Hesekiel
28 Dung i didok Jahowa ma muse tu au, 2 “Ale anak ni jolma paboa ma tu pamimpin ni Tirus, ‘Songon on do hata ni Jahowa Tuan Natumimbul i,
“Ala nungnga gabe ginjang roham+ jala sai didok ho, ‘Debata do au.
Hundul do au di tahta ni debata na di tonga-tonga ni laut.’+
Nang pe didok roham debata ho,
Alai holan jolma biasa do ho, dang Debata.
3 Ida ma! Ummalo do ho sian si Daniel.+
Dang adong rahasia na buni sian ho.
4 Alani bisukmu dohot alani malom gabe mamora do ho.
Torus do dipapungu-pungu ho masmu dohot perakmu di inganan ni panimpanan ni artam.+
5 Alani malom martiga-tiga gabe mamora ma ho,+
Jala gabe ginjang ma roham alani hamoraonmi.”’
6 “‘Alani i songon on do hata ni Jahowa Tuan Natumimbul i,
“Ala didok roham do songon debata ho,
7 Parookku ma halak sian bangso na asing mangalo ho, i ma bangso na ukkejam sian sude bangso,+
Pakaluaron ni nasida ma podang ni nasida lao mambahen hancur sude akka na uli na dapotmu alani bisukmi,
Jala bahenon ni nasida ma ramun* hamuliaonmi.+
8 Boanon ni nasida ma ho turun tu kuburan,
Jala massai ngeri do parmatem di tonga-tonga ni laut i.+
9 Boi dope dohononmu tu halak na pamatehon ho, ‘debata do au’?
Holan jolma biasa do ho di tangan ni halak na mambahen ho ramun, dang debata ho di nasida.”’
10 ‘Mate ma ho songon parmate ni halak na so marsunat di tangan ni halak na sian bangso na asing.
Ai Au sandiri do na mandok i,’ ninna Jahowa Tuan Natumimbul i.”
11 Dung i didok Jahowa ma muse tu au, 12 “Ale anak ni jolma, endehon ma ende andung-andung taringot tu raja ni Tirus, dok ma tu ibana, ‘Songon on do hata ni Jahowa Tuan Natumimbul:
13 Najolo di Eden do ho, di taman ni Debata.
Sude ragam ni batu na arga dipakke gabe hiasanmu
Batu permata na merah,* batu topas, batu yaspis, batu krisolit, batu oniks, batu giok, batu safir, batu turkois,+ dohot batu zamrud,
Sude batu i dipasang di atas ni alas na dibahen sian mas.
Nungnga diparade sudena i di ari tikki hutoppa ho.
14 Hupillit ma ho gabe kerubim* na dilantik lao manjaga.
Najolo di dolok ni Debata na badia do ho,+ jala mardalani do ho di tonga-tonga ni akka batu na marapi.
15 Sian mulai na ditoppa ho denggan do pangalahom,
Sahat tu mulai diulahon ho na so sittong.+
Gabe ramun ma ho di Au, jala hupalao ma ho sian dolok ni Debata jala pamateonku ma ho,+
Ale kerubim naung dipillit lao manjaga, palaookku ma ho dao sian batu na marapi.
17 Gabe ginjang ma roham alani haulionmi.+
Gabe dang marbisuk be ho alani hamuliaonmi.+
Husappatton nama ho tu tano on.+
Jala bahenokku ma ho gabe sitottonon ni akka raja.
18 Alani dosam na balga i dohot ala ni caram martiga-tiga na so sittong i, gabe ramun do dibahen ho ingananmu na badia i.
Bahenokku ma api na marsigorgor tu tonga-tongam jala tutungonna ma ho.+
Bahenokku ma ho gabe sirabun di atas ni tano i, di jolo ni sude halak na mangida ho.
19 Sude akka bangso na mananda ho, longang mangida na masa tu ho.+
Ai na lao toppu do ho marujung jala massai ngeri do i,
Dang na lao adong be ho sahat tu saleleng ni lelengna.”’”+
20 Dung i didok Jahowa ma muse tu au, 21 “Ale anak ni jolma, ida ma doppak Sidon,+ jala paboa ma aha na lao masa taringot tu ibana. 22 Dokkon ma, ‘Songon on do hata ni Jahowa Tuan Natumimbul i,
“Ale Sidon, Au nama na gabe alom. Dipabadia nama Au di tonga-tongam,
Tikki huhukum ho jala tikki hupabadia dirikku marhite ho, botoon ni akka halak ma na Au do Jahowa.
23 “‘“Parookku ma sahit jala bahenokku ma marusean mudar di akka dalanmu.
Tikki ro podang mangalo ho di sude inganan, marpeakan ma akka bakke ni halak naung mate tarbunu di tonga-tongam.
Botoon ni nasida ma na Au do Jahowa.+
24 “‘“Molo dung masa i, dang adong be di sakaliling ni Israel ramba na marsuga na sai manusuk nasida.+ Dang dikalilingi sude halak na mangaleai nasida be halak Israel. Sian i botoon ni akka halak ma na Au do Jahowa Tuan Natumimbul i.”’
25 “‘Songon on do hata ni Jahowa Tuan Natumimbul i, “Tikki hupapungu Israel sian tonga-tonga ni akka bangso inganan ni nasida na marserak i,+ hupabadia do dirikku di tonga-tonga ni nasida di jolo ni akka bangso.+ Dung i, maringanan ma nasida di luat ni nasida sandiri,+ i ma luat naung hulehon tu naposokku si Jakkob.+ 26 Aman ma nasida tinggal di luat i.+ Pajongjongon ni nasida ma disi jabu jala bahenon ni nasida ma akka ladang anggur.+ Ai molo dung huhukum akka halak na mangaleai na di sakaliling ni nasida, gabe aman ma nasida tinggal disi.+ Sian i botoon ni nasida ma na Au do Jahowa Debata ni nasida.”’”