Na disurat si Mateus

26 Dung sae dihatahon Jesus sudena i, didok ibana ma tu akka siseanna, 2 “Nungnga diboto hamu, dua ari nai nama Paska+ jala pasahatonna ma Anak ni jolma i asa dihukum ibana jala digattung tu sada hau.”+

3 Marpungu do akka malim kepala* dohot akka pangituai* ni bangso i di alaman ni si Kayapas.+ Ibana do sintua ni malim di tikki i. 4 Marpungu ma nasida mambahen rencana na jahat+ lao manakkup Jesus. Dilului nasida do cara lao mambunu Jesus. 5 Alai ninna nasida ma, “Unang ma tikki perayaan i tatakkup ibana asa unang gaor akka jolma i.”

6 Tikki di Betania Jesus, di jabu ni si Simon na marsahit kusta* i,+ 7 ro ma sahalak borua mandapotton ibana. Diboan borua i do sabotol* miak na angur jala na arga situtu. Diusehon borua i ma miak i tu ulu ni Jesus tikki mangan ibana. 8 Muruk ma akka sisean i tikki diida na binahen ni borua i. Didok nasida ma, “Seang nai miak on! 9 Ai massai arga do miak i. Boasa dang digadis miak i jala dilehon tuhorna tu na pogos?” 10 Ala diboto Jesus do na dihatai nasida, didok ma, “Boasa gugaanmuna borua on? Ulaon na denggan do na binahenna i tu au. 11 Ai anggo halak na pogos toktong do adong rap dohot hamu,+ alai anggo au dang sai rap dohot hamu.+ 12 Ai diusehon borua on pe miak i tu dagingku, lao paradehon ari panguburanku do i.+ 13 Tutu do na hudok on tu hamu, manang didia pe barita na uli dibaritahon di liat portibi on, dibaritahon do tong na binahen ni borua on lao gabe parningotan di ibana.”+

14 Dung i, lao ma si Judas Iskariot+ sahalak sian apostel na 12 i mandapotton akka malim kepala.+ 15 Ninna ma, “Molo hupasahat Jesus tu hamu, aha ma lehononmuna tu au?”+ Marjanji ma nasida lao mangalehon 30 logam perak+ tu ibana. 16 Mulai sian i, sai dilului ibana ma tikki na denggan lao pasahatton Jesus tu nasida.

17 Di ari parjolo Perayaan Roti na So Marragi,+ ro ma akka sisean mandapotton Jesus, ninna ma, “Didia do lomo roham paradeonnami perayaan Paska i?”+ 18 Dialusi Jesus ma, “Lao ma hamu manjuppangi sasahalak tu kota. Dokkon ma tu ibana, ‘Songon on do didok Guru i, “Nungnga jonok be tikki naung ditottuhon tu au. Jala naeng mangarayahon Paska do au rap dohot akka siseanku di jabum.”’” 19 Dung i, diulahon akka sisean i ma songon na nidok ni Jesus jala diparade nasida ma na porlu tu Paska i.

20 Dung borngin,+ mangan ma Jesus rap dohot siseanna na 12 i.+ 21 Tikki na mangan i nasida, didok ibana ma, “Tutu do na hudok on tu hamu, adong do sahalak sian hamu na lao menghianati au.”+ 22 Massai lungun ma roha ni nasida mambege i. Alani i, sada-sada ma nasida mandok tu Jesus, “Dang au i kan Tuan?” 23 Dialusi Jesus ma, “Halak na rap dohot au pamasukkon roti tu makkuk, ibana ma na lao menghianati au.+ 24 Tutu, lao mate do nian Anak ni jolma i songon na tarsurat taringot tu ibana. Alai, marjea+ ma halak na menghianati+ Anak ni jolma i! Sasittongna, dumenggan do molo dang tubu ibana.”+ 25 Didok si Judas na lao menghianati Jesus i ma, “Dang au na nidokmu kan Guru?” Dialusi Jesus ma, “Diboto ho do alus ni i.”

