1 Samuel
2 Dung i martangiang ma si Hanna,
Hubukka do pamanganku lao mangalusi akka musukku,
Marlas ni roha do au ala dipalua Ho do au.
2 Dang adong na badia tudoshon Jahowa,
Dang adong na dos songon Ho,+
Dang adong dolok batu na songon Debatanta.+
3 Unang ma sai marhata manggang hamu;
Unang ma lomo-lomomuna makkatai,
Ai Jahowa do Debata na mamboto sasude,+
Jala sittong do dipareso Ibana akka pambahenan ni jolma.
4 Marponggolan do panah ni halak na gogo,
Alai dipargogoi do halak na tartuktuk.+
5 Halak na butong ikkon karejo asa mandapot roti,
Alai halak na male, dang male be.+
6 Boi do Jahowa pamatehon jala boi do Ibana mangalehon hangoluan;
Boi do Ibana pamasukkon halak tu Kuburan,* jala boi do Ibana pahehehon.+
7 Boi do Jahowa mambahen halak marpogos, jala boi do Ibana mambahen halak mamora;+
Boi do dipatutoru Ibana halak, jala boi do dipatimbo Ibana halak.+
8 Diangkat Ibana do akka na lea sian orbuk;
Jala diangkat Ibana do halak na pogos sian hasusaan ni nasida,*+
Dibahen do nasida hundul rap dohot akka na sangap,
Jala dibahen do nasida gabe pamimpin, asa sangap nasida.
Jahowa do nappuna fondasi ni tano on,+
Jala dibahen Ibana do tano on di ginjang ni fondasi i.
9 Diparrohahon Ibana do na niulahon ni akka naposona na setia,+
Alai dipamate Ibana do halak na jahat di inganan na holom,+
Ai dang alani gogona jolma monang.+
10 Pamateon ni Jahowa do halak na mangalo Ibana;*+
Diparo do ronggur sian langit+ tikki muruk Ibana tu nasida.
11 Dung i mulak ma si Elkana tu jabuna di Rama. Alai, tinggal do anakna i disi lao marhobas tu Jahowa,+ jala Malim Eli do na mangajar-ajari ibana.
12 Halak na jahat do akka anak ni si Eli,+ jala dang dipasangap nasida Jahowa. 13 Songon on ma dibahen nasida tu parbagianan naung ditottuhon tu akka malim:+ Tikki adong halak mangalehon pelean, ro ma pangurupi ni malim i mamboan garpu na balga. Tikki dirobus dope jagal i, 14 ditusukkon ibana ma garpu i tu jagal na di pangaloppaan i, na di dangdang, na di balanga, manang na di hudon. Gabe di malim i ma sude jagal na lokkot tu garpu i. Songon i ma dibahen nasida tu sude pelean na diboan halak Israel tu Silo. 15 Gariada, andorang so ditutung dope tabo-tabo ni jagal i,+ ro do pangurupi ni malim i mandok tu halak na lao mamelehon i, “Lehon ma jagal na tata i tu malim asa dipanggang. Ai dang olo ibana manjalo jagal na dirobus.” 16 Molo didok halak na lao mamelehon i, “Jolo tutung ma jo tabo-tabo i,+ asa buat dia lomo ni roham,” dohonon ni pangurupi ni malim i ma, “Daong, ikkon saonari do. Molo dang olo ho, rampasokku do i sian ho!” 17 Alani i, massai balga do dosa ni akka pangurupi ni malim i di jolo ni Jahowa.+ Ai leas do roha ni nasida tu pelean na lao dilehon tu Jahowa.
