1 Raja-Raja
17 Dung i ro ma si Elia*+ halak Tisbi na sian Gilead i+ mandapotton si Ahab. Didok ibana ma, “Songon pastina mangolu Jahowa Debata ni Israel na husomba i,* tung na so jadi ro nambur manang udan saleleng na piga-piga taon on, molo so hupangido!”+
2 Didok Jahowa ma tu si Elia, 3 “Tinggalhon ma inganan on, lao ma ho tu sabola timur, jala martabuni ma ho di Rura* Kerit na di sabola timur ni Sunge Jordan. 4 Aek sian sunge i ma inum, jala huparettahon pe akka burung gagak manaruhon akka sipanganonmu tusi.”+ 5 Pittor lao ma si Elia, jala diulahon ibana do sude na nidok ni Jahowa. Dung i, tinggal ma ibana di jonok ni Rura* Kerit na di sabola timur ni Sunge Jordan. 6 Ganup manogot dohot borngin sai ro ma burung gagak manaruhon roti dohot jagal tu ibana, jala aek sian sunge i ma diinum ibana.+ 7 Alai dung piga-piga ari, koring ma sunge i.+ Ai dang hea ro udan di luat i.
8 Dung i didok Jahowa ma tu si Elia, 9 “Lao ma ho tu Sarpat na di luat Sidon, jala disi ma ho tinggal. Husuru pe sahalak ina na mabalu paradehon sipanganon di ho.”+ 10 Lao ma si Elia tu Sarpat. Dung sahat ibana di gerbang ni kota i, diida ibana ma sahalak ina na mabalu papunguhon soban. Didok ibana ma, “Lehon hamu jo saotik aek inumokku inang.”+ 11 Tikki naeng dibuat ina na mabalu i aek siinumon i, didok si Elia ma tu ibana, “Laos boan ma jolo sada roti di au inang.” 12 Didok ina na mabalu i ma, “Songon pastina mangolu Jahowa Debatam, dang adong rotikku. Holan sanggolom topung do na adong di gucci na balga dohot saotik miak di gucci na gelleng.+ Saonari na papunguhon soban do au, asa adong pakkeonku lao mangaloppa sipanganon di au dohot di anakku. Holan i do sipanganonnami, dung i mate nama hami.”
13 Didok si Elia ma, “Unang ho mabiar. Mulak ma ho jala bahen ma songon na nidokmi. Alai parjolo ma bahen roti na gelleng jala boan ma i tu au. Dung i pe asa bahen sipanganon di ho dohot di anakmu. 14 Ai songon on do didok Jahowa Debata ni Israel, ‘Dang na lao habis topung di gucci na balga i, jala dang na lao habis miak di gucci na gelleng i. Songon i ma bahenon ni Jahowa sahat tu na ro udan.’”+ 15 Lao ma ina na mabalu i, jala dibahen ma songon na nidok ni si Elia. Gabe toktong ma adong sipanganon ni ina na mabalu i, keluargana, dohot si Elia manang na piga-piga leleng.+ 16 Toho do masa songon na nidok ni Jahowa marhite si Elia. Dang marna habis topung di gucci na balga i, jala dang marna habis miak di gucci na gelleng i.
17 Dung piga-piga leleng, marsahit ma anak ni ina na mabalu nappunasa jabu i. Lam leleng lam posi ma sahitna, ujungna mate ma anakna i.+ 18 Didok ina na mabalu i ma tu si Elia, “Ale naposo ni Debata na sittong, boasa ma bahenonmu songon on tu au? Na lao manungguli dosakku do ho jala pamatehon anakku umbahen na ro ho tuson?”+ 19 Didok si Elia ma, “Boan ma tuson anakmi.” Dibuat ibana ma dakdanak i sian abingan ni ina na mabalu i, jala diboan ma tu kamar parginjang ingananna marborngin. Dung i, dipeakkon ma dakdanak i di podomanna.+ 20 Martangiang ma si Elia tu Jahowa, didok ma, “Ale Jahowa Debatakku,+ di jabu ni ina na mabalu on do au tinggal saleleng on. Alai boasa ma dohot ibana susa dibahen Ho? Jala boasa ma dipasombu Ho mate anakna i?” 21 Dihaol ibana ma dakdanak i tolu hali. Dung i martangiang ma ibana tu Jahowa, didok ma, “Ale Jahowa Debatakku, bahen ma asa mangolu muse dakdanak on.” 22 Ditangihon Jahowa ma tangiang ni si Elia,+ gabe mangolu ma muse dakdanak i.+ 23 Diboan si Elia ma turun dakdanak i sian kamar parginjang. Didok ibana ma tu omak ni dakdanak i, “Ida ma, nungnga mangolu muse anakmon.” Dung i dipasahat ibana ma dakdanak i tu omakna.+ 24 Gabe didok omak ni dakdanak i ma tu si Elia, “Saonari takkas ma huboto na tutu do ho naposo ni Debata.+ Jala sittong do hata ni Jahowa na pinaboami.”