26 Tikki na mangan i nasida, dibuat Jesus ma roti. Dung ditangiakkon, diponggoli+ jala dilehon ma tu akka siseanna. Didok ibana ma, “Buat hamu ma roti on jala allang hamu. On manggombarhon dagingku.”+ 27 Dung i, dibuat ibana ma sada makkuk panginuman. Didok ibana ma muse mauliate tu Debata. Dilehon ma i tu nasida, ninna ma, “Hamu sude, minum ma hamu sian makkuk on.+ 28 On ma manggombarhon mudarhu,+ i ma ‘mudar na mambahen sah parjanjian’+ na lao diusehon manesa dosa+ ni godang jolma.+ 29 Alai hudok ma tu hamu, dang inumokku be anggur sahat tu na huinum anggur na baru rap dohot hamu di Harajaon ni Damang.”+ 30 Dung sae mangendehon ende puji-pujian,* nakkok ma nasida tu Dolok Jetun.+

31 Dung i ninna Jesus ma tu nasida, “Na lao sude do hamu manadikkon au di borngin on.* Ai tarsurat do, ‘Attukonku ma parmahan i jala gabe marserak ma akka biru-biru i.’+ 32 Alai dung dipahehe au, parjolo ma au lao sian hamu tu Galilea.”+ 33 Dialusi si Petrus ma, “Nang pe sude nasida manadikkon ho, alai anggo au dang tadikkonokku ho!”*+ 34 Didok Jesus ma tu ibana, “Tutu do na hudok on tu ho, andorang so martahuak dope manuk borngin on, nungnga tolu hali dohononmu na so ditanda ho au.”+ 35 Ninna si Petrus ma tu ibana, “Nang pe ikkon mate au rap dohot ho, dang dohonokku na so hutanda ho.”+ Jala sude ma akka sisean i mandok songon i.

36 Dung i, lao ma Jesus rap dohot siseanna tu inganan na margoar Getsemane.+ Didok Jesus ma tu akka siseanna, “Hundul ma hamu dison, asa martangiang+ jolo au tusan.” 37 Ditogihon ibana ma si Petrus dohot anak ni si Sebedeus na dua i. Di tikki i, massai susa do pakkilalaanna+ jala massai lungun do rohana. 38 Dung i, ninna Jesus ma tu nasida, “Marsak situtu do rohakku, naeng mate huhilala. Toktong ma hamu dison mandongani au, jala toktong ma hamu dungo.”+ 39 Dung i mardalan ma ibana tu jolo saotik, marsinggang ma ibana jala martangiang.+ Didok ma, “Ale Amang, molo boi pasiding ma makkuk* panginuman on+ sian au. Alai unang ma lomo ni rohakku na saut, lomo ni roham ma.”+

40 Tikki didapotton Jesus siseanna, tarpodom do nasida diida ibana. Alani i, ninna ma tu si Petrus, “Na so boi do hamu toktong dungo nanggo apala sajom lao mandongani au?+ 41 Toktong ma hamu dungo+ jala sai martangiang,+ asa unang targoda rohamuna lao mangulahon dosa.+ Ai huboto do, anggo roha i naeng do nian mangulahon na sittong, alai gale do daging i.”+ 42 Dung i, lao ma ibana muse martangiang, ninna ma, “Ale Amang, molo so boi do dipasiding makkuk panginuman on sian au, jala molo ikkon minum do au sian i, lomo ni roham ma na saut.”+ 43 Tikki ro muse Jesus mangida akka siseanna i, tong do tarpodom nasida. Ai tung massai borat do mata ni nasida. 44 Ditadikkon ma muse nasida jala lao ma ibana martangiang patoluhalihon. Didok ma muse songon na ditangiakkonna i. 45 Dung i, ro ma muse ibana tu akka siseanna i, ninna ibana ma, “Modom dope hamu jala maradian di tikki sisongon on! Hape nungnga jonok be tikkina, dipasahat nama Anak ni jolma i tu tangan ni akka pardosa. 46 Dungo ma hamu, lao ma hita. Ida ma! Nungnga ro na menghianati au.” 47 Tikki makkatai dope Jesus, ro ma si Judas sahalak sian apostel na 12 i rap dohot massai godang halak. Diboan nasida do podang dohot attuk-attuk. Jala akka malim kepala dohot akka pangituai ni bangso i+ do na manuru nasida.

