+ 13 Dung i hubege ma adong soara na mandok tu akka roda i, “Hamu akka roda na marputar, mardalan ma hamu!”

14 Ganup sian suru-suruan* i adong opat bohina. Bohi na parjolo bohi ni kerubim. Bohi na paduahon bohi ni jolma. Bohi na patoluhon bohi ni singa. Jala na paopatton bohi ni lali.+

15 Akka kerubim on, i ma akka suru-suruan na hea huida tikki di Sunge Hebar.+ Boi do tarangkat akka kerubim i. 16 Molo mardalan akka kerubim i, dohot do mardalan akka roda i di lambung ni nasida. Molo diherbangkon akka kerubim i habong ni nasida asa lam timbo nasida tarangkat sian tano, dang marbelok akka roda i manang pinda sian labbung ni nasida.+ 17 Molo so nasida di sada inganan, dohot do akka roda i so disi. Molo tarangkat akka suru-suruan i, mangihut do akka roda i tarangkat. Ai tondi parbadia na mangarahon akka suru-suruan i pe, adong do di bagasan ni akka roda i.

18 Dung i lao ma hamuliaon ni Jahowa+ sian pintu ni bagas joro i, jala so di atas ni akka kerubim i.+ 19 Huida ma dipahembang akka kerubim i habong ni nasida, jala tarangkat ma nasida sian tano. Tikki na tarangkat i nasida, dohot do akka roda i tarangkat di labbung ni nasida. Dung i so ma nasida di pintu masuk ni gerbang na di sabola timur na di jabu ni Jahowa. Jala adong do hamuliaon ni Debata ni Israel di atas ni nasida.+

20 Nasida do akka suru-suruan na hea huida di Sunge Hebar.+ Huida do nasida di tikki i di toru ni tahta ni Debata ni Israel. Saonari huboto ma akka kerubim do nasida. 21 Ganup sian nasida adong opat bohina jala opat habongna. Jala di toru ni ganup habong ni nasida adong tangan na songon tangan ni jolma.+ 22 Sarupa do bohi ni nasida songon bohi ni suru-suruan na hea huida di labbung ni Sunge Hebar.+ Tigor do nasida mardalan tu jolo.+