18 Tikki i, marhobas do si Samuel+ di jolo ni Jahowa. Dipakke ibana do* baju epod na sian linen,+ nang pe dakdanak dope ibana di tikki i. 19 Ganup taon, dibahen omak ni si Samuel do sada rompi na ganjang di ibana. Dilehon ma i tu ibana, tikki ro omakna dohot bapakna mamboan pelean siganup taon.+ 20 Jala dipasu-pasu si Eli ma si Elkana dohot istrina. Didok ibana ma, “Sai dilehon Jahowa ma muse anakmu sian istrimon lao manggattihon anak naung nilehonmi tu* Jahowa.”+ Dung i, mulak ma nasida tu jabuna. 21 Diparrohahon Jahowa ma si Hanna, gabe hamil ma ibana+ jala tubu ma tolu nai anakna dohot dua boruna. Lam magodang ma si Samuel jala toktong do ibana marhobas tu Jahowa.+
22 Nungnga matua hian si Eli tikki i. Diboto ibana do na binahen ni akka anakna+ tu sude halak Israel. Jala diboto ibana do na mangulahon seks* akka anakna tu akka borua na marhobas di pintu ni kemah parpunguan.+ 23 Sai didok si Eli do tu akka anakna i, “Boasa sai diulahon hamu songon i? Ai akka na jahat do hubege sian sude halak taringot hamu. 24 Unang ma bahen hamu songon i anakku. Ai barita na so denggan do na hubege dipaboa-boa bangso ni Jahowa taringot tu hamu. 25 Molo mardosa sasahalak tu donganna, adong do halak na manangiakkon ibana tu Jahowa asa diurupi ibana.* Alai molo tu Jahowa do sasahalak mardosa,+ ise ma na boi manangiakkon ibana?” Nang pe songon i, dang olo nasida manangihon hata ni bapak ni nasida. Ai nungnga ditottuhon Jahowa na lao dipamate nasida.+ 26 Alai anggo si Samuel, lam magodang ma ibana. Jala lomo do roha ni Jahowa dohot sude halak tu ibana.+
27 Ro ma sahalak naposo ni Debata mandapotton si Eli, jala didok ma, “Songon on ma didok Jahowa, ‘Nungnga takkas hupatandahon ise Au tu keluarga ni ompumuna. Tikki i, di Mesir dope nasida gabe hatoban ni keluarga ni si Firaun.+ 28 Jala nungnga hupillit keluarga ni ompumuna sian sude marga ni halak Israel+ lao gabe malim di Au, lao mangalehon pelean di langgatanku,+ manutung dupa,* jala mamakke epod di jolokku. Alani i ma hulehon hak tu keluarga ni ompumuna, asa dibuat jagal bagian ni nasida sian pelean situtungon ni halak Israel.+ 29 Boasa ma leas rohamuna tu pelean na huparettahon asa dilehon di inganakki?+ Boasa sai ussangap dibahen ho akka anakmi sian Au? Sonang do roham mangallang bagian na dumenggan sian sude pelean ni halak Israel.+
30 “‘Alani i do gabe didok Jahowa Debata ni Israel songon on, “Nungnga hupaboa hian tu keluargam dohot tu keluarga ni ompum asa nasida na toktong marhobas di jolokku.”*+ Alai saonari, songon on ma didok Jahowa, “Dang songon i be. Ai sangap do bahenokku halak na pasangappon Au+ jala leas do rohakku tu halak na leas rohana tu Au.” 31 Na ro ma tikkina, dang lehonokku be gogo dohot huaso tu ho dohot tu keluarga ni bapakmu.* Alani i, dang adong be nanggo sahalak pe sian keluargam na ganjang umurna.+ 32 Tikki denggan ngolu ni halak Israel, idaonmu ma ro musumuna tu inganakki.+ Jala dang adong be nanggo sahalak pe sian keluargam na ganjang umurna. 33 Adong do sada sian pinopparmu na hupasombu marhobas di langgatanku. Alai mapitung ma bahenonna matam jala marsak ma bahenonna roham. Jala na lao mate do godangan sian pinopparmu alani podang.+ 34 Asa diboto ho na tutu na hudok i, lehonokku ma tanda di ho: Di bagasan sadari, mate ma anakmu na dua i si Hopni dohot si Pinehas.+ 35 Dung i, pillitokku ma sahalak malim na setia di Au.+ Ulahononna do lomo ni rohakku. Sian pinopparna ma bahenokku torus gabe malim. Jala toktong ma ibana marhobas gabe malim tu* halak na hupillit.* 36 Manang ise na mangolu dope sian keluargam, na lao ro ma nasida marsinggang tu jolo ni malim na hupillit i. Pangidoonna ma karejo tu malim i asa boi dapotna saotik hepeng dohot roti. Dohononna ma, “Bahen ma au gabe malim, asa boi dapottu roti lao allangokku.”’”+