48 Nungnga dipaboa penghianat i hian tanda tu nasida. Didok ibana do, “Manang ise na huumma, ibana ma Jesus i, takkup hamu ma ibana.” 49 Pittor didapotton ibana ma Jesus ninna ma, “Horas Guru!” Laos diumma ibana ma Jesus. 50 Alai ninna Jesus ma tu ibana, “Marhua ho tuson dongan?”+ Dung i, ditakkup nasida ma Jesus. 51 Alai disittak sahalak sisean ni Jesus ma podangna. Diroro ibana ma hatoban ni sintua ni malim jala ditallik ma pinggolna.+ 52 Didok Jesus ma tu ibana, “Pamasuk ma podangmi tu ingananna.+ Ai manang ise na manittak podang, mate do dibahen podang.+ 53 Ai na dirippu ho do dang boi pangidookku sian Damang asa disuru marribu* suru-suruan?+ 54 Alai molo hupangido i, songon dia ma boi saut na di Surat na Badia i? Ai nungnga dipaboa na ikkon saut i sude.” 55 Dung i didok Jesus ma tu akka jolma na ro i, “Na dirippu hamu do pangarampok au, umbahen diboan hamu podang dohot attuk-attuk lao manak⁠kup au? Hape, ganup ari hundul do au di bagas joro mangajari,+ alai dang ditakkup hamu au.+ 56 Alai masa pe on sude, asa saut do na sinurat ni akka panurirang* i.”+ Dung i, lari ma akka sisean i, ditinggalhon ma Jesus.+

57 Diboan akka na manakkup i ma Jesus tu si Kayapas+ sintua ni malim i. Ai nungnga marpungu disi akka siboto surat* dohot akka pangituai.+ 58 Alai, sai diihutton si Petrus do Jesus sian na dao sahat tu alaman ni jabu ni sintua ni malim i. Dung masuk tu bagasan, hundul ma ibana rap dohot akka hatoban na disi mangida na lao masa.+

59 Dilului akka malim kepala dohot saluhut Sanhedrin* ma hatorangan na so sittong lao manudu Jesus mangulahon na sala, asa boi ibana dipamate.+ 60 Alai nang pe godang saksi na paboahon na so sittong taringot Jesus,+ dang adong nanggo sada pe dalan dapot ni nasida lao manakkup ibana. Dung i, ro ma dua saksi 61 na mandok, “Hea do didok ibana, ‘Boi do huruppakkon bagas joro ni Debata jala pajongjongokku muse di bagasan tolu ari.’”+ 62 Jongjong ma sintua ni malim jala ninna ma tu Jesus, “Boasa dang dialusi ho nasida? Na so dibege ho do akka hata ni nasida lao mangalo ho?”+ 63 Alai sai hohom do Jesus.+ Ninna sintua ni malim i ma tu ibana, “Marsumpa ma ho di bagasan goar ni Debata na mangolu i, paboa ma tu hami, tutu do ho Kristus anak ni Debata?”+ 64 Dung i, didok Jesus ma tu ibana, “Songon na nidokmi ma tutu. Alai, hupaboa ma tu hamu: Mulai sian tikki on, idaonmuna ma Anak ni jolma i+ hundul di sabola kanan ni Debata na marhuaso i.+ Jala na lao ro ma ibana idaonmuna di atas ni ombun na di langit.”+ 65 Gabe diribakkon sintua ni malim i ma pakkeanna, ninna ma, “Na mangaleai Debata do ibana! Tu aha be luluan akka saksi na asing? Nungnga dibege hamu ibana mangaleai Debata. 66 Boha do didok rohamuna?” Dialusi nasida ma, “Ikkon dipamate do ibana!”+ 67 Ditijuri nasida ma bohi ni Jesus,+ adong muse na manubbuk ibana+ jala na asing mamastap bohina.+ 68 Didok nasida ma, “E ho Kristus, molo panurirang* do ho, paboa ma tu hami ise na mamukkul ho!”

69 Tikki hundul si Petrus di luar di alaman i, ro ma sahalak hatoban borua mandapotton ibana. Didok borua i ma, “Dongan ni Jesus halak Galilea i do ho kan?”+ 70 Alai margabus do ibana di jolo ni nasida sude, ninna ma, “Dang huattusi manang aha na nidokmi.” 71 Tikki mardalan ibana kaluar tu gerbang na di alaman i, adong ma borua na asing mangida ibana. Didok borua i ma tu halak na disi, “Dongan ni Jesus halak Nasaret i+ do bawa on.” 72 Alai dang diakkui si Petrus na ditanda ibana Jesus. Marsumpa ma ibana tu akka jolma i, ninna ma, “Dang hutanda ibana!” 73 Dang sadia leleng nai, didapotton halak na jongjong na disi ma si Petrus, ninna ma, “Toho do, dongan ni nasida do ho, ai tarida do sian logatmi.” 74 Marsumpa ma si Petrus mandok, “Dang hutanda i! Sai hona bura ma au molo margabus.” Dung i, pittor martahuak ma manuk. 75 Gabe diingot si Petrus ma na nidok ni Jesus tu ibana, “Andorang so martahuak dope manuk, nungnga tolu hali dohononmu na so ditanda ho au.”+ Dung i lao ma ibana tu luar jala sai tumatangis ma ibana.