Job
42 Dung i didok si Job ma tu Jahowa,
2 “Saonari nungnga huboto be boi do sude diulahon Ho
Jala dang adong sakkapmu na so boi pasautonmu.+
3 Didok Ho do, ‘Ise do nuaeng on na mambahen dang takkas sakkappu, jala asal dipandok hatana?’+
4 Didok Ho do, ‘Tangihon ma jo asa makkatai Au.
Adong na naeng husukkun tu ho jala ikkon alusanmu do Au.’+
5 Saleleng on dibege pinggolhu do taringot tu Ho,
Alai saonari nungnga diida matakku Ho.
7 Dung sae didok Jahowa songon i tu si Job, didok Jahowa ma tu si Elipas halak Teman i,
“Muruk do Au tu ho dohot tu donganmu na dua i.+ Ai dang didok hamu na sittong taringot tu Au,+ songon na binahen ni si Job naposokki. 8 Saonari buat ma pitu lombu jantan dohot pitu biru-biru jantan. Lao ma hamu mandapotton si Job naposokki. Pelehon hamu ma pelean situtungon lao di hamu asa ditangiakkon si Job naposokki hamu.+ Dung i tangihonokku ma pangidoanna i. Jala dang balosokku hamu alani haotoonmuna i. Ai dang didok hamu na sittong taringot tu Au, songon na binahen ni si Job naposokki.”
9 Dung i lao ma si Elipas halak Teman i, si Bildad halak Syuah, dohot si Sopar halak Naama i. Diulahon nasida ma na nidok ni Jahowa tu nasida. Jala ditangihon Jahowa do tangiang ni si Job.
10 Dung ditangiakkon si Job akka donganna i,+ dipaujung Jahowa ma hasusaan ni si Job+ jala dibahen ma ibana muse mamora. Dilehon Jahowa ma arta tu si Job dua hali loppit sian appunana hian.+ 11 Dung i marroan ma akka haha anggina, ibotona, dohot akka na mananda ibana.+ Rap mangan ma nasida sude di jabu ni si Job. Diapuli nasida do ibana jala asi do roha ni nasida tu si Job, ai nungnga diloas Jahowa masa sitaonon i tu ibana. Sude ma nasida mangalehon sada hepeng perak dohot sada cincin mas.
12 Dung i gumodang ma dijalo si Job pasu-pasu ni Jahowa di ujungna sian na di mulana.+ Adong ma 14.000 biru-biruna, 6.000 untana, 1.000 halode boru-boru, jala 1.000 pasang lombuna.+ 13 Adong ma muse pitu anakna dohot tolu boruna.+ 14 Goar ni boruna na parjolo, i ma si Jemima, na paduahon si Kesia, jala na patoluhon si Keren-hapuk. 15 Boru ni si Job do na ubbagak sian sude borua na adong di luat i. Dilehon si Job do parbagianan tu nasida songon na tu akka iboto ni nasida.
16 Mangolu dope si Job 140 taon nai. Sanga dope diida ibana akka gellengna dohot akka pinoppar ni nasida. Diida ibana do pinopparna sahat tu sundut* na paopatton. 17 Ujungna mate ma si Job. Ganjang do umurna jala sonang do ngoluna.