Na disurat si Mateus

14 Di tikki i, dibege Raja Herodes ma barita taringot tu Jesus,+ 2 ninna ma tu hatobanna, “Si Johannes Pandidi do i. Nungnga hehe ibana sian na mate. I do alana boi dibahen ibana akka tanda halongangan.”*+ 3 Andorang so i, nungnga ditakkup si Herodes* hian si Johannes. Nungnga diratte ibana jala dipenjarahon. Dibahen si Herodes pe songon i, lao pasonakkon roha ni si Herodias istri ni abangna si Pilippus.+ 4 Ai sai didok si Johannes do tu ibana, “Mangihutton patik, dang boi buatonmu ibana gabe istrim.”+ 5 Alani i, naeng dibunu si Herodes ma si Johannes. Alai, mabiar do ibana tu akka halak. Ai didok halak, panurirang* do si Johannes.+ 6 Di pesta ari hatutubu ni si Herodes,+ manortor ma boru ni si Herodias jala massai las ma roha ni si Herodes.+ 7 Marsumpa ma si Herodes na lehononna do manang aha pe pangidoan ni boru ni si Herodias. 8 Dung i, dijujui omakna ma boruna i mandok tu si Herodes, “Lehon ma tu au ulu ni si Johannes Pandidi. Jala bahen ma i di atas ni talam.”+ 9 Gabe marsak ma raja i, alai diparettahon ibana ma asa dilehon pangidoanna i. Ai nungnga sanga marsumpa ibana di jolo ni akka tamuna. 10 Disuru ma asa diponggol ulu ni si Johannes di penjara. 11 Diboan ma ulu ni si Johannes di ginjang ni talam jala dilehon ma tu anak boru i, dung i diboan ibana ma tu omakna. 12 Ro ma akka sisean ni si Johannes mambuat bakkena asa dikubur. Jala lao ma nasida paboahon i tu Jesus. 13 Dung dibege Jesus na masa i, lao ma sahalakna marparau tu inganan na lungun. Alai diboto akka halak ma i, gabe ro ma nasida mandapotton Jesus mardalan pat sian akka kota ni nasida.+

14 Dung sahat Jesus di topi ni laut, diida ibana ma massai godang halak disi. Asi ma rohana mangida nasida+ jala dipamalum ma akka na marsahit.+ 15 Alai dung botari, ro ma akka siseanna mandapotton ibana. Didok nasida ma, “Nungnga botari be, jala dao do inganan on. Suru ma nasida mulak, asa boi dituhor nasida sipanganon di akka huta na jonok.”+ 16 Alai ninna Jesus ma tu siseanna, “Dang pola lao nasida, lehon hamu ma nasida mangan.” 17 Dialusi nasida ma, “Holan lima do roti jala holan dua do dekke na adong di hami.” 18 Didok ibana ma, “Boan ma i tuson.” 19 Disuru ibana ma hundul akka jolma i di duhut-duhut. Dibuat ibana ma roti na lima i dohot dekke na dua i. Diida Jesus ma doppak langit huhut martangiang.*+ Diponggoli ibana ma roti i jala dibagihon ma tu siseanna asa dilehon tu akka jolma i. 20 Mangan ma nasida sude jala butong. Alai lobi dope roti i, dipapungu ma na lobi i, gok 12 karanjang.+ 21 Godang ni na mangan adong hira-hira 5.000 bawa, asing dope akka borua dohot dakdanak.+ 22 Dukkon i, pittor disuru Jesus ma akka siseanna asa parjolo lao marparau tu bariba. Laos disuru ma mulak akka jolma i.+

23 Dung disuru mulak akka jolma i, nakkok ma Jesus tu dolok lao martangiang.+ Disi ma sahalakna sahat tu borngin. 24 Di tikki i, nungnga massai dao* parau i sian darat. Ala mangalo alogo do arah ni parau ni nasida, munggil-unggil ma parau i dibahen galumbang. 25 Alai dung naeng manogot,* mardalan ma Jesus di ginjang ni laut lao manjuppangi nasida. 26 Tikki diida nasida mardalan ibana di atas ni aek i, massai mabiar ma nasida. Gogo ma didok nasida, “Ai aha do i!”* 27 Didok Jesus ma tu nasida, “Au do on, unang pola mabiar hamu. Pos ma rohamuna!”+ 28 Ninna si Petrus ma, “Tuan, molo tutu do ho i, suru ma au ro mandapotton ho. Suru ma au mardalan di atas ni aek.” 29 Didok Jesus ma, “Ro ma ho!” Dung i, kaluar ma si Petrus sian parau i jala mardalan ma ibana di atas ni aek mandapotton Jesus. 30 Alai dung diida ibana ro galumbang na balga, mabiar ma ibana. Tikki naeng lonong ibana, marsurak ma ibana. Didok ma, “Tuan, tolong jo au!” 31 Pittor dilehon Jesus ma tanganna lao maniop tangan ni si Petrus. Didok Jesus ma, “Ale ho siotik haporseaon, boasa gabe ganggu roham?”+ 32 Dung masuk nasida tu parau, so ma galumbang na balga i. 33 Marsinggang ma akka sisean na di parau i tu ibana, ninna ma, “Tutu do ho Anak ni Debata.” 34 Dung i, taripar ma nasida jala sahat di luat Genesaret.+

35 Dung diboto akka halak na di luat na ro Jesus tu inganan i, dipaboa nasida ma tu sude huta na di sakaliling ni luat i taringot tu ibana. Alani i, diboan akka halak ma tu Jesus sude na marsahit. 36 Dielek-elek nasida ma Jesus asa boi dijama nasida rambu ni abit luarna,+ jala malum do sude na manjama rambu ni abitna i.