Jesaya
41 “Ale hamu akka pulo, sip ma hamu, tangihon ma Au,
Ale akka bangso, margogo ma hamu muse.
Pajonok ma jala hatahon ma.+
Beta, rap lao ma hita, asa huadili hamu.
2 Ise do na manuru sasahalak ro sian timur,*+
Na manjou ibana ro tu patna* lao mangulahon hukum na tigor,
Lao pasahatton akka bangso i tu tanganna,
Jala lao mambahen ibana manaluhon akka raja?+
Ise do na paserakkon nasida songon orbuk mamakke podangna,
Jala na mambahen nasida songon lapung ni eme* na niullus ni alogo mamakke panahna?
3 Dilele ibana do torus nasida, dang adong na mangabbati,
Dilewati ibana do dalan na so hea dope didalani ibana.
4 Ise ma na patupahon i jala na mambahen i,
Na manjou akka jolma* sian mulana?
Au, Jahowa do na mambahen i, nungnga adong Au sian mulana i,+
Jala sahat tu sundut na parpudi pe, toktong do Au Debata.”+
5 Mabiar ma akka pulo mangida i.
Jala makkahitir ma akka ujung ni tano on.
Marroan ma nasida jala manjonok.
6 Diurupi nasida ma akka donganna be
Jala didok ma tu haha anggina, “Patogu ma roham.”
7 Tukkang ukir hau patoguhon roha ni tukkang logam;+
Halak na manopa mamakke tokkok
Patoguhon roha ni halak na manopa bosi mamakke tokkok.
Didok ibana ma taringot tu hasil naung dipadomu i, “Denggan do i.”
Dung i dipakku ma i asa hot jala dang maponggol.
8 “Alai anggo ho ale Israel, naposokku do ho,+
Naung hupillit+ do ho ale Jakkob,
Pinoppar ni si Abraham ale-alekki,+
9 Huboan do ho sian ujung ni tano on,+
Jala hujou do ho sian inganan na undao di tano on.
10 Unang ho mabiar, ai hudongani do ho.+
Unang ganggu roham, ai Au do Debatam.+
Jagaokku do ho jala urupanku,+
Tiopokku do ho gomos marhite tangan kananku na mangulahon na sittong.’
11 Ida ma! Bahenon ma maila jala marlea sude halak na muruk tu ho.+
Dipamate ma sude na mangalo ho jala dipasuda ma nasida sude.+
12 Luluanmu ma halak na marbada dohot ho, alai dang juppangmu be nasida,
Halak na marporang mangalo ho dang tarida be, nungnga mate nasida sude.+
13 Ai Au do Jahowa Debatam na maniop tangan kananmu,
Jala Au do Debata na mandok tu ho, ‘Unang ho mabiar. Urupanku do ho.’+
14 Unang ho mabiar, ale Jakkob, cacing na dangol,*+
Ale halak Israel, urupanku do hamu,” ninna Jahowa na manobus* hamu,+ Debata Nabadia ni Israel.
15 “Ida ma! Bahenokku ma ho songon papan pardegean,+
Songon alat mardege na tajom.
Didege-dege ho ma akka dolok jala ropukkononmu ma i
Jala bahenonmu ma dolok-dolok gabe songon lapung ni eme.*
16 Dipiari ho ma nasida,
Jala diullusson alogo ma i dao,
Marserak ma i bahenon ni alogo na gogo.
Marlas ni roha ma ho alani Jahowa+
Jala bangga ma ho makkatahon taringot tu na binahen ni Debata Nabadia ni Israel.”+
17 “Dilului halak na susa dohot halak na pogos ma aek, alai dang dapot ni nasida.
Koring ma dila ni nasida alani uasna.+
Au, Jahowa alusakku ma nasida.+
Au, Debata ni Israel, dang tadikkonokku nasida.+
18 Bahenokku ma sunge mardalan di akka dolok-dolok na gundul,+
Jala mata mual na doras mardalan di akka rura.+
Bahenokku ma gurun pasir gabe kolam
Jala tano na harsang gabe inganan ni akka mata mual.+
19 Bahenokku ma tubu hau ares di gurun pasir,
Hau akasia, hau mirtel, dohot pinus.+
Bahenokku ma tubu hau juniper di gurun pasir,
Rap dohot hau as dohot hau cemara,+
20 Asa sude halak mangida jala mamboto,
Mamparrohahon jala mangattusi,
Tangan ni Jahowa do na mangulahon i,
Jala Debata Nabadia ni Israel do na manoppa i.”+
21 “Paboa hamu ma parsoalanmuna,” ninna Jahowa.
“Patudu hamu ma akka buktimuna,” ninna Raja ni si Jakkob.
22 “Patudu ma akka buktimuna jala paboa ma tu hami aha na lao masa.
Manang paboa ma tu hami akka na lao masa.+
23 Paboa ma tu hami na lao masa di ari na naeng ro,
Asa huboto hami na tutu hamu debata.+
Bahen ma manang aha sibahenonmu, na denggan pe taho manang na roa,
Asa longang rohanami mangida i.+
24 Ida ma! Dang marguna hamu,
Dang adong hasil ni ulaonmuna.+
Dihagigihon do manang ise pe na manomba hamu.+
25 Nungnga hehe sasahalak sian utara, jala ro nama ibana,+
Didege-dege ibana ma akka pamaretta,* ai dos songon tano liat do nasida,+
Didege-dege ma nasida dos songon sitopa hudon na mandege-dege tano liat na matonu.
26 Ise do na sian mulana paboahon on, asa boi huboto hami,
Manang ise do na sian mulana mandok i asa hudok hami, ‘Sittong do ibana’?+
Tutu, dang adong na paboahon i!
Dang adong na makkatahon i!
Jala dang adong halak na hea mambege manang aha sian hamu!”+
27 Au do na parjolo sahali mandok tu Sion, “Ida ma aha na lao masa!”+
Jala suruokku ma akka siboan barita na uli+ tu Jerusalem.
28 Torus do hulului, alai dang adong dapottu,
Dang adong sian nasida na boi mangalehon poda.
Torus do nasida husukkun, alai dang adong na mangalusi.
29 Ida ma! Dang marguna nasida sude.
Dang boi nasida mangulahon manang aha pe,
Jala songon alogo do akka patung logam ni nasida, dang marguna.+