Na disurat si Mateus

15 Dung i ro ma halak Parise dohot siboto surat*+ sian Jerusalem mandapotton Jesus, ninna ma, 2 “Boasa dang diihutton akka siseanmi adat ni akka omputta? Uppamana, dang disussi* nasida tanganna lao mangan.”+

3 Dialusi Jesus ma nasida, “Boasa dang diihutton hamu paretta ni Debata alani adatmuna i?+ 4 Uppamana, didok Debata do, ‘Pasangap ma omakmu dohot bapakmu,’+ jala, ‘Manang ise na mangaleai* omakna manang bapakna ikkon dipamate do.’+ 5 Alai didok hamu do, ‘Molo adong na mandok tu omakna dohot tu bapakna, “Sude na adong di au na lao lehonokku mangurupi omak dohot bapak, nungnga hubahen gabe silehon-lehon tu Debata,”+ 6 dang ikkon pasangaponna be bapakna.’ Dibahen hamu do gabe dang marlakku hata ni Debata alani adatmuna i.+ 7 Halak na munafik do hamu. Toho ma hata ni Panurirang* Jesaya taringot tu hamu,+ 8 ‘Holan di bibirna do bangso on pasangappon Au, alai dao do roha ni nasida sian Au. 9 Dang adong gunana nasida toktong manomba Au, ai paretta ni jolma do diajarhon nasida.’”+ 10 Di⁠jou Jesus ma akka halak na disi, jala didok ma tu nasida, “Tangihon jala parrohahon ma on:+ 11 Dang na masuk tu pamangan ni sasahalak na mambahen ibana ramun,*+ alai na kaluar sian pamanganna do.”

12 Dung i, didapotton akka siseanna ma Jesus jala ninna ma, “Diboto ho do naung haccit roha ni halak Parise i mambege na nidokmi?”+ 13 Dialusi Jesus ma, “Ikkon dicabut do sude suan-suanan na so disuan Damang na di banua ginjang i. 14 Pasombu ma disi. Panogu-nogu na mapitung do nasida. Molo na mapitung manogu-nogu na mapitung, rap madabu ma na nasida na dua tu lombang.”+ 15 Ninna si Petrus ma, “Patorang ma tudosan i tu hami.” 16 Dung i ninna Jesus ma, “Na so diattusi hamu dope?+ 17 Na so diboto hamu do? Sude na masuk tu pamangan ni halak, masuk do i tu butuhana jala kaluar do i muse. 18 Alai, sude na kaluar sian pamangan ni halak, na ro sian roha do i jala i do na mambahen ramun.+ 19 Uppamana, sian roha do tubu pikkiran na jahat+ songon: mambunu, mangalakkup, mangulahon seks na so patut,* manakko, mandok hata na so tutu, dohot mangaleai. 20 Akka i do na mambahen ramun sasahalak. Alai nang pe dang disussi* sasahalak tanganna tikki lao mangan, dang ramun ibana dibahen i.”

21 Ditadikkon Jesus ma inganan i jala lao ma ibana tu luat Tirus dohot Sidon.+ 22 Ro ma sahalak borua Penisia* mandapotton Jesus. Gogo ma didok ibana, “Asi ma roham di au ale Tuan, Anak ni si Daud. Massai haccit do ditaon borukku saonari. Ai disonggopi suru-suruan na jahat do ibana.”+ 23 Alai dang dialusi Jesus ibana. Alani i, ro ma akka siseanna mandok, “Palao ma ibana, ai sai jou-jou do ibana di puditta.” 24 Didok Jesus ma, “Holan tu halak Israel na songon biru-biru na lilu i+ do au disuru.” 25 Alai, ro ma borua i marsinggang tu ibana, ninna ma, “Urupi ma au Tuan!” 26 Didok Jesus ma mangalusi, “Dang denggan dibuat roti ni dakdanak jala disappatton tu anak ni biang.” 27 Didok borua i ma tu ibana, “Toho do i Tuan, alai roti na madabu sian meja ni tuanna i do diallang anak ni biang i.”+ 28 Dung i, didok Jesus ma tu ibana, “Ale inang, balga do haporseaonmu, saut ma pangidoanmi.” Laos di tikki i malum ma boruna i.

29 Sian i, lao ma Jesus tu jonok ni Laut Galilea.+ Dung i, nakkok ma ibana tu sada dolok jala hundul disi. 30 Ro ma massai godang halak mandapotton Jesus. Diboan nasida ma halak na pakpang, na cacat, na mapitung, na bisu, jala godang dope akka na marsahit. Dipeakkon nasida ma akka na marsahit i di pat ni Jesus. Jala dipamalum ibana ma nasida.+ 31 Dung diida akka jolma i na boi makkatai na bisu, malum na cacat, mardalan na pakpang, jala marnida na mapitung, gabe longang ma roha ni nasida jala dipuji ma Debata ni Israel.+

32 Dijou Jesus ma akka siseanna jala ninna ma, “Asi do rohakku mangida akka jolma on.+ Nungnga tolu ari nasida rap dohot au jala dang adong be sipanganon ni nasida. Dang mungkin suruokku nasida mulak. Ai nungnga male nasida, so tung pingsan annon di dalan.”+ 33 Alai ninna siseanna ma, “Dao do inganan on sian akka huta na asing. Sian dia ma boi dapotta roti lao allangon ni akka jolma on?”+ 34 Didok Jesus ma tu nasida, “Piga do roti na adong di hamu?” Dialusi nasida ma, “Pitu. Alai adong do manang na piga dekke na gelleng.” 35 Dung i disuru ma akka jolma i hundul di tano, 36 dibuat ibana ma roti na pitu i dohot dekke i. Dung didok ibana mauliate tu Debata, diponggoli ma roti i jala dilehon ma tu siseanna asa dibagi tu akka jolma i.+ 37 Mangan ma nasida sude jala butong. Alai lobi dope roti i, dipapungu ma na lobi i, gok pitu karanjang na balga.*+ 38 Godang ni na mangan adong hira-hira 4.000 bawa, asing dope akka borua dohot dakdanak. 39 Dung disuru mulak akka jolma i, nakkok ma ibana tu parau jala lao ma ibana tu luat Magadan.+